“დიდო ნანანენაფე მაყვანში, ეკონარი კულტურული ხამფობა მაყვენ!”
(გოწოთქვალა: აწინერი მუსაჶირი/ სუმარი ჩქიმი რენ დემირ აქინი. დემირ აქინი რენ ნოღა ართვინიში ომორდინუ დო ხიზმეთიში ვაქჶიში დუდმახვანჯე; ნანანოღა ანკარას. დემირ აქინი რტუ მანებრა ჩქიმი ჶეჲსბუკიშენ. უკულე გოწოს ქოკოფთით ნანანოღა ანკარას . ენთეფექ მიჭანდერეტეს სემინერი მეჩამუშა ვაქჶის. აჲა რტუ 23 იგრიკა 2017 წანას. სემინერი ჩქიმიში თემა რტუ “ლაზეფე”. მა კაიხეშა ვა მიჩქინ მარა, დემირ აქინი რენ ხოფური. ემუ რენ გამანთანერი დო კითხერი ჩქინებურეფეში ართ- ართი. ჩქინ არ კულტურული ინტერვიუ პით. მსქვაშა ბღარღალით დო აჲა რენ ნოღარღალე ჩქინიში ტექსტი. ალი იჰსან აქსამაზი. 30 XI 2018)
+
ალი იჰსან აქსამაზი: იფთი ბიჲოგრაჶი თქვანიშენ ბღარღალათ. სონური რეთ? მი ოღლეფეში რეთ? ნამუ ნწოფულაფეს იგურით? მუ დულჲა იქიფთ? სო სქიდურთ ანდღანერი ნდღას? ჩილერი რეთი? ბერეფე გიყონუნანი? მოთაფე გიყონუნანი? ნამუ ნენაფე გიჩქინან?
დემირ აქინი: ართვინიში ნოღა მაკრიალი/ ნოღედიში (ქემალფაშაში) ოფუტე ქოფრიჯიშენ ვორე. მა ჲეფჩქინდი 13 კუნდურა 1951 წანას, ექ, ოფუტე ქოფრიჯის. ბაბა ჩქიმიში დულჲაში სებებითენ; იფთი ნოღა ზონგულდაკის, ნოღა მერსინის დო ნოღა კარადენიზ- ერეღლის დოვიბარგით დო ფსქიდით. უკულეთი ნოღა ისტანბოლიში უნივერსიტეტის დოვიგური დო გეჯგინობათენ მეზუნი გამაფთი. უკულე ნანანოღა ანკარაშა დოვიბარგი. ედო (40) ჟურე ნეჩი წანაშენ დონი ექ ფსქიდურ. ჩილერი ვორე. ჟურ ბერე, ჟურითი მოთა ქომიყონუნ. ოშქენდა სევიჲეს (ჭიტათი ითქვენ) ლაზური ნენა ქომიქჩინ. კაი სევიჲესთი ინგლისური ნენა ქომიქჩინ. ჟეოჶიზიკიში მაღალი მუხენდისი, ინჟინერი ვორე. ედო დიხაშკანკალაში, დეფრემიში გოშოგორაში შქაგურონის ვიჩალიში. (2015) ეჩი ოში დო ვიტო ხუთ წანასთი ტეკაუდი ვიყვი. ოფუტე ქოფრიჯის (ბაბა ჩქიმიშენ გენომსქიდე მთელი) მულქეფე ჩქიმი, ხეს ვოქაჩაფ. ედო მა მინონ, ექ ვიბარგა ხოლოსონი ორას; გურის ეშო მეკამილაფს.
ალი იჰსან აქსამაზი: დემირ ბეგი; თქვან, ნოღა ართვინიში ომორდინუ დო ხიზმეთიში ვაქჶიში დუდმახვანჯე რეთ. ვაქჶი თქვანიქ მუ კულტურული აქტივითეფე იქიფს? მა მიჩქინ ქი, ხორონიში კურსეფე გიღუნან; ნენაში კურსეფე გიღუნან. ენთეფეშენ მეტა, მუ კულტურული დულჲაფე იქიფთ ვაქჶის?
