“აკადემისჲენეფე შენითი ფელაფერი ქეთაბეფე ჲევოჩქინდი!”
(გოწოთქვალა: ანდღანერი მუსაჶირი ჩქიმი რენ ოზჰან ოზთურქი. ოზჰან ოზთურქი რენ დობადონა ჩქინიში კაპეტი გამანთანერეფეშენ ართერი; კიბირიშ ჰექიმი. გამიჩქვინერი დიდო მეთიმონი ქეთაბეფეთი ქუღუნ. მა მუში კალა არ ინტერვიუ დოპი; ბიჲოგრაჶი დო გამიჩქვინერი ქეთაბეფე მუშიშენ მოლაფშინით. აჲა ტექსტი რენ ოკოღარღალუ ჩქინიში. ალი იჰსან აქსამაზი; 09 III
2020)
+
ალი იჰსან აქსამაზი: ოზჰან ბეგი, წოხლე ბიჲოგრაჶი თქვანიშენ ბღარღალათ დო ეშო გევოჭკათ! სო დო მუნდეს დიბადით, სო დო მუნდეს ჲეჩქინდით? ნამუ ნწოფულაფეს იგურით? ჩილერი რეთი? ბერეფე გიყოუნანი? აწი სო იჩალიშეფთ? ნამუ ნენაფე გიჩქინან? დუდი თქვანიშენ მოლამიშინით, მუ იყვენ!
ოზჰან ოზთურქი: წოხლენურო სელამი გიწუმერთ! შქვით წიპაშენ უჩამზოღალური ოჯაღიში სქირი ვორე მა; ნოღა ისტანბოლის ჲეფჩქინდი დო მთელი გურაფა- გამანთანაში სქიდალა ჩქიმითი ართნერი ნოღას მეკოვოლაფი. ონჭელონი რენ, ჲედექსუბაჲობაში ნწოფულაში იმთიანეფესთი მაღალი დერეჯეფე მაყუ დო ასქერობათი აქ ვოჩოდინი მა. წოხლე თიბბური ჶაკულტეტის დოვიგური, მარა არმციქა ორაშკულე ეჲა ჶაკულტეტი მევაშქვი. ედო კიბირიშ ჰექიმობაში ჶაკულტეტის დოვიგური, ასთახოლო კოჩი ოყოფიმუ დო ფარა მოგაფუ მინტუ დო ემუშენი. (1991) ვიტონ ჩხორო ოში დო ოთხო ნეჩი დო ვიტო არ წანასთი დოვიმეზუნი კიბირიშ ჰექიმობაში ჶაკულტეტიშენ. ანდდღანერი ნდღასთი, ფარა მოგაფუ დო ოჯაღი ჩქიმი ოსქედინუ შენი კიბირიშ ჰექიმობა ვიქიფ ნოღა ისტანბოლის.
არ კოჩის ნენანენა მუშითი მთელო კაიხეშა ვა აჩქინენ. აჲა დულჲაში ანქსი ოთქვალუ რენ დიდი ჯურეთქჲარობა. ხოშ თქვანთი ლინგვისტი რეთ დო აჲა დულჲაშენ მსქვაშა ამბარი ქოგიღუნან. ემუშენითი მა ამკათა ჯურეთქჲარობაშა თოლი ვა მიღუნ, თქვანთი აჲა აშო გიჩქიტან. მა ვორტი მამგურე ბრიტანჲაში კონსულიში ნენაში კურსის დო დოვიგური ინგლისური ნენა გინძე წანაფეშ მორგვალის. ემუშეთი ინგლისური ნენა ქომიჩქინ, აშო მათქვენ მა, ეშო დომაწონენ. ეშო- აშო კართა წანას, გოხთიმუ დო გოშოგორუ შენი მა მევულურ იტალჲა დო ჲუნანისთანიშა. ემუშენითი იტალჲა დო ჲუნანისთანიში ნენაფეთი ქომიჩქინ. გარსონეფე კალა ჭიტა- ჭიტა ოღარღალუშენ ჩქვა დიდო ქომიჩქინ იტალჲანური დო ჲუნანური ნენაფე. ბერობა ჩქიმის ნანა ჩქიმიში დო მზახელეფე ჩქიმიში ოღარღალუ ოგნუთენ ლაზური ნენაშენ, უკაჩხენი წანაფესთი არმციქათი ობოდუთენ მუხური ჩქინიში ნენაფეშენ, ტამტრაში ურუმური ნენა სთერი ნენაფეშენ დობაღინე ამბარი მიღუნ; აშო მათქვენ მა.
