“ოროფა, გერმაფე-გოლაფე, კოჩეფეში შიირეფე ოფშა მჭარუმ!”
(გოწოთქვალა: ანდღანერი მუსაჶირი ჩქიმი რენ რიდვან ოზქურთ ანჭაში. რიდვან ოზქურთ ანჭაში რენ დობადონა ჩქინიში ლაზი გამანთანერეფეშენ; სპორტმენი, მაჶუტბოლე, შაირი, “ომჟორე” ჯოხონი კულტურული შქაგური- კაჶეში მანჯე, მსქვა ჯუმაკოჩი. რიდვან ოზქურთ ანჭაში კალა ბიჲოგრაჶი მუშიშენ; სქიდალა მუშიშენ, პროჶესიული სპორტული სქიდალაშენ, შიირეფე მუშიშენ დო კულტურული ნოჩალიშეფე მუშიშენ ბღარღალით. 04 II 2022/ ალი იჰსან აქსამაზი)
+
ალი იჰსან აქსამაზი: თქვანთი გინონანნა, იფთი თი-თქვანიშენ მოლამიშინით, მუ იყვენ! სონური რეთ? სო ჲეჩქინდით, სო დიბადით? გვარი თქვანი რენ ანჭაში. მუ თქვალა რენ ანჭა? სოლენ, მუნდეს ჲეჩქინდერენ აჲა გვარი? ნამუ ნწოფულაფეს სო დო მუნდეს იგურით? ჩილერი რეთი? ბერეფე გიყონუნანი? ნამუ ნენაფე გიჩქინან?
რიდვან ოზქურთ ანჭაში: რიზე დო ვიჟა ნა ნუნწხუნ ღვანდი დოვირინი. ანჭაში სოჲადი შქიმი ვარონ, ელაჩამა’ნ. სოჲადი შქიმი ოზქურთი ონ. ანჭა არ კინჩიში ჲოხო ორენ. პაპუ შქიმი ასქერიშა იდუსი, ვა გვაქთუ, სარიკამიში შეჰიდი დიჲუ. პრი ასქერლუღიშა იდუ, ბენა შქიმი ქორბა დვაუდორტუ. კოჩი მუში ღურუსი, ბაბა მუშიში ოხორის დვორინი ბერე მუში, მეკალესქირითი ჩოი.
ბენა შქიმიში ბაბაფეში ელაჩამა ანჭა უწომერტეჲ, ჰიმდორა შუკულე შქუთი ჰიმ ელაჩამა ქოჯემადვეჲ. ბაბა შქიმი იმორდუსი, ღვანდიშა ნიჲონუ შკულე, მეკალესქირითიშა ნა ნიჲონუშენი, ანჭაში მიწომერან ჰიმ ორაშა ბერილე. არ მა ხვალა ართი ელაჩამაფეთი ქოჯემოდვეჲ. ჶუტბოლი ნავიბირტი შენი, “ლაზ 10”, “მარადონა” დო “შაირი” დეჲითეთი მიწომერან. ილქოქული ჩოი შქიმი, ორთა დო ლისე ვიჟაშა ვიდი. ლისეშა ვიტიშანი დიდო ვორსი ნა ტოფი მაბირეტუ შენი დო არ დო ჯენჩარერი ნა ვამიღურტეჲ შენი ჶუტბოლი კალე გოვიქთი, ჶუთბოლჯი ვიჲარე დეითე ჰიმ ორაფე კარარი ქომეფჩი. ჩილერი ვორე. ჯურ ბიჭი ბერე ქომიჲონუნ. პოლის, ქადიქოჲის ფსქუდურ. ლაზური დო თურქური ქომიშქუნ.
ალი იჰსან აქსამაზი: ბერობა თქვანიშენ, ოფუტეში სქიდალაშენ მოლამიშინით, მუ იყვენ! მუჭო რტუ სქიდალა ემინდროს? ბერობა თქვანიში გონოშინეფეშენთი მოლამიშინით! ედო ოფუტეს სქიდალა მუჭო რტუ დო აწი მუჭო რენ?
