5. უჯოხინუ მუსაфირი

5. უჯოხინუ მუსაфირი

- არ ნდღას დადი სქანი Фრანკфურტიშენ ნოღა მაჲენфელდიშა ქომეხთერეტუ!

- ჰო, ქომეხთერეტუ დადი ჩქიმი!

- ემედენითი პაპული სქანიში ფაცხაშა ქომეხთერეტუ!

- მთინი ზოპონ, ფაცხაშა ქომეხთერეტუ. პაპული ჩქიმი ფაცხას ვა რტუ. გერმაშა მენდახთერეტუ.

- მუშენი მენდახთერეტუ გერმაშა პაპული სქანი?

- დიშქა მომალუშა მენდახთერეტუ პაპული ჩქიმი.

- სი ფაცხას ხვალა რტი. ეშო ქომშუნს მა. ედო მუ იყუ?!

 - მთინი ქოქშუნს სი. ხილაфი ვა რენ. მა ფაცხას ხვალა ვორტი.

- მუშენი ქომეხთერეტუ დადი სქანი?

- ემედენი იხაზირი, მა სი ნოღა Фრანკфურტიშა  მენდაგიყონამინონ ჲა მიცვერეტუ დადი ჩქიმიქ.

- დიტიქ რახატი ეგიზდუ. მოთ ნოღა Фრანკфურტიშა მენდაგიყონასუნტუ დიტიქ?

- ჩქიმი შენი არ დულჲა ქოძირერენ ნოღა Фრანკфურტის. არ ხამფა კოჩიში კონაღის ტერენ ეჲა დულჲა.

- სი ჭიჭიტა ბერე რტი. მუ დულჲა გიღუტუ დიდი ნოღას?! სი ნოღა Фრანკфურტიშა ოხთიმუ გინტუი?

- ვარ, მა ნოღა Фრანკфურტიშა ოხთიმუ ჩქარ ვა მინტუ. მარა ემუქ დუბარათენ ქამომოღერდინუ. ონწელიში ბერე ვა ვორტი, მარა ენჯამი მათი ჭიჭიტა კულანი ვორტი. დუნჲაშენ ჩქარ ამბარი ვა მიღუტუ. კითხერი ვა ვორტი. ჯაჰილი ვორტი მა. ჰუქმი ვა მახვენუ! ბაში ვა მახვენუ დადი ჩქიმი კალა. ოფუტე ჩქიმიშ მეტა სოთხანიშენ ამბარი ვა მიღუტუ.  მა ოხთიმუ ვა მინტუ. დადი ჩქიმიქ აჲა ქოგნუ დო არშვაჯის მიბეჯღუ.

- დიტიქ მუ გიწუ? მუ მოლაგიშინუ ემუქ?

-  ხვალა არ დოლონი შენი ნოღა Фრანკфურტიშა მევულურთ ჲა მიწვერეტუ დადი ჩქიმიქ. ედო ოჯერონი მომიხთუ ნოთქვამე მუში. ენჯამი მა ჭიჭიტა ვორტი.  მიშა ომუდი პა?! სო გომდუნა?! ემუქ კიბირი მოწირუ. ედო და ხე მუშიშენ დუდი ჩქიმი ვა მომაშლეთინუ. ომტინუში გზათი ვა მიღუტუ. დადი ჩქიმის თოლიქ მუთუ ვა უძიროფტუ. მა მოჯერაფუ ემუქ.

- პაპუ სქანის აჲა დულჲაშენ ამბარი ვა უღუტუ! პაპული სქანი შენი ხელონი დულჲა ვა რტუ!

- ჰო, პაპუ ჩქიმის მუთუშენ ამბარი ვა უღუტუ.  

- ოკაჩხე მუ იყუ?!

- მა ზორითენ ოფუტეშა მენდემიყონუ დადი ჩქიმიქ. იფთი ჩქინ ოფუტე დორфლიშა ქოგეფთით. პაპაზეфენდიქ მა ქომძირერეტუ დადი ჩქიმი კალა ოფუტეს.  დადიქ ჩქიმიქ პაპაზეфენდის დუღარღალუ. ჩქიმი შენი მცუდი ნენაფე თქვერენ დადი ჩქიმიქ. პაპული მუშის ამბარი უღუნ ჲა უწვერენ პაპაზეфენდის დადი ჩქიმიქ.

-ოხორიშა გუიქთუში, პაპული სქანის მთელი შური გამუხთუ მონდო! კოჩის ტურა გური უტკვაცუ!

- მათი ეშო დომაწონუ.  ზავალი კოჩი! მა მგორასუნტუ დელი დევრიში სთერი!

- სითი ვა გაძირუ პაპული სქანი. ნესიბი ვა იყვერენ! დიტი ნოსი- თითხუ ოხორჯა ტერენ!

-ჰო, ვა მაძირუ პაპული ჩქიმი მათი. პაპული ჩქიმისთი ვა აძირუ მა!

- ოფუტე დორфლიშენ სო მენდახთით თქვან?

