მირჯან კაჲაქ ღარღალაფს

 “ბერეფეს ნანიფე ჩქინი ოგნაფუ მინონ!”

(გოწოთქვალა: ანდღნარი მუსაфირი ჩქიმი რენ მირჯან კაჲა. მირჯან კაჲა რენ ჩქინი ჩინობერი გემაბირეფეშენ ართერი. თქვან მთელიქ ემუ იჩინოფთ; გამიჩქვინერი ლაზური დო თურქული  მუზიკალური  ალბუმეფე ქუღუნ ემუს. “სერი, მწკუფი, კოლი დო სი” ჯოხონი გამიჩქვინერი არ ქეთაბითი ქუღუნ. ბიჲოგრაфი მუში, მუზიკალური ალბუმეფე მუში, ქეთაბი მუში დო კონსერეფე მუშიშენ ბღარღალით ჩქინ.  აჲა რენ ინტერვიუ ჩქინიში ტექსტი. ალი იჰსან აქსამაზი.  26 IX 2019)

+

ალი იჰსან აქსამაზი: მირჯან ხანუმ, თქვანთი გინონან ნა, ბიჲოგრაфი თქვანითენ გევოჭკათ! თქვან სო დიბადით, სო ჲეჩქინდით. ნამუ ნწოფულაფეს იგურით? სონური რეთ? აწი სო სქიდუთ? ნამუ ნენაფე გიჩქინან?

მირჯან კაჲა: გეჯგინობა!  მა დოვიბადი ნოღა ართვინის. ჩხორო წანერი ვორტიშაქის; დოლონიში დღალეფეს ნოღა ართვინიში შქაგურის გედგინერი ოხორი ჩქინის, დოლონიშ ჩოდინაფესთი ნოღა ართვინიში ჭიტა ნოღა ბორჩხაში გერმაშ ოფუტე ჩხალას ფსქიდი მა. (ოფუტე ჩქინიში აღანი ჯოხო რენ Фინდიქლი).  ბუნჯინაში დოლოხე ხელებერი ბერობა მაყუ. 

ვითო შქვით წანერი ვორტი, ბაბა დომიღურუ. ემორაშაქის დიდოფეთენ ოჯაღიში მთელი ბერეფეში გამანთანა- გურაფა შენი ყინორაში თუთაფეს ნოღა ისტანბოლის, მონჭინორაში თუთაფესთი ნოღა ართვინის არ სქიდალა მაყვეს. 

ნიშანთაშიშ კულანური ლისე შკულე, ჲილდიზიშ ტექნიკური უნივერსიტეტიში  ინშაატიშ მუხენდისობას  დოვიგური. ბოღაზიჩიშ უნივერსიტეტიში დიხაშკანკალაშ მუხენდისობას მასტერიში ნოჩალიშე დოპი. ეკულე ჟურ ბერე მაყუ.  ეკულეთი ჰემი ჟურ ბერეში ნანა, ჰემითი მამგურე ვორტი. ავრუპაშ კომისჲონიში ბურსითენ, იტალჲას პადოვაშ უნივერსიტეტის დო ისპანჲას კატალონჲაშ ტექნიკური უნივერსიტეტის როტასჲონონი მასტერიში ნოჩალიშე დოპი; თარიხური ნოხვენეფეში სტრუქტურული  ანალიზეფეში ჟინ ვიჩალიში. აწითი წოხლემხთიმუ დიხაშკანკალაშ ტეკნოლოჟეფეთენ გოწონჯღონერი არ იტალჲანური фირმაში მათემსილე ვორე. ედო ბინაფე დიხაშკანკალაფეში პატინობაშენ ოჩვალუში სფეროს აქტიურო ვიჩალიშეფ მა.