რიდვან ოზქურთ ანჭაში: ჯურენეჩი დო ვით წანა ნა გოლოვალი არ კოჩი ვორე, აშქვა ჰიმუშენი ჰამ ორაფე დო ჰიმ ორაფე ელევუდვასი, ჰიმ ორაფე დიდო კაობა ვორტი მიშქუნ. ბერონაში ორაფე შქიმი შენი, ზადე ხელერი დო კაობა გოლახთუ ორაფე. ბაბა შქიმითი დიდო ხე მომჩეჲ კაობა ოსქუდუ შენი. ორთაოქული ევონჭინიშა, ბენა შქიმიშკალა ვორტი დიდო ორაფე. შქუ დულჲაფე ფაჲერი მიღურტეჲ. ბენა შქიმი ოხორიში დულჲაფე, მა გალენი. გოლა, ფუჯეფეში მჭეში მა ვიქუმტი. ბაზი ელევუფინამტი, ვიმთერტი დო ტოფი ობირუშა მენდევიტი. ბენა შქიმი მიგნამტუ ფუჯეფე ვარიცხანი. გოლა ანდღა ნა მაღოდუფეში ჰეჩაჲე დოვიფაჲათ:
ანდღა უზუნ ჩაჲილუღი კალე მენდევუჩვი, კაჩკარ დაღიში თუდენდოფეშა. მა რადჲონა შქიმი ვიშქირ, ფუჯეფე მჯუმტეჲ. ნა მჯუმტეჲ ფუჯეფე პრი დოლუმჯუ ჲემა ჯელალაფური ოხორი კალე ომტინუ ქოჯოჭეჲ. ჰიშო ვარიქუმტეჲ, მუშენი ჰიშო იქუმან ვავოგნი დორტუ. კაჩკარ დაღი აფიჩორაშა პულაფე ქოგვაკორუ, ხავა ვორსი ნა ორტუ ოღურღულუ ქოჯოჭუ. ემოგი არ დო ღურღულუ ჩი, მა კაჩკარ დაღი მოჲიხუმა დომაწონუ, ქეწემახაფინუ ვიმტი. ფუჯეფე შქიმდა ორდო იმტეჲ. ჰიმ ორა ვოგნი ჩი, ფუჯეფე ჶურტონა ნა მოხთასენ ოგნამან, ჰეშენი ორდოშა ოხორი კალე იზდერტეჲ, ბენა შქიმი დომოგურუ. ღურღულუ დო ეწემაკაფინუსი, რადჲონა შქიმი ჯემილუ დორტუ. რადიჲონა შქიმი ირითულლი შქიმორტუ, “არქასი ჲარინ”, ჶუთბოლიში მაჩეფე, თურქეფე. ჰიმ ვარორტუკო მუჭოთე ოხოვაქთარტუ, ჰიმუთე ოხოვაქთერტი. ტობაშკალაშა ქოჯეჶთიდორტუ, ჰექოლე გოვიქთი. პულა ქამახთუ მუჭო ბძირარტუ ჩი, ჯემილუსი რადიჲონა გონწუმერორტუ. თამლინაფეში ოშქენდა “ნეშეთ ერთაშიშა ნა იშქინით თურქი დიჩოდუ ჲა დო ჰუჲ “ჰაჶთა სონი” პროგრამი” ეკევიჩათენ ჲა დეჲი ისნაფამტუ ჩი, ნენა მევაშქინი მუჭო ხე შქიმითე დობდვი სთერი ეპჭოფი დო ხელერი დო კაობათე ოხორიშა ვიგზალი. ოჩი ნეშეთ ერთაში გოვიშინით, სო დოლონჯაჲ თორპი თო ეჲანქტაჲ. ოგინერი ჩოი დო ჰუჲ დიდო ჯინქთურუ. ოგინე ქართიქართი ნუშვერტეჲ, წულუფე დიდეფე დუჟერტეჲ. ჩოი დიდი- წულუ ლაზური ისინაფამტეჲ. ჰუჲ ჰიშო ვარონ ირითული ჯინქთურუ. მითი ღურურტიკო ხე მელე ვარიქუჲ, ორჶ- ადეთი, კულტური ქორტუ. დიდეფე მუთი თქვანენ ჰიმ იჲერტუ. ჰუჲ აშქვა თერსი კალე ჯინქთურუ. ჯურენეჩი წანა ნა გოლვალეჲფე ქუშქურან, მითიში ჯორუმჯი ნა ვარონ შქით დევლეთიში არ თანეთი შქუ ვორტით დეი დომოგურამტეჲ მუელიმეფე ილქოქული. ჰიმ ორაფე ბერგუმტით, ფხაშქუმტით, ჩოი ხამფალუღი იჲერტუ. ირითული ქომიღურტეჲ. არ მჯუმუ, გაზჲაღი, შეჩერი დო დოლოქუნაშე შენი ნოღაშა ჯილინერტუ. ჰუჲ ირითული მევაშქვით დო ნოღაშა ეპჭოფუმთ.