- ოფუტე დორфლიშენ არ фაჲტონის გეფხედით დო ნოღა მაჲენфელდიშა მენდაფტით.  მა фაჲტონის გემხედუ დადი ჩქიმიქ. ოკაჩხეთი სტაციაშა მენდაფთით. ექშენ თრენის გეფხედით დო ნოღა Фრანკфურტიშა მენდაფთით ჩქინ. ნოღა Фრანკфურტიშა გზა ვოქაჩაფტით თრენითენ. დიდო გინძე გზა რტუ. ეშო მომიხთუ ემინდროს!

- თრენიში მაგზალობა კაი გაწონუი?

- ჰო, თრენიში მაგზალობა კაი მაწონუ, მარა პაპული ჩქიმის მუთუშენ ამბარი ვა უღუტუ. ედო მა დიდო პათი მაწონუ.

- არ კელე კაი გაწონუ მაჟურა კელეთი პატი გაწონუ! იზმოჯეს ვორე დოგაწონუ სი!

- ჰო, არ კელე კაი მაწონუ მაჟურა კელეთი პატი მაწონუ! ხელეჯანითენ ტურა ბღურუტი. ოსიმადუქ ქემჭოფუ. ოსიმადუთენ ქაგომდუნი მა. მა მუ მაღოდუ, აჲა დულჲაშენ პაპული ჩქიმის ამბარი ვა უღუტუ. ფუფულონი მაყუ გურის. დადი ჩქიმიქთი არ ეშო, არ აშო გოქთერი ღარღალაფტუ უდოდგინუ- უდოჭკინდინუ.

- მზახალეფეთენთი კაპულა კაპეტი ვა გიღუტუ სი. უმითელი რტი!

- წორი ზოპონ, მზახალეფეთენ კაპულა კაპეტი ვა მიღუტუ მა. უმუთელი დო უმითელი ვორტი მა. თოლეფე მაფშუ მა!

-  ნოღა მაჲენфელდიშენ ნოღა Фრანკфურტიშა გზა გინძე რტუი?

- ჰო, დიდო გინძე რტუ. ეშო გომაშინენ აწი. მუკო გინძე რტუ, ეჲა ვა მიჩქინ აწი.

- ნოღა Фრანკфურტი მუჭოში გაწონუ? კაი გაწონუი?

- არ კელე კაი მაწონუ მაჟურა კელე კაი ვა მაწონუ!

-მოთ?!  მუშენი არ კელე კაი გაწონუ მაჟურა კელე კაი ვა გაწონუ?!

- პაპული ჩქიმიში ფაცხაშა გეგაფერი ვორტი. ოფუტე ჩქინიშა, დორфლიშა გეგაბერი ვორტი. ნოღა მაჲენфელდიშა გეგაფერი ვორტი მა. გალენი ნოღაფეშენ, გალენი კოჩეფეშენ ჩქარ ამბარი ვა მიღუტუ მა!

- დორფლის დო მაჲენфელდის ვა ნუნგაფტუ Фრანკфურტი! ეშო რტუი?! ოსიმადუს მეფჩი მა.

- ჰო! Фრანკфურტი დიდო დიდი ნოღა რტუ. ლიმანიში ნოღა რტუ. თიჯარეთიში შქაგური რტუ. Фინანსიში შქაგური რტუ. დიდო კოჩი სქიდუტუ ნოღას. სოქაღაფე კალაბალუღი რტუ. Фაჲტონეფე ქორტეს. გინძე დო მჩირე გზალეფე ქორტეს.  კაზონეფე ქორტეს. დორфლიში გზალეფე მწულე რტუ. მაღალი კალდურუმეფე ქორტეს ნოღა Фრანკურტის. დიდი ქვაში ბინაფე ქორტეს. დუქჲანეფე ქორტეს. მჩირე დო გინძე სოქაღეფე ქორტეს. ცხენონი პოლისეფე ქორტეს. ხალკი დიდო თელაშონი რტუ.  დიდო ჯალეფე ვა იძირეტეს სოქაღეფეს. ჩქიმი თოლითენ, არ დიდი კაфესი სთერი რტუ ნოღა Фრანქфურტი. Фაბრიკაფეში გელიკონიში სერსეფე ვოგნაფტი სუმ- ოთხო фარა არ ნდღას.

- სქანი შენი ნოღა Фრანქфურტი ნუნგაფტუ დიდი კაфესის! ეშოი?!

- ჰო, ეშო რტუ! მათი მოლოხუნერი კვინჩი ვორტი. პაპული ჩქიმი დო ფეტერი მენდრა ქომიყონუტუ. ოფუტე ჩქიმი მენდრა ქომიღუტუ დო ემუშენი. ართიმაჟურაშა მენდრა ვორტით.

- ნაქონი ოხორეფე ჩქვა მსქვა რტეს?!

- ოფუტეში ოხორეფე ჩქვა მსქვა რტეს.

- Фრანქфურტიში ოხორეფე მსქვა ვა რტესი?