ალი იჰსან აქსამაზი: თქვან თურქული ბირაფაფეთი იბირთ. თქვან ლაზური ბირაფაფეთი იბირთ. თურქიჲესთი, გურჯისთანისთი მთელიქ გიჩინოფან.  ქიანაში მაჟურა დობადონაფეშენ კოჩეფექთი გიჩინოფან.  მოდერნური фორმითენ იბირთ ოტანტიური ბირაფაფე. მუნდეს გეოჭკით ობირუს?  მუნდეს გეოჭკით ლაზური ობირუს?

მირჯან კაჲა:  ქიანას იფთინერი დღაშენდონი, მუზიკი პანდა ჩქიმი კალა რტუ. ბეროლაშენდონი ვიბირტი მა. მუზიკი რენ სქიდალა ჩქიმიში უოკორთე ნოწილე; მა აშო მიჩქინ. დიდო-ნენონი დო დიდო-კულტურონი არ ლამთინალას  დოვიბადი დო ვირდი მა,  აჲა ხალიქ მუსიკალური ღარას პოზიტიური თესირი მოღოდუ. მორო, ოჯაღი ჩქიმიქ, ლამთინალა ჩქიმიქ, ჯოღრაфჲა ჩქიმიქ, კულტურულ- სოსჲალური კარაქტერი ჩქიმიქ, პაპუშპაპულეფეშენ მოგაფერი გენეტიკური ხალიქ მუზიკალური ღარაში ჲეჩქინდუს მემიშველუ დო მინჭუ.

ალი იჰსან აქსამაზი: გამიჩქვინერი დიდო ღირსონი მუზიკალური ალბუმეფე ქოგიღუნან. აჲა მუზიკალური ალბუმეფე თქვანიშენ მოლამიშინით, მუ იყვენ? მუზიკალური ალბუმეფე თქვანიში ჯოხოფეშენ მოლამიშინით! ედო მუნდეს გამიჩქვინუ აჲა ალბუმეფე თქვანი? რეპერტუარის მუკო ლაზური ბირაფა გიღუნან? თურქული დო ლაზური ბირაფაფეშენ მეტი, მაჟურა ნენაფეშენთი ბირაფაფე გიღუნანი რეპერტუარის ?

მირჯან კაჲა: იფთინერი მუზიკალური ალბუმი ჩქიმი რენ “ჩქინი ნანიფე”; ჩქიმი სუვერითენ ანადოლიში ნანიფე ვიბირ მა. აჲა მუზიკალური ალბუმითენ გევოჭკი მა. ბერეფე შენი რტუ აჲა ნოჩალიშე ჩქიმი. “მტვერი” ჯოხონს მაჟურანი მუზიკალური ალბუმი ჩქიმის. აჲა ალბუმის გეძინ ანადოლუ, ბოსნა დო გურჯისთანიშენ ადეთური ბირაფაფე. ჩქიმი სუვერითენ ვიბირ მა ანადოლუ, ბოსნა დო გურჯისთანიში ადეთური აჲა ბირაფაფე. მაჟურანი ალბუმი გამიჩქვინუ შკულე, მუზიკიშ ხვენიში შირქეთი პკიდი მა. თიჯარული ზმონა დო გაგნაფათენ ვარდო, ოხოშქვერო მუზიკა ოხვენუ შენი იკიდინუ აჲა შირქეთი. ემორაშენ ანდღაშაქის ალბუმეფე გამავიღი მა.  გამოჩქვუსთი მევაყონუფ.  “სალა” ჯოხონს მასუმანი ალბუმი ჩქიმის. მთელო ჩქიმი ბესთეფეშენ წოფხინერი რენ აჲა ალბუმი.

აჲა ალბუმი ჩქიმითენ, ჰემი თურქიჲეში, ჰემითი ქიანაში მუზიკიშ უსტატეფეს ვოგნაფი ნანანენა ჩქიმიში რენობა. ლაზური ნენა რენ ჩქიმი ნანანენა. წოხლეშენ უხვენერი არ დულჲა დოპი დო კულტურეფეშდოლოხენი მუზიკიში სუვერითენ ვიბირი ბესთეფე ჩქიმი. ემორაშაქის ლაზური ნენათენ უხვენერი არ დულჲა დოპი მა.