ალი იჰსან აქსამაზი: თქვან პროჶესიონალი მაჶუტბოლე რეთ. იფთი მუნდეს გეოჭკით ჶუტბოლიში სქიდალას. მუნდეს პროჶესიონალი მაჶუტბოლე იყვით? ნამუ ლიგეფეს ჶუტბოლი ისთერით? ნამუ ჶუტბოლიში გუნდეფეს ისთერით? დიდოფეთენ ნამუ პოზისჲონეფეს ჶუტბოლი ისთერით ეჲა ჶუტბოლიში გუნდეფეს?
რიდვან ოზქურთ ანჭაში: ემოგი ვიჟა, ჩამლıჰემშინ სპორიშა ლისანსი შქიმი გამახთუ. ჰიმ ორაში ბელედიჲე ბაშკანი გალიფ ფელით ჩამლıჰემშინ სპორიშითი ბაშკანი ორტუ.1986 წანას რიზე სპორიში გენჩ ტაქიმიშა მიჲოხესი, ემოგინდენერი პროჶოსჲონელ კულუბი კუჩხე ქამოვიღი. შქუნი ორა მა-1, მა-2 ამატორი დო მა-1 ლიგი, მა-2 ლიგი, მა-3 ლიგი ორტუ მა არდეშენ სპორი ამატორი ორტუშანითი დოვიბირი, პროჶოსჲონელი ორტუშანითი. რიზე, ჲალოვა, ანთალჲა, ისტანბულიში პროჶოსჲონელი ტაქიმეფე 10-11 ნუმარა ჶორმაფე დოლოვიქუნი. მა ჶუტბოლი ვიბირტიშანი “ლაზ 10” ელაჩამა მუჭო ჯემადუ; ჰიმ დოვიფაჲათ: მა ნა ვიბირტი ტაქიმი შამპიჲონლუღიშა იბირტუ, რაქიბი შქუნი ქუმე მოჯევოლამტა დეი ჰისთერი მაჩეფე ირითული იჲენ. რაქიბი შქიმიში ჶუტბოლჯი კურალი ნავარონთი გოლომიგუთურტუ, ნავამიწონეჲ მუთი ვადოსქუდუ დორტუ. ჰაქოლე ვა გამოგალანენ, ჰაჲ მაჩი ეჭოფათ დო ვა გაგზალინანენ, ღურერი გამოლვა ხაზი ვაგაჲენნა, ვორსი ვარიბირა გოლი ვამიტოჩათენ სთერი, ირითულიში. არ კალე დო ქუსიში ჯემჩაჲ. არ ქუსი ჯემჩუსი, ჯევოლი, კუჩხე მემოთროხუ მიშკურტუ ლაზური ქოკოვუდვი ჶუტბოლჯითი, ჰაქემითი .