დემირ აქინი: ჩქინ ნოღა ართვინიში ომორდინუ დო გამანთანაში ვაქჶი გებდგით 1996 წანაში ჩოდინა ნდღალეფეს. ნოღა ართვინი დო უჩამზოღაში ჩქინებური სემთის, ნოწილეს ხვენერი პლასმანიში პროჟეფე შენი.ჩქინებური უჩამზოღაში, ნოწილე ჩქინიში ოკოხვერი გამანთანაში სისტემიშა მოხვა ჩარეფე ოძირამუ შენი ოკოხთიმუ დომაჭირტეს. ედო ხოლო, ნოღა დო ხოლოსონი ნოწილეფე ჩქინიში კულტურული დო ხეშნოხვენური სფეროს ოჩალიშუში თემაფეშენ ოკოვიღარღალით. აჲა თემაფეთენ გოშოგორაში პროჟეფე ოხვენუ დო ემკათა აკადემიური ნოჩალიშეფეს ომხვაჯუ შენითი ოკოვიღარღალით. ტურიზმი დო თარიხური მირასეფე ჩქინი გამანთანარული გოშაგორაფეთენ მთელ თურქიჲეს ოგნაფუ შენითი ჩარეფე, გზალეფე ბგორით. ედო ხოლო, ბუნჯინალური პრობლემეფე, გამაჩქვალა-ჭანდინაში ნოჩალიშეფე, ვიზუალური ვარნა ჭარელი მედჲა კალა ირთიბათი, კონტაქტი სთერი სფეროფეს ოჩალიშუთი; მთელ ანთეფე დოლოჭარელი რენ ვაქიჶი ჩქინიში სენედის. გოლახთიმერი ეჩი წანას, იფთი “ნოღა ართვინიში პლასმანეფეში სემფოზჲუმი”( ნანანოღა ანკარას), “ნოღა ართვინიქ ხაზიროფს (21.) ეჩი დო მაართანი ოშწანურაშა” ჯოხონი სემფოზჲუმი (ნანანოღა ანქარას), “ნოღა ართვინიში ტურიზმული პოტანსიჲელი დო მოხთანერიში სემპოზჲუმი (ნოღა ართვინის); ამკათა დიდი ოკოხთალაფე კალა (10- ფეთენ) ვიტეფეთენ პანელი, ოკოთვალა, იმზაში დღა; “ართვინიში დღალეფე” ჯოხონი აკტივიტეფე პწოფხით ჩქინ. ანთეფეში ოჭარუ დო ოკოროცხუთენ ორა მეკამილასუნონან დო მუთუ ვარ.
მა მიჩქინ, თქვან დიდოფეთენ კულტურული დულჲაფე კალა იბოდერთ დო მათი ემუშენი კულტურული ნოჩალიშეფე ჩქინიშენ ამბარეფე მექჩათენ არშვაჯის: ნანანოღა ანკარაში სემთი/ ნოწილე დიქმენის გედგინერი “ართვინიში ოხორი” ქორენ. ედო “ნოღა ართვინიში კულტურული, ხეშნოხვენეში გოშოგორაში შქაგური რენ დო ამკათა სფეროფეს ხიზმეტეფე მეჩაფს მთელო. (250) ჟურ ოში დო ჟურე ნეჩი დო ვით კვადრატონი სეროს გელადგინერი რენ ქუთუფხანა ჩქინი. ედო თქვან გაძირენან კორობერი მთელ რაბისკა, ჩქინაფე, ამბარი დო დოკუმანეფე ქუთუფხანა ჩქინიში დოლოხე. ედო ქუთუფხანა ჩქინიქ მაგოშოგორეფეს ხიზმეტი მეჩაფს კართა სფეროს. ართვინური მთელი მაჭარალე დო შაირეფე ჩქინიში ნოხვენეფე კორებერი რენ არ ბურმეს. ნოღა ართვინიში ჟინ ჭარელი კართა ქეთაბი კორებერი რენ ხოლო აჲა ბურმეს. უმჩანე ჩქინი მაგოშოგორე ჰაჲრეთთინ თოქდემირიში ქულლიჲათითი კორებერი დოლოძინ ვაქჶი ჩქინიში ქუთუფხანას. ართვინური ხალკური შაირეფეში ნოხვენეფე კორებერი რენ მაგოშოგორე ბეკირ კარადენიზი შკელენ. ედო მუში მთელი ნოხვენეფეთი ჰედიჲე მეჩამერი რენ ვაქჶი ჩქინიში ქუთუფხანაშა. ედო ხოლო სემთი, ნოწილე ჩქინიში თარიხი დო კულტურული