თურქიჲეში მილეთიქ, ჩქვა დობადონაფეში მილეთეფექთი აჲა ალბუმი უდოდგინუ ომცქვაფტეს. სკანდალური ამბარი მუში მილეთის ოგნაფუ შენი გზალეფე გორუ არ გაზეთაქ დო წოხლე  “არ ლაზიქ ჯაზითენ დობადონა კიდუფს” ჲადო პროვოკასჲონური ამბარეფე ოგნაფუ მილეთის. მურენქი გალენი ჟურნალისტეფექ ალბუმი ჩქიმი დიდო ომცქვაფტეს დო მათი ხვალა მუზიკიშა ხავესონი მუზისჲენი ვორტი. აჲა ჟურ სებებითენ, ეჲა გაზეთაქ ნეგატიური თავრი ქონაშქვუ ჲადო დომაწონენ. აჲა ალბუმის გეძინ ჟურ ლაზური ბირაფა.

“სალა” ჯოხონი ალბუმი შკულე,  “ნუმინოსუმი” ჯოხონი ალბუმი ჩქიმი გამიჩქვინუ. ეკულე ემორაფეს უდოდგინუ ფსიქოანალიზიშენ ამბარონი ქეთაბეფე დო რუმიში ნოჩალიშეფე ვიკითხუფტი მა. ემინდროს გამიჩქვინერეტე  “ნუმინოსუმი” ჯოხონი ალბუმი ჩქიმი. აჲა ალბუმი დოლიჭარინუ ინგილთერეში ნოღა ბრისტოლის. ყოროფელი აკორდეონიშ უსტატი ჩქინი მუამმერ ქეტენჯიოღლიქთი მაჟურა მუზისჲენეფე კალა ნუმხვაჯუ აჲა ალბუმის. აჲა ალბუმის გეძინ მთელო ჩქიმი ბესთეფე.

“ნუმინოსუმი” ჯოხონი ალბუმი ჩქიმი შკულე,   მთელო ლაზური ბირაფაფეშენ წოფხინერი  (ოუთIმ-ონჯე უფონ ა თიმე ინ მინგრელია) “არ ორაფეს სამარგალოს” ჯოხონი ალბუმი ჩქიმი ქოგამახთუ;  2008 წანას გამიჩქვინუ. მეხოლე სუმ წანაშ მორგვალის გურჯისთანი დო ჲულვა უჩამზოღაში მუხურეფეს არ ვარ, დიდო фარა გოფთი მა. ედო ლაზური, თურქული დო ინგლისური ქულლიჲათონი არ ბუკლეტითენ გამიჩქვინერეტუ აჲა ალბუმი. აჲა ალბუმითი მთელო დოლიჭარინერეტუ  ინგილთერეში ნოღა ბრისტოლის ლიმბო ჯოხონი  გრუბი კალა. არ კელე ალბუმიში დულჲაფე ვიქიფტი, მაჟურა კელეთი ბორჩხაში ოფუტეს ფიცარიში ოხორი ოხვენაფუ შენი ვიჩალიშეფტი მა. გიჩქინან, მა ოფუტე ჩხალას დოვიბადი. ედო პანდა ჩხალა ფთქუმერ მა. აწითი პაპუშპაპულეფეშენ გენომსქიდე დიხაფეშა ხავესობა ქომიღუნ. ედო ექ დობაღინე პლასმანი ოხვენუ შენითი უდოდგინუ შურდოგურითენ ვიჩალიშეფ.  მორო, აჲა პლასმანი ხვალა ფარათენ ვა ვიქიფ;   ბერეფეს კულტურული ანდერი ნუნჭიშინუთი, ენთეფეს  ბუჯინაში ყოროფა ნუნჭიშინუთი რენ დიდი პლასმანი. მა აშო მიჩქინ. კულანი ჩქიმის ჯოხონს სეტენაჲი. სეტენაჲიქ მასტერი იქიფს იტალჲაში ნოღა მილანოში უნივერსიტეტის. მონჭინორაში თადილის ოფუტე ჩქინის დო ნოღა ბათუმის ვორტით სეტენაჲი კალა. სქირი ჩქიმი დოქტორანტი რენ კანადას. ემუშენითი სქირი ჩქიმი ჩქინი კალა ვა რტუ აჲა თადილის. ბოლაქი არჩქვანერი წანაში თადილის ართო ვიყვათენ ჩქინ. ედო გურის ბუტკა მაყვასუნონ.