ჰეჲ გოჲომორეტუ ჰაქემითი, სი მუფერი ისინაფამ მა მუთი ვავოგნიჲა ნამ ნენათე ისინაფამჲა, მუთხა მოგორით მონდოჲა; მათი ვუწვი ჩი; სი მუფერი ჰაქემი ორე, კოჩი დომწამუ, კუჩხე მემოტახასენ, ქუსი ჯემჩაჲ ვაგაზინი? მოჲ მჩიტა ქარტი ვამეჩამ მა დეი გური მომალუ მა ვუწვი. ირითული ვამაძითუ მათი მჩიტა ქარტი ქომომჩასენ დეი ჰაქემი. დევრე- არასი იჲუსი, ა ხოლოთი დოვისინაფი, ლაზური მევაზმონი მუჭო არ ნენა’ნჲა. ოკაჩხე არ ოჲინი დაჰა ჰიმ ჰაქემი მოხვადუ არ მაჩი; მა დო მჩვეში არკადაში საჰაში დოლოხე კალე ვიტით; შქუ მიჲოხეჲ დო ვადომაგურეჲ, დიდო კოჩეფეში ნენათე თეზაჰურეთეფეთე. ჰიმდოჲ უჲოხი 10 ნუმარა ჩი, ართი ბერეთი 10 ნუმარა დოლვონქურტუ მათი. ნამ 10 ნუმარა ვუჲოხათ უწვესი, “ლაზ 10” უჲოხით ჲა ჰაქემი. ჰიშოთე “ლაზ 10” ელაჩამა ქოჯემადუ.
ალი იჰსან აქსამაზი: გამიჩქვინერი დიდო მსქვა ლაზური შიირეფე ქოგიღუნან. გამიჩქვინერი დიდო მსქვა თურქული შიირეფე ქოგიღუნან. გამიჩქვინერი სუმ შიირიშ ქეთაბი ქოგიღუნან. მა ეშო მიჩქინ: “ჩონა”/ “იშიქ”, “მენდრა/ უზაქ” დო “გურიში ვადი”/ გონულ ვადისი”. გამიჩქვინერი ვანა ნაგამიჩქვინასუნონ მაჟურა ქეთაბეფეთი გიღუნანი? დიდოფეთენ ნამუ თემაფეშენ ჭარუფთ შიირეფე თქვანი?
რიდვან ოზქურთ ანჭაში: ჰიშო: “ჩონა”, “მენდრა”, “გონულ ვადისი” ,”ჩამ ქოქულუ სევდალარ”, “გუნეშინ უშუდუღუ ჲერ”. “ჩონა” დო “მენდრა” ლაზური შიირეფე’ნ. “გონულ ვადისი” დო “ჩამ ქოქულუ სევდალარ” თურქური შიირეფე’ნ. “გუნეშინ უშუდუღუ ჲერ”, თურქური რომანი; ჶორტუნა ვადი, კაჩკარეფე ორეფერეფეში ჰეჩაჲეში რომანი ორენ. ჰანი ჰუჲშა ნაგამხთუ ჩითაბეფე. ნა ვოჲონდრინაფამ, ნა გამახთასენ ჩითაბეფეთი ქორან. არ თანე ლაზური რომანი, არ თანე ლაზური ჰეჩაჲე, არ თანეთი ხოლო ლაზური შიირი. არ დო თურქური შიირი ჩითაბეფე პანდემი დო მემლექეთი მციქა ონტალერი ნაონ შენი ირითული ვიჲონდრამ, ვა გამოვიღამ. ორა მუში მოხთასი, ჯევობაძგათენ, გამოვიღათენ, ჰიშო ვიმედამ. მა პოლიტიკაშა გალე მუთი ჰიჩაჲეში შიირეფე მჭარუმ. ოროფაში შიირეფე ოფშა მჭარუმ. კოჩეფეში, გერმაფეში, გოლაფეში, ოგინერეფეში. ნა იტრაღუდენში შიირეფე დიდო მჭარი. მუზისჲენი- სანათჩეფე ნა ტრაღუდუთი ქონ, ოტრაღუდონი შიირეფე დიდო ონ დო ჰუჲნერი მუზისჲენეფე ბესთექარი ვარუჲონურან. პოლი ჯელახუნერი თურქი დო შარქი ვარ იზიტტენ, ვარ იხენინენ. მუჭო იზიტტენ, ოგინერეფე ნა ნჭარეჲფე, ნა ტრაღუდეჲფე, ანონიმი ნა ჯოზუნ, თურქეფე, შარქეფე, ოზიტუთე ჰამ ორაფე გოლუჩუმან. არ ტელევიზჲონიში პროგრამი თურქ-ხალკ მუზიღიში სანათჩი შკალა ბერაბერი ვორტით. მოდერატორი უწუ ჩი ჰიმუ, რიდვანიში ჰამ შიირი მოჲ თურქი ვარიქუმ დო ვარ ტრაღუდამჲა ჩი, სანათჩი ჯევაბი მეჩუ, თელიჶ ჰაქქი ვამემაჩერან, ანონიმი ბედავა ქონ დო ჰიმ მუშენი ჯენჯარერი მეფჩათჲა. ჰამ ორაფე ჰაშო გოლუნ, მუპათ. ხანფალუღი ქონოხვეჲ.
