Sovyeturi Abxazyaşen
Turkiyeşa Moxtimeri Lazepe
Andğaneri ndğas,
Lazepek skidunan omjore K̆avk̆asia do Yulva Uçazoğaşi dixapes, Gurcistani do
Turkiyes. Mara Lazepe mjora, tuta do muruʒxepe steri mcveşi renan. Rodosuri Ap̆oloniosik
Lazepeşi renoba, skidala, kiana, adetepeti ç̆arupt̆u. Majura Roma- Bizansuri
matarixepekti Lazepeşi ambarape meçapt̆es.
Giçkinan, Lazepe
magurbete renan. İrote gurbetişa ulurt̆es Osmanlişi Lazistanişen para
mogapuşeni. Oşi ʒ̆ana ekoleti, jur oşi ʒ̆ana ekoleti eşo rt̆u. Mara İst̆anbolişa
var, Mosk̆ovaşa, Soç̆işa, Tbilisişa, Gagraşa, Gudautaşa, Soxumişa, Oçamçireşa,
Anak̆liaşa do emusteri noğapeşa ulurt̆es. Didopeteti aʒ̆ineri Abxazyaşa ulurt̆es.
Çkin miçkinan, Lazepe pelaperi renan. İpti, baği- baxçes içalişapt̆es. Qona
ontxorupt̆es. Çai ʒ̆ilupt̆es. Tutumi ʒ̆ilupt̆es. Xili ʒ̆ilupt̆es. Vana ar ust̆aşi
yanis içalişapt̆es. Ar k̆ele dulya igurapt̆es majura k̆eleti para mogapt̆es. Ok̆uleti
aya ambari do paraten çkvadoçkva dulyape oxvenuşi gzalepe gorupt̆es do ikipt̆es.
Bazi Lazepek Soxumişi şkaguris skidurt̆u. Antepeşen bazepesti duk̆ani, mağaza,
oteli do emusteri yerepe uğut̆es do ticaretişi dulyape ikipt̆es. Bazi Lazepes
çamli do ç̆it̆a k̆aravi uğut̆es. Lazepek bere-bari k̆ala Gudauta, Soxumi,
Oçamçire steri noğapes do entepeşen xolos oput̆epes skidurt̆es. K̆ai skidala
uğut̆es. Abxazi, Megreli, Gurci, Rusi steri milletepeşen manžagerepeti,
megabrepeti uqount̆es.
Majura miletepe steri,
Lazepekti Rusul- Osmanuri cengepeşi derdepe zdipt̆es. Maartani didi cengişi
daçxiriten iç̆ves. 1917 ʒ̆anas, Rusyaşi Lazepek K̆unduraşi gektala, Gumaşi
gektala kožires. Abxazyaşi Lazepekti Menşevik̆epeti, Bolşevik̆epeti kožires.
Dido k̆ai dğalepeti kožires. İptineri ʒ̆anepes, Sovyet-Rusyaşi Lazepe dido
xelineri rt̆es. K̆olekt̆ivepeşa ak̆ates. Ağani Sovyeturi skidalas numxvaces.
Dulya uğut̆es, Lazuri mektebepe kuğut̆es. Lazuri kitabepe kuğut̆es. Lazuri
tiyatro kuğut̆es. Lazuri gazeta kuğut̆es do emuşeni.
Leninişi ğuraşk̆ule K̆omp̆art̆iaşi
doloxe “si-ma”, liderobaşi k̆abğa ižirinu. Amuten Sovyet-Rusyaşi mteli miletepek
zarari kožires. Mara Lazepe steri ç̆it̆a miletepeşi zarari majurapeşen dido monk̆a
rt̆u. Bazi Lazepe GULAGişa uçves. Bazi Lazepe cixas, kafesis komoloxunes. Bazi
Lazepeti doğurines. Lazuri mektebepeşi direkt̆ori İskender ʒ̆itaşiti doğurines.
Emutenti Lazuri nenaten skidala diçodu.
Aʒ̆i Lazepes Lazuri
mektebi var uğut̆es. Aʒ̆i Lazepes serbest̆oba var uğut̆es. Aʒ̆i Lazepes ç̆it̆a
ticareti oxvenuşa gza var meçapt̆es. Aʒ̆i Lazepek K̆omp̆art̆iaşi bazi uk̆itxu
do uqazu k̆oçepe do milisyapeşi zalimoba zdipt̆es. Didopete oç̆k̆omale var ažires.
Lazepes k̆aixeşa uçkit̆es, aya Leninişi gza va rt̆u. Lenini doğuru do mskva
dğalepe diçodu. Aya uçkit̆es. Amusteri derdepe na zdipt̆u bazi Lazepes Abxazyaşen
Turkiyeşa oxtimu unt̆es. Entepes uçkit̆es, Lenini do Ataturki k̆ai megabrepe t̆es.
Elbet Ataturkik Leninişi gurine entepes nuşvelasunt̆u, eşo uçkit̆es. Emuşeniti
Gudautaşen, Soxumişen, Oçamçireşen Batumişa oxtimu do Turkiyeşi dudk̆onsolosişa
kart̆ali meçamu do eyati ekolen Ataturkişa oncğonapuşi gzalepe gorupt̆es. Aya
dulya eşo cidaxi va rt̆u do didoti oşkurinoni rt̆u. Ayati k̆aixeşa uçkit̆es entepes.
(Ali İhsan Aksamazi, 12
Maisi 2011)