ეკულენი ალბუმეფე ჩქიმი ეშო რენ:  “იკსირი (ელიხირ)”, “ჭიტა (მინორ), “ნანნი”, “ იზმოჯე (ინსულა)”, “მჭითა გჲული”, “დოსთიბი (ჰუსჰ)” დო “ლოყა ნენონი  (სwეეთ თალქერ)”.

“იკსირი (ელიხირ)” ჯოხონი ალბუმი ჩქიმის გეძინ “მთვირიშ ხჩე” ჯოხონი фილიმიში მუზიკეფეთი.  აჲა фილიმიში მუზიკიშ გურინე, ენნი კაი фილიმიში მუზიკიშ ოჩუქარე ქომომჩერეტეს. გულთენ აკინიში შიირეფეში ჟინ თურქული მუზიკიში მოტიфე фლამენკოში მუზიკი დო ჯაზითენ  იჰარმანინენ.

“ჭიტა (მინორ)” ჯოხონი ალბუმი ჩქიმი წოფხინერი რენ დობადონა ჩქინიში მაჟურა ხალკეფეში ადეთური ბირაფაფეშენ. აჲა ალბუმის დობადონა ჩქინიში მაჟურა ხალკეფეშენ მაჟურა მუზისჲენეფექთი ნუმხვაჯეს.    აბაზური, აზერული, ბოშნაკური, ერმენური, გურჯული, ქურდული, ლადინურ- ისპანჲური, ლაზური, მარგალური, ზაზური ბირაფაფე გეძინ აჲა ალბუმის.

აჲა ალბუმი ჩქიმი შენი, (თრანს გოლაბალ Wორლდ მუსიჯ ჯჰართ-იში) გლობალური ქიანაშ მუზიკიში ლისტეში მაგედგინეფეშენ ქიანაშ მუზიკიშ შქაგურიქ (Wორლდ მუსიჯ ჯენთრალ-იქ) დოჭარერეტუ გინძე- გინძე ომცქუფე მსქვაშა. ედო აჲა ნოჭარათენ გურის ბუტკა გურის ბუტკა მაყვერეტუ.

არჩქვანერი ალბუმი ჩქიმი რენ “ნანნი”. აჲა ალბუმის გეძინ ლაზური ნანიფე. აჲა ალბუმიში ბირაფაფეში ტექსტეფე დო ბესთეფე რენ ჩქიმი ნოხვენე. აჲა ალბუმი დოლოპჭარერეტი ნანანოღა ლონდრას. ედო ინგილთერეშენ მუზისჲენეფე ალკიონა მიკიქ დო ივან ჰუსსეჲიქ პიჲანოთენ დო ჯონ ვაჲგინსიქთი გიტარითენ  მხუჯი ქომომჩეს. ლაზი ბერეფეს ნანიფე ჩქინი ოგნაფუ დო ლაზური ნენა ოსქედინუ მინონ მა. აჲა ზმონა დო გაგნაფათენ დოპი აჲა ალბუმი.