ფასეფე, მჭიფაშა, ნა კორობუ იფთინერი მაგოშოგორეფეშენ ადილ ოზდერიში ნოხვენეფეთი ქუთუფხანა ჩქინის რენ დო მაგოშოგორეფეს ხიზმეტი მეჩამუშა ხაზირელი რენ. მაჭარალე დო მაგოშოგორე აჲდინ ქარასულეჲმანოღლიში ქულლიჲათითი ქუთუფხანა ჩქინის იკორობენ. აჲა შქაგურონი ჩქინის, კართა თუთას არ ჶარა; არ მაჭარალე, არ შაირი ვარნა არ კულტურიშკოჩი კალა ოკოთქვალა- იმზაში ნღა პწოფხუფთ ჩქინ. ეშო გომაშინენ ქი, ჩოდინა ანში თუთას; პროჶ. დრ. ალი დემირი (“მჭითა მანდილი”) , ქევსერ რუჰი (“გურჯული ედებიჲატი დო ნენა”), ავუკათი ჲალჩინ დუმანი (“სქიდალა ჩქინის რომანი, მჭარალობა დო მაედებიჲეფე”), მაგამანთანე- მჭარალე ბაკ ირჯიოღლი კალა ოკოთქვალა- იმზაში დღა პწოფხუფთ. თქვანთი გიჩქინან, 7 მირკანი რენ ნოღა ართვინიში დუშმანიში იშგალიშენ მოშლეთინობაში დღა. კართა წანაში 7 მირკანის, ნოღა ართვინიში მოშლეთინობაში დღაში ოშინუ დო ოხვამუ შენი ანითქაბირი მოვიკ ითხუფ. აჲა მოკითხა შკულეთი, ნოღა ართვინიში თარიხიშენ გოშაგორაფე, ნა ქუღუნ არ ჩქინერკოჩიქ 7 მირკანიში ბეჯითობაშენ სემინერი მომჩაფან ვაქჶი ჩქინიში შქაგურის. უკულეთი არ ატელჲეში ჶაალიჲეთი პწოფხუფთ ჩქინ. უკულე მაგამანთანე ჩქინი ქემალ ოზბიჲიქიში გოწოჯღონერობა კალა დო გუდასთვირი დო აკორდიჲონიში მუსიქითენ, ხალკური ხორონეფეში ეკიბი ჩქინიქ ნოღა ართვინიში, ოთანთიკური ხორონეფე იჩალიშეფან ვაქჶი ჩქინიში შქაგურონის, კართა ხაჶთაშ/ დოლონიშ ჩოდინადეს. ვაქჶი ჩქინიში ბინაში არ კათისთი როლიჲეჶი დო ფიცარიშ ოღაფუში კურსეფე ქომიღუნან. აჲა კურსეფე, დევლეთიში ხალკიში გამანთანაში მუდირობა კალა ხე-ოკოკლიმერი პწოფხუფთ. კართა წანას ოში კონარი კოჩიში ოკათუთენ, კურსეფე პწოფხუფთ. კართა გამანთანაში ჩოდინასთი, აჲა კურსეფეს ხვენერი ნოჩალიშეფე მეირჩინენ ჰემი ვაქჶი ჩქინიში სალონეფეს ჰემითი ნანანოღა ანკარაში შქაგურონიში სალონეფეს. ხოლო ოთქვალუში ვორე ქი, არ დოხმელი ნოღამშინე ჩქინიში ჟურ ჶილიმიში, (“ბაბა ჩქიმიში იხეფე” დო “სთეველი”ში) გალაფე იხორცელინუ მაჟურა დერნეღეფე კალა ვაქჶი ჩქინი შკელენ. ვაქჶი ჩქინიში ოქთალაში კომისჲონიქ გონკვათუ: აჲა გონკვათაში ჰუქმითენთი, ჩქინ არ წანას ჟურ ქეთაბი გამოვოჩქვათენ. ართვინიში დოხმელი შაირი დო გამანთანა ხასან ჩელებიში ნოხვენეფეშენ ნოკორობე იყვასენ იფთინიში ქეთაბი ჩქინი. აჲა ქეთაბიში ედიტორი რენ გუნერ ჲალჩინი. მაჟურანი ქეთაბი ჩქინი გამიღასუნონ აშიკი დერჲამიშენ ნოკორობე (1400) ვიტოში დო ოთხო ოში კონარი შიირი მუშითენ. აშიკი დერჲამიში აჲა ნოჩალიშე გამიჩქვინერეტუ მაგოშაგორე ჰ. თოქდემირიშ კელენ (1970-ონი) ვიტონ ჩხორო ოში დო სუმე ნეჩი დო ვიტონი წანაფეს. ედო ქეთაბი გამახთასუნონ არ-ჟურ თუთაშა.