-ვარ! არ დიდი ოხორიშ წოხლე მაჟურა ჩქვა დიდი ოხორი გოწუდგიტუ დო მუთუ ვარ. ოხორეფე იმსქვანენან კოჩიში ყოროფათენ. ნოღარეფექ ართიქართის სელამითი ვა მეჩაფტეს, ართიქართის ვა ყოროფტეს დო ემუშენი. ეშო ოხომაწონუ. ეშო მომიხთუ მა. ნცას მჟორა, თუთა დო მურუცხითი ვა იძირეტუ. აშო რტუ დიდი ნოღა! დიდი ნოღაში ხილაფეთი შურჲანი ვა რტეს. მცუდიში ვა გიწუმერ მა. ეშო რტუ!

- დიდი ნოღაში ხალიქ თოლეფე სქანი ვა გოხელერენ! დიდი ნოღაში მახორობა დიდო რენ. გონეფთი ემუშენი ეშო რენ!

- ვა მაჩქინენ მა. მარა ართიქართის ვა ნუშველტუ მილლეთიქ. ეშო მაჩქინუ. დიდო კალაბალუღი რტუ.

- სტაციაშენ სო მენდახთით?

-  ექშენ არ фაჲტონის გეფცხონტით. არ фაჲტონიქ ჩქინ მჩუმერტეს, ჭაკა- ჭუკა! არ მსქვა фაჲტონის გეფხედით დო არ ოხორიშა მენდაფთით.

- წოხლეშენ დიტიქ ეჲა კონაღიშენ ამბარი მექჩიი?

- ჭიჭა- ჭიტა ამბარი ქომომჩერეტუ ოხორიშენ დადი ჩქიმიქ.

- დიტიქ მუ გიწვერეტუ? მუ ამბარეფე მექჩერეტუ დიტიქ.

- კონაღიში მანჯე დიდო ხამფა რტერენ. დიდო ფარა ქუღუტერენ. ხოშ მა ფარაშენ ამბარი ვა მიღუტუ ემინდროს. ხეზმეთქჲარეფე ქუყონუტერენ ემ ხამფა კოჩის. დიდო ითიბარონი კოჩი ტერენ ნოღა Фრანკфურტის.  კონაღიში მანჯე გენჯი ტერენ. დიდო მსქვა ტერენ. მარა ჩილი ვა უყონუტერენ. არ კულანი ბერე უყონუტერენ კოჩის. ამკათა ამბარაფე მომჩერეტუ დადი ჩქიმიქ.

- ჩქვა მუთუ ვა გიწუი? სი მუ მექშვენტუ დიტიქ?

- მა მუ მემშვენტუ დადი ჩქიმიქ?! მილლეთიშა რეზილი მო მწიფხუფ ჲა მიწუ დადი ჩქიმიქ. მა მუთუ ვა ოხომაწონუ ეჲა ნოთქვამე მუშიშენ.

- აჯაებიშა მოგიხთუი?! ნოსი ქოდოლოგოქუნუ!

- ჰო!  ნოსი ქოდოლომოქუნუ დადი ჩქიმიქ. მორო მუ, აჯაებიშა მომიხთუ. პაპული ჩქიმიშენ ამბარი ვა მიღუტუ. ემუსთი ჩქიმდენ ამბარი ვა უღუტუ.

-ართიქართიშენ უამბერე რტით! გურიშ მეჭვონი დულჲა რენ. ქარტალი ვა რენ. ტილიфონი ვა რენ ემინდროს! მობილური ტილიфონი ვა რენ. ინტერნეტიში მოსა ვა რენ! სიბერული მუთუ ვა რენ!

-საღი- ღურაში ამბარი ვა მიღუტეს ართიქართიშენ. ალლაჰის ვოხვეწაფტი მა.

-ჭაკა- ჭუკა фაჲტონიშენ ქაგეხთით. ოკაჩხე მუ იყუ.

- ოხორი დიდო დიდი რტუ დო არ დიდითი ავლი ქუღუტუ. არ დიდი ტიქშარი ქუღუტუ ავლის. არ- ჟურთი ნჯა ქობძირი ავლის დო მუთუ ვარ! ნეკნა დიდო დიდი დო მოზდიმერი რტუ. ჩქარ მუთუ დო მითი ვა იძირეტუ.

aksamaz@gmail.com

https://shangulishialiihsanaksamaz.blogspot.com/2019/10/2-2-papulisi-paxa.html

https://shangulishialiihsanaksamaz.blogspot.com/2019/10/1-1-haidisi-ocagi-1-heidinin-ailesi.html

https://shangulishialiihsanaksamaz.blogspot.com/2019/10/yohanna-spirisi-haidisi-skidalasen.html

https://shangulishialiihsanaksamaz.blogspot.com/2019/10/2-2-papulisi-paxa.html

https://shangulishialiihsanaksamaz.blogspot.com/2019/10/1-1-haidisi-ocagi-1-heidinin-ailesi.html

https://shangulishialiihsanaksamaz.blogspot.com/2019/10/yohanna-spirisi-haidisi-skidalasen.html

https://shangulishialiihsanaksamaz.blogspot.com/2019/10/4-papazefendi-do-mamgurapalesi-mokitxa.html