“ნანნი” ჯოხონი ალბუმი შკულე, მეხოლე ოთხო წანაშ მორგვალის ალბუმი ვა პი. 2014 წანა რტუ “იზმოჯე (ინსულა)” ჯოხონი ალბუმი დოპი. აჲა ალბუმი გამავოჩქი მა. ხოლო თურქიჲეში დო გალენი მუზიკიშ უსტატეფე ოკოვიბღით. აჲა რტუ ჩქიმი ინისიჲატიфი. ედო აჲა ნოდერითენ არ ალბუმი გამავოჩქვი მა. გლობალური ქიანაშ მუზიკიში ლისტეს ქამახთუ აჲა ალბუმი ჩქიმი. ჰოლლანდაშენ მარტინ ორნშტაინიქ კლარნეტითენ,  ინგილთერეშენ ალკიონა მიკიქ პიჲანოთენ დო ივან ჰუსსეჲიქ ჩელლოთენ,  ჰოლლანდაშენ მეჰმეთ ფოლათიქ უდითენ დო თურქიჲეშენ მერიჰ აშქინიქ გიტარითენ; პერკუსჲონის გურკან ოზკანიქ, ვოკალის (კულანი ჩქიმი სეტენაჲ კაიაქ) სკაიაქ მხუჯი მომჩაფან.

 “მჭითა გჲული” ჯოხონი ალბუმი დოპი მერიჰ აშქინი კალა. დიდილეფეშენ ანადოლიში ბირაფაფეს ვუსიმინტუ მა. ემუშენითი ეჲა ბირაფაფეშა გეგაფერი ვორტი. ანადოლიში აჲა მჯვეში ბირაბაფეშენ წოფხინერი რენ აჲა ალბუმი ჩქიმი. ჩქინი სუვერითენ ვიბირით აჲა ალბუმიში ეჲა ბირაბაფე.   ნარტუ კონარითენ,  სადე მუზიკალური ზმონა დო გაგნაფათენ დოპი აჲა ალბუმი. ედო ნანაფე ჩქინის მევუჩქინი ნოჩალიშე ჩქიმი. “დოსთიბი (ჰუსჰ)” ჯოხონი ალბუმი ჩქიმიში მაგზალობაში ამბარი რენ იფთინერო არმციქა ნახოში. მარა ნეგატიური ეჲა თეჯრუბექ აჲა ალბუმი ოხვენუს მემიშველუ დო კაინობა დო ხელა ქომომიღუ. ქიანაში ჩქვადოჩქვა ნენაფეშენ ნანიფე ვიბირი სუვერი ჩქიმითენ.  ქიანაში მისობას ომხვაჯუ შენი დოპი აჲა ალბუმი. ბერობაშენ დონი ჩქვადოჩქვა ნენაფეშა, ჩქვადოჩქვა კულტურეფეშა, ჩქვანერობაფეშა გონწკიმერი ვირდი დო ემუშენი.  ახირისთი ამკათა კოჩი იყვენ მოწყვალური, ტოლერანსული დო ყოროფათენ ჲოფშა არ დოხმელიპიჯი. მათი ეშო დოვიყვი. ქიანაში მისობაში თემელითი აშო იკაფეტანენ; მა აშო მიჩქინ დო ეშო ვორე, მუ პა! მისობაშა ხავესობა ქომიღუნ მა. მისობაში სერსი ვორე.

აჲა ალბუმეფეში დოლოხე “ჭინკა” ჯოხონი არ ჩქვა ალბუმი ჩქვა ქომიღუნ მა. ხვალა აჲა ალბუმი ჩქიმი რენ დიჟიტალური. აჲა ალბუმი ჩქიმის გეძინ ხვალა ლაზური დო მარგალური ბირაფაფე. კორობონი რენ აჲა ალბუმი. ალბუმის ჭინკა ჯოხონს, მარა მათი მჯოხონს ჭინკა. ჭინკა რენ ჩქიმი ძეგნე. მა ბერე ვორტიში, ნანა- ბაბა დო ოჯაღიში ჩქიმიში მაჟურა ხალკიქ ჯოხო გემოდვეს: ჭინკა! გიჩქინან, ჭინკა რენ მტკაშ ჯაზი.