ალი იჰსან აქსამაზი: “აღანი მურუცხი”/ “ჲენი ჲილდიზ” ჯოხონი ლაზური გაზეთაში სპორტული რედაქტორი რეთ, ეშო მიჩქინ. სპორტული მაკალეფე ჭარუფთ. დიდოფეთენ ნამუ თემაფეშენ სპორტული მაკალეფე ჭარუფთ?
რიდვან ოზქურთ ანჭაში: დიდოფე ჶუტბოლი ხაზაჲერან, ჰიმუშენი მათი ზათი ენ ვორსი ჰიმუში მიშქუნ. ჶუტბოლი შქუნი ჰამ ორაფე დიდო იტანჯჲარუ. სოკალე ვოგნამ მაჩეფე იჩოდასი, იდარეჯეფე ტაქიმეფეში ულიჟეფეში ოსინაფუშა. ავრუპა-ჶუტბოლიში საჰაში დოლოხე იბირინენჲა იტურან, ე ჰიმ შქუ მუ ვოგნამთ ჰაქო საჰაში გალენდოფე ნა იქთენ მეშკაღერი- მოშკაღერი დულჲაფე დეი ვოგნამთ. ირი ორა ბეტე ტანჯჲარი დულჲაფე იჲენ, შქუნი ორათი იჲერტუ ჶუტბოლჯიშა კომისჲონი ნა ეჭოფუმტეჲ, ვორსი ნა აბირენ კულუბე ხერტაშანი ართი ნა ობირამტეჲ დო ჰამ ორაფე იდდია დო კავული დიდო ნა ონ შენი გამაღურუ. მათი ბეტე მსქვა დო ვორსინობაში ონჭარუ ვიმედან ჶუტბოლიშენი დო მსქვა დულჲაშა პიათი დულჲაფე დიდო იჲენ მემლექეთი შქუნიში ჶუტბოლი. შქუთი ნა იჲენფე მჭარუმთ, მუპათ! ჶუტბოლიში ფთქვათი არმანდო დიეგო მარადონა ვა გოვიშნათ დო ვა გოლომალენ. ლეტა დიდო თო აჲაჲ, ალლა ნუშველაჲ ჰექო. მარადონა პოტე ვა გომოჭონდრუნ ჰიმუშენი დიდო მჭარი.
ალი იჰსან აქსამაზი: “ომჟორე” ჯოხონი კულტურული შქაგური- კაჶეში მანჯე რეთ. ჩქიმი თოლითენ, “ომჟორე” ხვალა კაჶე ვა რენ, “ომჟორე” რენ კულტურული შქაგურითი. მუშენი ეშო ვიზმონ?! “ომჟორე”-ს ხვალა მუხლამა, თერმონი, ფაფა, ლაზური ბურეღი სთერი ოთანტური ლაზური ოჭკომალეფე ვა იჭკომენ, ხვალა ჩაი, გაზოზი ვა იშვენ. “ომჟორე”-ს ლაზური ქეთაბეფეთე გამიჩინენ. ლაზური მუსიკათი ისიმინენ. ოთანტური დოლოქონეფე სთერი ლაზური ობჟეფე, სურეთეფეთი ნირჩინენ. კართა ნდღას გონწკიმერი რენ “ომჟორე”, ეშო მიჩქინ. დოლონის იჩალიშეფთ თქვან. ემუშენითი ხვალა კაჶე ვა რენ “ომჟორე”, კულტურული შქაგური, მა აშო ქომიჩქინ. აწითი აჲა დუქჲანი თქვანიშენ მოლამიშინით, მუ იყვენ! მუჭო დო მუნდეს ჲეჩქინდუ “ომჟორე”? პანდემიში, კორონავირუსიში ნდღალეფესთი წოხლენერი სთერი დულჲა იქიფთი?