(1997) ვიტონ ჩხორო ოში დო ოთხო ნეჩი დო ვიტო შქვით წანაშენ (2005) ეჩი ოში დო ხუთ წანაშა, ნოღა ართვინიში კულტურული დო მეშველუში დერნეღი კალა ართოთ გამიჩქვინერი ჟურნალი “ბ. ათაბარი” დო (2008) ეჩი ოში დო ოვრო წანაშენ (2013) ეჩი ოში დო ვიტო სუმ წანაშა ვაქჶი ჩქინი შკელენ გამიჩქვინერი ჟურნალი “ართვინ ევი” (“ართვინიში ოხორი”) ვა გამულუნან ანდღანერი ნდღას; ემუშენი ქი, ჶინანსური პრობლემეფე ქომიღუნან.
ახირის ოთქვალუში ვორე ქი, სემთი, ნოწილე ჩქინის სუმ ეთნიკური გრუბი სქიდუნ. ედო აჲა სუმ ეთნიკური გრუბიში კულტურული, თარიხური დო ხეშნოხვენური ფასაფეშენ ამბარეფე, ნა მეჩაფს პანელი დო ოკოთქვალაფეშენთი მოლაფშინა, აჲა მინონ. ჩქინ ამკათა ნოჩალიშეფეში ჟინ ფთირთინაფთ. აჲა გაგნაფა ჩქინიშა მემსქვანერი ოკოხთალა, პანელი დო ოკოთქვალათი პწოფხით. იფთინერი ოკოხთალა ჩქინიში თემა რტუ “ლაზეფე.” ედო შევქეთ ჩორბაჯიოღლი ბეგიში მოდერატორობათენ; ქემალ ოზბიჲიქი ბეგი დო ქამილ აქსოჲლუ ბეგიში შველათენ ხვენერი პანელი; ალი იჰსან აქსამაზი ბეგი შკალა ხვენერი ოკოთქვალა; გურჯული კულტური დო თარიხიში ჟინ ქევსერ რუჰი ხანუმი კალა ართოთ ხვენერი ოკოთქვალა ოფშა ბეჯითი რენ.
ხემშინური ეტნისიტეში ჟინ არ სემინერიში ოწოფხუთი მინტეს მარა, აჲა სფეროს გამახთიმერი ჟურ ზიდდური იდიალონი სიმადაში სებებითენ, სემინერიში ოწოფხუშა ოკონოსუ ვა მაყვეს. ემუშენითი ვა მახვენეს ეჲა სემინერი. აჲა დორკინერობა ჩქინი ოჩოდინუ დო მაჟურა ეტნისიტეფეში ამბარეფეთი მილლეთის ოგნაფუთი რენ ჩქინი დულჲაფეშენ, ნა მოხთასიონ ორაში დოლოხე.
ალი იჰსან აქსამაზი: მჯვეში ორაფეს, კოჩეფე ჯუმალობაში დოლოხე სქიდურტეს, მარა კაპიტალისტური ანარშიში ხეთენ, დიდო პატი დღალეფე ქობძირით დო ქობძიროფთ. კაპიტალიზმი რენ ნტერი კოჩინობაშა. ანდღანერი ნდღას, კაპიტალისტური ვანდალიზმიქ ბუნჯინათი მეკარბუფს. აწი წკარი ფარათენ რენ მარა, აჲა ვანდალიზმიში გური შენი ვით- ეჩი წანაშა წკარითი ვა მაძირენან. მუ პათ დო ბუნჯინა ჩქინი ვოსქედინათ?!
დემირ აქინი: კაპიტალისტური სისტემიქ ვანდალიზმობათენ მეკარბუფს ბუნჯინა ჩქინი. აჲა იყუ კოჩინობაში პრობლემი აჩქვა. აჲა, კულტურული დო თარიხური პრობლემითი რენ. არ ორნეღი მექჩათ: (1000-ეფეთენ)ვიტოშეფეთენ წანაფეშენ დონი, ჩქინი ოფუტეში ღალი ეჲა ვადიში გზათენ დიბენ. ედო ჩქინი კულტური, წკარი კალა ართოთ სქიდუნ დო ირდენ; ეშოთი იჩქინენ. აჲა ღალი დო მუში წკარიქ ვადი ჩქინი დო მანძაგერეფე ჩქინიშენ ოკორთუფს. ორნეღითენ; ლაზეფეში ბუნჯინალური გეულვა სინორი ნა რენ ღალი მელჲათი სთერი.