 ჩოდინური ალბუმი ჩქიმის ჯოხონს “ლოყა ნენონი (სwეეთ თალქერ)”.  ანადოლუში იშველონი დო ჯირველონი ბირაფაფე გეძინ აჲა ალბუმის. მინიმალისტური არ სუვერითენ ვიბირი აჲა ალბუმიში ბირაფაფე მა. ელეკტრო ბაღლამა ოხმარუთენ დო ოჩქინუთენ დუგუნიშ სალონიში სერსი მეჩამუ მინტუ დო ემუშენი. ჯემ ვარვერენიქ გელაჩუ ელეკტრო ბაღლამა. კლარნეტითენ ხოლო მარტინ ორნშტაინიქ მხუჯი ქომომჩუ.  ივან ჰუსსეჲიქ ჩელლო გელაჩაფს. ისმეთ ქიზილი რენ პერკუსჲონის. კართა ალბუმი დო პერфორმანსი ჩქიმის მა ისმეთ ქიზილი კალა ვიჩალიში. გლობალური ქიანაშ მუზიკიში ლისტეში პანელისტეფეშენ ნევ ჲორკიში “მერგინ ართს”  ჯოხონი რადჲოქ ოგნაფუ; აჲა ალბუმი იყუ მაართანი ქიანაშ მუზიკიში ლისტეს ჲადო. ოთქვალუ დომაჭირს:  აჲა ალბუმიში გრაфიკური დიზაჲნი ყუ ყოროფელი კულანი ჩქიმი სეტენაჲ ეჯე კაჲაქ (სკაიაქ).  ყოროფელი კულანი ჩქიმი სკაიაქ “იზმოჯე (ინსულა)  ჯოხონი ალბუმიშენ დონი ჩქიმი კალა იჩალიშეფს დო პანდა მხუჯი მომჩაფს კართა ალბუმის. ყოროფელი კულანი ჩქიმი სეტენაჲ ეჯე სკაიათი მუზისჲენ რენ დო  “მპულაფე (ჯლოუდს)” ჯოხონი გამიჩქვინერი ალბუმი ქუღუნ.  სეტენაჲიქ გეჯგინობათენ დიმეზუნუ იტალჲაში ნოღა ბოლონჲაში მსქვა ხეშნოხვენეფეში აკადემიშენ. აწითი მასტერი იქიფს სეტენაჲიქ ნოღა მილანოში უნივერსიტეტის. სეტენაჲიქ პიჲანო გელაჩაფს, იბირს დო ბირაფაფე მუშიში ტექსეტეფეთი ჭარუფს.

ალი იჰსან აქსამაზი: გამიჩქვინერი არ ქეთაბი გიღუნან: “სერი, მწკუფი, კოლი დო სი”; გამაჩქვალე ჩივიჲაზილარიშენ ქოგამახთუ.  მუნდეს გამიჩქვინუ აჲა ქეთაბი თქვანი? აჲა ქეთაბი თქვანითენ მუ ამბარეფეშენ მოლაშინაფთ?

მირჯან კაჲა: მა აჲა ქეთაბი, რეალისტური არ ნენათენ პჭარი. ოში ბუტკათენ ოში წანაში ამბარეფე მეჩამუში გზას გებდგითი. ოფუტეს ვორტი. ოხორი ჩქიმის ვორტი ოფუტეს. ნანა ჩქიმი ჩქიმი კალა რტუ. ვითოხუთ დღაშ მორგვალის ნანა ჩქიმი კალა ვორტი ეჲა ოხორი ჩქიმის. გალენი ქიანაშენ მენდრა დოფხედით, ოკოფხედით. ვითოხუთ დღაშ მორგვალის ოკოფხედით. ნანა ჩქიმიქ მჯვეში ამბარეფეშენ მიღარღალერეტუ. აჲა ამბარეფე მუშითენ, ნანა ჩქიმი ჩქინაფერი ოხორჯა პწოფხი მა.  ემკათა მითი ვა რტუ მარა, ეჲა გონოშინეფე მუშითენ ნანა ჩქიმი ჩქინაფერი ოხორჯა პწოფხი. ნანა ჩქიმიში ეჲა გონოშინეფეთენ პჭარი ეჲა ქეთაბი ჩქიმი. ჭიტა რომანი რენ აჲა ქეთაბი ჩქიმი. ეშო მათქვენან.

