“გაზეთა ნოღა თიშენ კუდელიშა ლაზური გამავიღით !”

 

 “გაზეთა ნოღა თიშენ კუდელიშა ლაზური გამავიღით !”

 

(გოწოთქვალა: ანდღანერი მუსაჶირი ჩქიმი რენ მურატ კარადენიზი. მურატ კარადენიზი წოხლეშენ  ჩქიმი მამგურე რტუ ინგლისური ნენაში კურსიშენ; აჲა რტუ 2009 წანას, აწი ეშო ქომშუნს.  უკულე ხოლო მამგურე დომაყუ ლაზური ნენაში კურსის, ქადიქოჲ "აქა-დერ"-ის, "ლაზური მექთები"-ს; აჲა რტუ 2012 წანას. 2010 წანაში იგრიკა ვარნა მაისი რტუ; მურატ კარადენიზითი, მანთი მამგურე დოვიყვით ართნერი კლასის; "გკმ"-ს (ქორთული კულტურული ცენტრის); ჭიტა- ჭიტა გურჯული/ ქორთული ნენა ვიგურაფტით; მანანა გურგენიძე რტუ მამგურაფალე ჩქინი. უკულეთი გზამშინე დომაყუ ლაზური ნენაში ოსქედინუში გზას; სუმ ქეთაბი ჩქიმიში გამაჩქვალუს შურდოგურითენ მემიშველუ ტექნიკური დულჲაფეს. "ლაზეფე- ლაზური/ ლაზური მინობა" დო "... ლაზეფე" ჯოხონი ქეთაბეფე ჩქიმიში რედაქსიჲონის, "ლაზური ნენაში გეჭკაფული დერსეფე" ჯოხონი ქეთაბი ჩქიმიში მიზანპაჟი დო სურეთეფეში ოძირამუს გრაჶიკერი მანებრა მუშიში ხეთენ მემიშველუ; ჩქიმი კალა ინტერვიუფე დოყუ, ეჲა ინტერვიუფე "ნოღა ტვ"-შენ გამოგნაფუ მურატ კარადეენიზიქ. 7 მბულორა 2015 წანაში გოშოცხუნას ნოღა ისტანბოლიში  2-ანი ნოწილეშენ დუდ- მოშლეთინერი მებუსობაში ნამზეთი (დეპუტატობაში კანდიდათი) ვორტი. "გაზეთა ნოღა"-შენ კანდიდატობა ჩქიმიში ამბაი გამოგნაფუ, მხუჯი ქომომჩუ; ხარმალობა ჩქიმიში ამბაითი ისმაილ ავჯი ბუჯაკლიში მაკალეთენ ხოლო "გაზეთა ნოღა"-შენ დოსტეფეს გამოგნაფერენ მურატ კარადენიზიქ. ამკათა მსქვა ჯუმაკოჩი რენ მურატ კარადეენიზი. თი- მუში უდოდგინუ ოაღანაფს, ოკულენი ნოხვენე მუში წოხლენი ნოხვენეფე მუშიშენ პანდა ჩქვა მსქვა რენ. არ კელე კაიხეშა იგურაფს, მაჟურა კელეთი ნოხვენეფე მუშითენ მაჟურაფეს მსქვაშა დოგურაფს. მურატ კარადენიზი აშო მიჩქინ მა. მურატ კარადენიზი კალა მკულე ინტერვიუ დოპი. ბიჲოგრაჶი მუშიშენ დო კულტურული ნოჩალიშეფე მუშიშენ ბღარღალით. 18 II 2022/ ალი იჰსან აქსამაზი)

+

ალი იჰსან აქსამაზი: წოხლე თი-თქვანიშენ მოლამიშინით, მუ იყვენ! სონური რეთ? სო დიბადით? აწი სო სქიდუთ? ნამუ ნწოფულაფეს სო დო მუნდეს იგურით? ნამუ ნენაფე გიჩქინან?