ვაქჶი ჩქინიქ, იფთინერი დღა მუშიშენ დონი, უკორეცხუ აქტივიტეფე ყუ აჲა სფეროს. (1997) ვიტონ ჩხორო ოში დო ოთხო ნეჩი დო ვიტო შქვით წანა რტუ, ჩქინ იფთინერი სემპოზჲუმი ჩქინი პით ბუნჯინაში თემათენ. ემინდროს უჩამზოღაში დუბლე გზაშენ, დიდო ღარღალაფტუ მილლეთიქ.ჩქინ ეჲა გზა შენი კრიტიკური სიმადეფე ქომიღუტეს დო ჩქინ აჲა სიმადეფე ჩქინი მაღალი სერსითენ ირის ვოგნაფით ემინდრონერი დიხაშგზალეფეში გენერალური მუდირი, დირექტორი ჲამან ქოკიში ოღინდე, წოხლე, “აჲა რენ ბუნჯინაში ქათლიამი. აჲა რენ ფარა მოგაფუში პროჟე.”-ჲა ფთქვით. აჲა დულჲაში რაბისკაფე მუშითენ ირის ვოწირით. ხოლო ემინდროს, დსი- შკელენ ხვენერი სემთური პროჟეთი, ჭორუხიში ვადიში ხურგეფეში პროჟეთი ხოლო დსი-ში გენერალური დირექტორიში წოხლე მსქვაშა იპროტესტინუ. “აჲა პროჟექ ბუნჯინა მეკარბასუნონ. ხვალა ბუნჯინა ვარ, სოსჲალური კაპეტობასთი ზარარი მომჩასუნონან. უკულენი ორაფეს, აჲა კაიხეშა იძირინუ დო ოხოიწონუ. ჯერათთეფეს ორქოში მადენიში დულჲაქთი ნოღა ართვინი ნა ოღურასუნონ ბუნჯინალური ქათლიამო იძირინუ. ედო ამკათა ზარორონი პროჟეფეშა რეაქსიჲონეფე ქომეფჩით ჩქვადოჩქავა ოკოხთალეფე დო აკტივიტეფე ჩქინითენ ჩოდინა (20) ეჩი წანას. მახქემეში სუმ გონკვათა ხეს ქომიღუნან მარა, კაპიტალისტური, სერმაჲეში სინიჶიქ, კლასიქ მენჯელი მუშითენ, სიჲასური იქთიდარის ემკათა კანონეფე ოქთირაფუ. ედო სერმაჲეში სინიჶიქ თი-ენთეფეშა მოხვა კანონეფე ოხვენაფუ. ახირისთი, ენთეფეში გური შენი, ჩედ-იში რაპორი ტესტიკერი გამიჩქვინუ ჰუქუმეთი შკელენ. ედო აჲა რაპორითენთი ოჩალიშუს ქოგეოჭკეს .