ალი იჰსან აქსამაზ: მა ქომიჩქინ თქვან კონსერეფე მეჩაფთ მაჟურა დობადონაფესთი. აჲა კონსერეფე თქვანიშენთი მოლამიშინით, მუ იყვენ!

მირჯან კაჲა: მთინი გიწვათ; უდოდგინუ კონსერეფე ვა მეფჩაფ მა. ემკათა მუზისჲენი ვა ვორე. ემკათა მუზისჲენეფეშენ ვა ვორე. ხვალა მუზიკიშ პერфორმანსი მეჩამუთენ ვა მახვენენ; ემკათა მუზიკიშ გაგნაფა ვა მიღუნ დო ემუშენი. აჲა რენ ჩქიმი თერჯიხი. აჲა თერჯიხი ჩქიმი რენ კასითონი; აჲა გიჩქიტან! მუშენი ჲადო მკითხათში, ეშო მათქვენ მათი: მა ნამთინი კიმეტონი მუზისჲენეფე როლ-მოდელი ჩქიმი ფშინაფ. მენგაფერი კარარითენ, ქიანაში მაჟურა კიმეტონი ჩინოფერი მუზისჲენეფეთი მენგაფერი გზას გედგითერენან.  ენთეფეში ართერიში ჯოხო მოლაფშინა: კანადური პიჲანისტი გლენ გოულდი (1952-1982). ბერობა მუშიშენ დონი,  უმჭკუ სუვერი მუშითენ, ექსანტრიკური ხალი მუშითენ იკუნცხინეტუ. ედო ამკათა პიჲანისტი რტუ. ბუნჯინას, ოლანდეს დო ხვალა-  ხვალა გოხთიმუშენ გურის ბუტკა აყვეტუ გლენ გოულდის. არ მახეშნოხვენე შენი, ამკათა შეჲეფე უმეწკიმე დო დიდო ნორმალი რენ. ჩქიმი შენითი ეშო. 1964 წანა რტუ,  фელსეфური გაგნაფა დო ოჩქინუთენ  გონკვათუ დო გლენ გოულდიქ ქონაშქვერენ კონსერიშ პროგრამაფე. უდოდგინუ სახნეფეშა ეხთიმუ დო მილლეთის ტანი ოწირუ რენ კოჩიში ეგოშენ ჲეჩქინდერი არ ძაბუნობაშ ხალი ჲადო ისიმადეფტერენ გლენ გოულდიქ. ეკულეთი ხვალა სტუდჲოში დოლოჭარაფე ინჭილერენ დო რადჲოში პროგრამეფე ყვერენ გლენ გოულდიქ. ამკათა ზმონა დო გაგნაფაშა მათი ხავესობა ქომიღუნ. უდოდგინუ კონსერი ვა მეფჩაფ მა. მამგურო დულჲაფე ვიქიფ. Фილიმიში მუზიკეფე ვიქიფ. ტელევიზჲონიში პროგრამი ვიქიფ. ინშაატიშ მუხენდისეფეში ოდაში მუზიკალური გრუბიში გედგინუს დოვიყვი. ედო აწითი აჲა მუზიკალური გრუბიში დირექტორი ვორე მა.  ინშაათ’იშ  მუხენდისეფეშენ წოფხინერი რენ აჲა მუზიკალური გრუბი. ედო აჲა გურიბი კალა კონსერეფე მეფჩაფ არ წანას არ ვარნა ჟურ фარა. ექონი მილეთეფექ მა მიჭანდეს დო უსქუპის დო არნავუდისთანის კონსერეფე ქომეფჩი.