მურატ კარადენიზი:  რიზე- ათინური ვორე. ათინას დოვიბადი. ილქმექთები ოფუტე ჩქიმის დოვიგური. ორთამექთები დო ლისე მპოლის დოვიგური. მესლეღიში ლისეს კომპიუთერი დოვიგური. ანდღანერი ნდღას მპოლის ფსქიდურ. დოხმელი შირკეთის ვიჩალიშეფ. ლაზური, ქორთული დო ინგლისური კაიხეშა ვა მაღარღალენ მარა ოხომაწონენ.

 ალი იჰსან აქსამაზი: არ ინტერნეტ -გაზეთაში ედიტორი რეთ. “გაზეთა ნოღა”-ში ედიტორი რეთ. “გაზეთა ნოღა” ფდჶ-ში ჶორმატითენ გამიჩქვინენ ინტერნეტ- მოსას. “ნოღა”-ს თურქული მუ უწუმენან?  “გაზეთა ნოღა” თიშენ კუდელიშა ლაზური რენ. იფთი მუნდეს გამიჩქვინუ აჲა გაზეთა, “გაზეთა ნოღა”?  “გაზეთა ნოღა”-ში ილქინერი ნომერა მუნდეს გამიჩქვინუ? “გაზეთა ნოღა” მუკო ბუტკა გამიჩქვინეტუ? მუ ნოღირათენ “გაზეთა ნოღა”-ში გზას გედგითით?  დიდოფეთენ მუფერი ჭარალეფე გამიჩქვინენ გაზეთა “ნოღა”-ს?

მურატ კარადენიზი:  ნოღა, თურქული “ქასაბა”-ს უწუმენან. “გაზეთა ნოღა” ინტერნეტის გამავიღით 2014 წანას; დიდოფეთენ ოვრო ბუტკა დო თიშენ კუდელიშა ლაზური რტუ, ეშო ფხაზირით. ვით ბუტკათი გამიჩქვინუ. ლაზური დიდოფეთენ ოღარღალუში ნენა რენ, ოჭარუში ადეთი დიდო ვა რენ. “გაზეთა ნოღა”-თენ ლაზური ოჭარუს ომხვაჯუ მინტეს. “გაზეთა ნოღა” არ თუთას არ ჶარა გამავიღით. თუთაში ბაზი ამბეეფე ლაზური გამავიღით.

ალი იჰსან აქსამაზი: თქვან ჲუტუბერითი რეთ. ჲუტუბის ჟურ გოჩქვანერი ბუტკა ქოგიღუნან: “ნოღა ტვ” დო “ლაზური მჟორა ტვ”. “მჟორა”-ს თურქული მუ უწუმენან?  “ნოღა ტვ” დო “ლაზური მჟორა ტვ”-ში გზას მუნდეს გედგითით? “ნოღა ტვ”-ს დიდოფეთენ მუფერი პროგრამაფე გამიჩქვინენ? “ლაზური მჟორა ტვ”-ს დიდოფეთენ მუფერი პროგრამაფე გამიჩქვინენ? 

მურატ კარადენიზი:  "ნოღა ტვ" გომწკი 2015 წანას; აწიშა სუმენეჩიდოჟურ (62)  ვიდეო ფხაზირი დო გამავიღი. მჟორა, თურქული “გუნეშ”-ის უწუმენან. “ლაზური მჟორა ტვ”, პანდემიში  ორას გომწკი. პანდემიში გურიშენი დიდოფეთენ ოხორის დოდგითუშა მეჯბური ვორტი, ხემბოში ვა დოფხედი დო “ლაზური მჟორა ტვ” კალა  ვიბოდერ. აჲა კანალი, “ლაზური მჟორა ტვ”  გომწკი 2020 წანაში წანაღანის. “ნოღა ტვ”-ს ლაზური- თურქული რეპორტეჟეფე გამავიღით. “ლაზური მჟორა ტვ” რენ მუსიკაში კანალი.  ლაზური- თურქული ბირაფა დო შიირიში ვიდეოფე გამავიღაფ. ჲუტუბის დობაღინე ლაზური ვიდეოფე ვა რტუ, აჲა დორკინობა ქობძირი. აჲა დორკინობაში მოტივასჲონითენ “ნოღა ტვ” დო “ლაზური მჟორა ტვ” გომწკი.