(4400) ოთხო ვიტოში დო ოთხო ოში ჰექთარ-დიხაში ოჩალიშუში ლისანსი ქუღუტეს მარა, (22) ეჩი დო ჟური ჰექთარ-დიხა ჩქვა შენი ჩედ-იში რაპორი გოწოღუშუ დუბარე მუთეფეში, თი-მუთეფეშის ვა დუბაღუ, აწითი აჲა სფერო, ვით კათი ოდიდანუთენ ჩედ-იში რაპორი უგოწუთენ იჩალიშეს. მახქემექთი, აჲა დუბარაფე კოზირენ ქი, (ჩქინ ეშო ვისიმადეფ) “აჲა დოგიბაღუნ. თქვან ონჯღორე ვა გიჩქინანი?”-ჲა თქვერენან, “ჩქინთი ჶელენგის ქოგემოხუნეს”-ჲა. ენთეფეში აჲა დუბარა ვა იკაბულინუ მახქემე შკელენ. ჩქინ ხუკუკური კაბღა მეფჩით დო მეფჩაფთ აჲა სფეროს. (200-შენ) ჟურ ოშიშენ მეტა ჰეს, ვიტეფეთენ ქვაშოჯაღი დო (200) ჟურ ოში კონარი აღანი მადენიში ლისანსიშა მედგინერი ვაქჶი ჩქინიქ მუჯალედე მეჩაფს მაჟურა პლატჶორმეფეს ომხვაჯუთენ. უწკარე ღალეფე, ღურელი ჩხომეფექ დო ღვარეფექ ვახშეთიში დიდინობა მოწირაფან. მუ ოხვენუში ვორეთ?! აჲა კითხალაში მაართანი ჯოღაბი რენ ნოდგითუ. მაჟურანი რენ მუჯადელეში ოკაპეტანუ დო კართა სფეროს ოჩალიშუ (ხუკუკი, ხალკი, პარლამენტო, ქიანაში მაგომორგვეფე კალა კონტაქტის ოყოფიმუ დო ჩქვა). აჲა მუჯადელეს კართა სიჲასური პარტეფეშენ მილლეთიქ მხუჯი მეჩაფს დიდოფეთენ. მარა კოჩი ვორეთ, აჲა რენ კოჩინობაში პრობლემი დო ართიქართის მხუჯი მეჩამუში ვორეთ. ართიქართის ომხვაჯუთენ მენჯელონი დო გეჯგინერი ვორეთ ჩქინ. ჩქვადოჩქვა სფეროს ჩქვანერობაფე ქომიღუნან მარა, აჲა ჩქინი რენ ჩქინი ხამფობა; ეშო გონკვათუში ვორეთ დო მუთუ ვარ. აჲა გონკვათა ოყოფიმუში რენ ჩქინი კაპეტი სლოგანი.
ალი იჰსან აქსამაზი: დემირ ბეგი; თქვანთი კაიხეშა გიჩქინან, ლაზური ნენა ღურუნ. ხოშ ნამთინი ნწოფულაფეს მენოცხუნე დერესეფე მეჩაფან მამგურაფალეფექ მარა, აჲა დობაღინე ვა რენ. ეშო იძირენ ქი, აჲა დულჲა ხვალა ეჲა დერსეფეთენ ვა იყვენ. ირიშენ კაი დულჲა რენ თრტ-ში ჭანდინა. თრტ-ქ- ქურდული ნენათენ 7/24 ჭანდინაფს, აჶრიკული ნენაფეთენ ჭანდინაფს მარა, ვა ძიროფს ლაზური ნენა. ქურდული ნენათი იყვას, მაჟურეფეთი. მუ პათ დო თრტ-ქ ლაზური ნენათენთი ჭანდინას? მუ იზმონთ?
დემირ აქინი: ლაზური ნენა ღურასენი; მა ეშო ვა ვისიმადეფ. მუშენი აშო გიწუმერთ, ეჲათი გიწვათ. ლაზური ნენა რენ ჯინჯონი კულტურიში მონოჩანე. ანდღაშაქის უკორეცხუ ზალიმობაშენ გეჯგინერი გამახთუ ლაზური ნენა. ედო სქიდასუნონ; მა აშო ვისიმადეფ. ხოლო თქვანდა გიწვათ, დიდო მაგოშაგორექ ლაზური ნენაში ოსქედინუ შენი დოხმელი კაპეტი ნოჩალიშეფე იქიფან; ქეთაბეფე გამიჩქვინენ. ჰო,თრტ-ქ ლაზური ნენა ვა ძიროფს; აჲა რენ ჰემი კანონეფეშა მედგინერი, ჰემითი კოჩინობაშა მედგინერი დიდი კაბაეთი რენ. მარა ოთქვალუში ვორე ქი, აჲა ხალიშენ ხვალა თრტ ვარ, ჩქინ ლაზი გამანთანერეფეთი დიდო კაბაეთონი ვორეთ. ჩქინთი მესული ვორეთ; აჲათი კაიხეშა მიჩქიტან! დიდი ონჯღორე რენ ქი, ჩქინ მემაჩენეს კაპეტი მუჯადელე. უდოდგინუ აჲა დულჲაში ხე-ოკოკლიმერი ვა მაჩალიშეს დო სიჲასეთკოჩეფე კალა ლობიში ჶაალიჲეთეფე ვა მახვენეს. დოლოხენი ჩქვანერობა ჩქინიშა ტოლერანსი ვა მაყვეს. ანდღანერი ნდღას, აღანი ჯუმალონი მოტივასჲონითენ დო კარარონი დო პლანონი ნოჩალიშეფე დოპათ ხე-ოკკლიმერი. ედო ლაზური ნენაში მუჯადელე იყვას თურქიჲეში დემოკრასიში მუჯადელეში ნოწილეფეშენ ართერი.