ალი იჰსან აქსამაზი: აღანი ალბუმი, ქეთაბი დო კონსერიშ პროჟეფე გიღუნანი? აღანი ფუქირონი ამბარეფე მომჩათენი ჩქინდა?

მირჯან კაჲა: მუზიკიქ რახატი ვა მომჩაფს. მათი მუზიკის რახატი ვა მეფჩაფს. ედო აჲა ხალი ქომიჩქინ დო უდოდგინუ აჲა ხალი ჩქიმი შენი ალლაჰის შუქური ვოღოდაფ. უდოდგინუ ალლაჰის ფხვამუფ მუზიკიში ყოროფა ჩქიმიშ გურინე. ჰემი თი-ჩქიმი, ჰემითი კულანი ჩქიმი სეტენაჲ (სკაია) შენი, მუსიკალური ნოჩალიშეფეს მევაყონამინონ მა. მარა საქინობა, ხვალანობა, ქამილობაშენ ჲეჩქინდერი არ გაგნაფა მუშებურა მიღუტაში, მუშებურა გამახთაში. მარა ჩქარორას ზორითენ ვარ. სქიდალა ზორი დო ხირსითენ ვა ისქიდინენ.

აღანი ბესთე ჩქიმი არ “სინგილითენ” გამავოჩქვამინონ დო ეშოთენთი 2019 წანა დომაჩოდასუნონ. ბესთეში ჯოხო ეშო რენ: “წოხლენერი სთერი სქანდა ვა მაყორეფენ”. ნანანოღა ლონდრაშენ მუზისჲენი მანებრაფე ჩქიმი ალსიონა მიკიქ პიჲანო დო ივან ჰუსსეჲიქ ჩელლო გელაჩუ. 28 წილვა 2019 თარიღიშენ დიჟიტალური მთელი მუზიკიშ სერვისეფექ ოგნაფასუნონ აჲა ნოჩალიშე ჩქიმი. ამაზონი აფფლე მუსიჯ, დეეზერ, სფოთიфჲ, თიდალ, ჲოუთუბე სთერი სერვისეფექ ოგნაფასუნონ აღანი ბირაფა ჩქიმი.

არ ჩქვა ქეთაბიშ ნოჩალიშე ჩქვა ქომიღუნ. მარა ოჩალიშუ დომაჭირს.  აჲა ქეთაბი ჩქიმი მუნდეს გამიჩქვინასუნონ, მთინითი ვა მიჩქინ მა. ორაში გაგნაფა გომინდინუ. ორაშენ ამბარი ვა მიღუნ აჩქვა. არ ორაშკულე, ქეთაბი ხაზირი იყვაში, ეჲა გამავოჩქვამინონ; ეშო დომაწონენ.

ეკონარი დიდო პროჟე ქომიღუნ მა, ოთქვალუთენ ვა იჩოდენ. მარა მთელი ოხვენუ შენი, სქიდალა ჩქიმი დობაღინე რენი? ვა დომაწონენ. 

ალი იჰსან აქსამაზი: დიდო შუქური გიწუმერთ მა. თქვან მსქვაშა ნენა გემიქთირით. თქვანთი გინონან ნა, აწი ვოჩოდინათ აჲა ინტერვიუ ჩქინი! ხოლოთი თქვან ოთქვალუში ჩქვა მუთუ ჩქვა გიღუნან ნა, ეთი მიწვით, მუ იყვენ! პანდა იხელით, ოში წანერი იყვათ, ცაშა ჲეხთათ!

მირჯან კაჲა: ნოჩალიშეფე ჩქიმის კიმეტი მეჩაფთ, ემუშენითი დიდო შუქური გიწუმერთ.

aksamaz@gmail.com

https://shangulishialiihsanaksamaz.blogspot.com/2019/12/mircan-kaya-konusuyor.html