ალი იჰსან აქსამაზი: “გაზეთა ნოღა”, “ნოღა ტვ” დო “ლაზური მჟორა ტვ” აწიშა მიში ჶინანსური ომხვაჯუთენ გამიჩქვინუ, გამიჩქვინენ? “გაზეთა ნოღა”, “ნოღა ტვ” დო “ლაზური მჟორა ტვ” ნამუ ჶონითენ გამიჩქვინუ, გამიჩვინენ?

მურატ კარადენიზი: “გაზეთა ნოღა”, “ნოღა ტვ” დო “ლაზური მჟორა ტვ” შენი ჩქარ მითის ჶინანსური ომხვაჯუ ვა ვაკვანდი. “გაზეთა ნოღა”, “ნოღა ტვ” დო “ლაზური მჟორა ტვ” თი- ჩქიმიში ჩქინაფა დო ჶინანსური მენჯელითენ გამავიღი. ბერობაშენ არ მანებრა ჩქიმი გრაჶიკერი რტუ. ტექნიკური დულჲაფეს ემუქ მემიშველუ.

ალი იჰსან აქსამაზი: "გაზეთა ნოღა", არ ჶონიშენ მოხთიმერი ფარათენ ვაგამიჩქვინუ, ხვალა ჩქიმი ჶინანსური მენჯელითენ დო გრაჶიკერი მანებრა ჩქიმიში ტექნიკური მეშველაფათენ გამიჩქკვინუ, აჲა თქუმერთ. "გაზეთა ნოღა", ამუშ გალე კოლმანური ნოჩალიშე რტუ. ეშო ქომიჩქინ. გაზეთაში მჭარუფე მიეფე რტეს? "გაზეთა ნოღა"-ს მიეფექ ემეღი მეჩეს?

მურატ კარადენიზი: ჰო, ჩქიმი ჶინანსური მენჯელითენ გამიჩქვინუ "გაზეთა ნოღა". ჩქარ მითის ფარა ვა ვაკვანდი, მჭარუფე ჩქინისთი ფარა ვა მეფჩი.  ვილდან ლოკუმჯიქ, მუჰამმედ თუნჩსანიქ, მურატ კარადენიზიქ, სუათ ოზჲამანიქ, მურატ მუთინაშიქ, ალი იჰსან აქსამაზიქ, ისმაილ ბუჯაკლიშიქ მაკალეფე მუთეფეშითენ, ემეღეფე მუთეფეშითენ "გაზეთა ნოღა"-ს ნუმხვაჯეს.

ალი იჰსან აქსამაზი: პანდემიში, კორონავირუსიში ნდღალეფეს ვორეთ. ამდღალეფეს მუეფე იქიფთ? აღანი ამბარეფე გიღუნანი? ჩქინდა ფუქირონი ამბარეფე გიღუნანი?

მურატ კარადენიზი: პანდემიში ნდღაფესთი  “ლაზური მჟორა ტვ” შენი ვიდეოფე ფხაზიროფ. აწიშა ოშიდოოთხონეჩიდოვიტოოთხო (194)  ვიდეო ფხაზირი დო გამავიღი.

ალი იჰსან აქსამაზი: აჲა ინტერვიუ შენი თქვან შუქური გოღოდაფთ. ჩქვა კითხალა ვა მიღუნ თქვანდა.  აწი აკონარი დომიბაღუნან. მარა თქვან ოთქვალუში ჩქვა ნენაფე გიღუნანნა, ენთეფე მიწვით მუ იყვენ! ფიმფილი დიხაშა!

მურატ კარადენიზი:  აჲა შანსი ნამომჩით შენი მათი შუქური გოღოდაფთ.

aksamaz@gmail.om

 

https://sonhaber.ch/murat-karadeniz-gazete-nogayi-tamamen-lazca-yayinladik/

http://www.circassiancenter.com/tr/murat-karadeniz-ile-soylesi/