ალი იჰსან აქსამაზი: ლაზური ნენა ხვალა ლაზეფეში ნანანენა ვა რენ; ლაზური ნენა რენ კოჩინობაში კულტურული მირასი. ედო კოჩინობაში ირიშენ მჯვეში ნოკუჩხენეფე ლაზური ნენაში დოლოხეთი შინახერი რენ. ლაზური ნენა ღურაში, კოჩინობათი ღურასუნონ. ჯუმალობათი ღურასენ. კოჩინობაში ირიშენ მჯვეში ფასეფეთი ღურასენ. მა აშო ვისიმადეფ. თქვან მუ ისიმადეფ. მუ დო მუჭო პათ დო ვოსქედინათ ლაზური ნენა?
დემირ აქინი: მდღურა გიწვით, ლაზური ნენა ვა ღურასუნონ; ემუშენი ქი, კოჩინობა ვა ღურუნ, ადამობა ვა ღურუნ. ანდღანერი ნდღალეფეს, მეჭირელობაში დოლოხე რენ ლაზური ნენა; ეშო მათქვენან მარა, ამკათა ნანანენა, ზორითენ მეკარბინუ მუმქჲუნი ვა რენ. ანდღანერი ნდღას, ნამთინი კოჩეფექ ლაზური ნენა, დუშმანი შინუფან ენთეფეში ნენა-კულტურიშა მედგინერი. მარა არ ნდღა მოთხასიონ დო ენთეფექთი ძირასუნონან ქი, დულჲა ეშო ვა რენ. ლაზური ნენა სთერი ნანანენაში ოსქიდუს გზა ვა მეჩაფს მითხანიში ნენათი რენ მჯიხიში თუდე. ამკათა მაზლუმური ნენაფეში მოშლეთინუ, აჲა ნენაფეში გამანთანერეფეში ხე-ოკოკლიმუთენ იყვენ დო მუთუ ვარ. ბექი დიდო ნენა მოგიხთასუნონან: “დიდო ნანანენაფე მაყვანში, ეკონარი კულტურული ხამფობა მაყვენ!”ეშო დომაწონენ მა.
ალი იჰსან აქსამაზი: დემირ ბეგი; მა დიდო შუქური გიწუმერთ. გინონან ნა, ვოჩოდინათ აჲა ინტერვიუ. თქვან ოთქვალუში ჩქვა მუთუ გიღუნან ნა, ეთი მიწვით, მუ იყვენ. ბერე-ბარი, მოთა კალა პანდა იხელით, დემირ ბეგი.
დემირ აქინი: ნანანენა ჩქინიში ოსქიდუ- ოსქედინუ შენი, ჩქინერკოჩეფე ჩქინი ოწოფხუში რენან აწინერიშენ ჩქვა მოხვა ალბონი. ედო ოშქარული ოჩალიშუს ოყოფიმუში რენან. უკულეთი ედებური ნოხვენეფე ოჭარუში ვორეთ. ჩქინ ჩქინებური ორჰან ქემალი ვა მიყონუნან, ჩქინთი ჩქინებური ორჰან ქემალი მაყვან; ჩქინ ჩქინებური ხასან ხუსეჲინი ვა მიყონუნან, ჩქინთი ჩქინებური ხასან ხუსეჲინი მაყვან! აჲა მუშენი გიწუმერთ, გიჩქინანი?! ჭარელი ედებიჲატი ვა მაყვანში, ვა იყვენ, ლაზური ნენას ვა ასქედინენ. “ჰო, ზათი ქომიღუნან,”-ჲა მიწუმერთ ნა, მათი ეშო გიწვათენ ემინდროს: უბაღინე რენ დო ეჲა კაიხეშა ომორდინუ, ხე-ოკოკლიმერი მორდინუ შენი ვა ვიჩალიშეფთ; ბერეფე ჩქინიშა ოგნაფუს გეჯგინერი ვა ვორეთ. ჩქინ ლაზური ნენაში ოსქიდუ-ოსქედინუშა იმენდი ქომიღუნ. აჲა სფეროს თქვანი სთერი ჭარელი ნოხვენეფე, ნა მეჩაფს ღირსონი კართა მაგოშაგორეს გურდოშურითენ შუქური ვუწუმერთ.