რიდვან ოზქურთ ანჭაში: ლისეშა ვიტიშანი შიირი ონჭარუ ეკევიჭი. ჰიმ ორაშა ბერილე ჲაჲინევი ჩითაბი შიირი დიდო ხაზიმაჲერტუ. გური ქოგოვინდვი დორტუ. გური ნა დოვინდვი ეჩი დო ვიტო ხუთ წანერი ვიჲისი, პოლი- ქადიქოჲი გომწი. მა პანდა კალაბალუღი მსვალეფე ჯეგაფერი ვორტი, ჶუტბოლი, ესნაჶლუღი. ხარკი კოჩეფეშკალა დოხუნუ, ოსინაფუ, ოჩინუ პანდა მომინაჲ. მა სო დოვირინი მსვა ზორი მსვალეფერტუ, მა ზორიშა პოტე ვა ვიმტი. ჶუტბოლი ვიბირტიშანი ქუსიში მომათასი, ჯერი ვადობგუთურტი. “ომჟორე ქითაფ ჯაჶე “-თი ზორი კოჩეფეთი ბეტე ნიტეჲ დო მა ჯეგაფუმერი ვორტი. შქუნი ჯაჶეშა ირი კოჩი ნულურტუ დო უნივერსიტეშა ნაულურანფე დიდო ნიტეჲ. შქუ ლაზური კულტურიში ნა ნოზმორან ნა ვარუშქურან, მუთი ნა დოგურუ დვაჭირან მევუშვერტით. ირჶან ჩაღათაჲ ალექსივა, არაშთირმაჯი-ჲაზარი, ჯუმა შქიმითი დიდო მემიშვერტუ. ჰამ ორაფე პანდემი დო მემლექეთიში ხალი მოვიხესაპისი, ოჲონდრინუ მომინუ. ამციქა ირითულლი დიდუზანაჲ დო ხოლოთი გომწარე დეი ვიმედამ. არ კალეთი დობადონა შქიმი ჶურტონა ვადისი ბუნგალოვ ოხორეფე ვოხენაფამ წო ჲაზი ჰექო გომწათენ. შქუნი ჰინინეფე ტურიზიმიშენი ვორსო’ნ. ირიკალენდო კოჩეფე ულურან. ჲაზი შქუნი ჰინინეფე ბუნგალოვ ტურიზმი-თიჯარეთი, კიშითი ქადიქოჲი.ვორსინობა ვიმედარე დო ვიონდრარე.
ალი იჰსან აქსამაზი: მცუდიში ოხარჯუში არ დეკიკეთი ვა გიღუნან, აჲა კაიხეშა ქომიჩქინ. მარა ხოლოთი კითხალეფეს მსქვაშა ნენა გემიქთირით. აჲა რეპორტაჟი შენი თქვან გურიშენ შუქური გოღოდაფთ მა. ჩქვა კითხალა ვა მიღუნ თქვანდა. მარა თქვან ოთქვალუში ჩქვა ნენაფე გიღუნანნა, ენთეფე მიწვით მუ იყვენ! ბერე- ბარი კალა პანდა იხელით! ფიმფილი დიხაშა!
რიდვან ოზქურთ ანჭაში: კულტური მუშიშენი, ნენა მო გოჲკაიბერტაჲ დეი ნა ინჭელენ არ მხეშა კოჩი ვორეთ! ულიჟე ნა ვიტურთ კოჩეფეთი არ ჰიშო არ ჰაშო ზდანი, დიდო გური მემაჭვენ, კულტური, ორჶი დო ადეთეფე შქუნი შენი. გური ხვალა ვა მემაჭვენ, გურითი მომალე მელეში- მოლეში ნაზდამანფეშა. ხელა დო კაობათე. გური კაითე, ალი იჰსან ხოჯა შქიმი.
https://sonhaber.ch/ridvan-ozkurt-anc%cc%86asi-cogunlukla-ask-doga-insana-iliskin-siirler-yaziyorum/
http://www.circassiancenter.com/tr/ridvan-ozkurt-soylesisi/