ალი იჰსან აქსამაზი: თქვანთი გინონან ნა, აწითი ქეთაბეფე თქვანიშენ მოლაფშინათ! გამიჩქვინერი ოთხო ქეთაბი გიღუნან; მა ეშო ქომიჩქინ: “ქიანაშ მითოლოჟი”, “ჶოლკლორი დო მითოლოჟიში ნენაფუნა”, “უჩამზოღაში ანსიკლოპედიური ნენაფუნა” დო “პონტუსი (უჩამზოღაში ეთნიკური დო პოლიტიკური თარიხი ანტიკური ორაშენ ანდღაშა)”. “ქიანაშ მითოლოჟი” ჯოხონი” ნოჩალიშე თქვანი მუნდეს დო ნამუ გამაჩქვალეშენ გამახთერეტუ? აჲა ქეთაბი თქვანითენ მუ ამბარეფე მომჩაფთ?
ოზჰან ოზთურქი: უნივერსიტეტის მამგურე ვორტი, ემინდროს დიდოფეთენ ჶოლკლორი, მითოლოჟი დო მჯვეში თარიხი მონჭელტუ. ედო უჩოდინე იშთახითენთი მა იროთე ვიკითხუფტი, მარა ემინდროს ქეთაბი ოჭარუშა ჩქარ თოლი ვა მიღუტუ.
(1990-ონი) ვიტონ ჩხორო ოში დო ოთხო ნეჩი დო ვიტონი წანეფე რტუ, უჩამზოღა ვინჭელი შურდოგურითენ. იფთინერი რტუ ნენა დო კულტური, მაჟურა თარიხიშენ ამბარონი. “უჩამზოღაში ანსიკლოპედიური ნენაფუნა”, აჲა ქეთაბი ქოგამახთუ (2005) ჟურ ვიტოში დო ხუთ წანას. პონტუსი ჯოხონი ქეთაბი ჩქიმი გამავიღი (2011) ჟურ ვიტოში დო ვიტოარ წანას. მჯვეში ორაფეშენ დონი ჶოლკლორი დო მითოლოჟი ვინჭელთი, აჲა სფეროშენ ნოჩალიშეფე ჩქიმითი “ჶოლკლორი დო მითოლოჟიში ნენაფუნა” ჯოხოთენ (2009 წანას) დო “ქიანაშ მითოლოჟი” ჯოხოთენ (2016 წანას) გამავიღი. “პონტუსი” ჯოხონი ქეთაბი ჩქიმი რენ თარიხიშენ ამბარონი. მაჟურა სუმითი რენ ნენაფუნაში ჶორმატის. ემუშენითი მა დიდოფეთენ ლექსიკოგრაჶი მშინაფს მილეთიქ. ქეთაბეფე ჩქიმი ქოგამახთუ ჩქვადოჩქვა გამაჩქვალეფეშენ, მარა აჲა ჩქვანერობაში სებები მა ვა ვორე, მთელო თესადუჶი რენ.
შუმერული, ხითთითური, ბაბილონიში დო მჯვეში მისირული მედენიჲეთეფეშენ ჲუნანი, რომა დო ოჩილდრე ავრუპაშა; ბრიტანჲაში კუნწულაფეშენ პასიჶიკიში კუნწულაფეშა; მენდრაჲულვაში ხალკეფეშენ ესკიმოფეშა; აჶრიკაშენ ოჩილდრე დო ომჟორე ამერიკაშა, ქიანაში ჩქვადოჩქვა კულტურეფეში მითოლოჟეფენ მადდე-მადდე ამბარეფე ქომეფჩი დო ეშო ჲეჩქინდუ “ქიანაშ მითოლოჟი” ჯოხონი” ქეთაბი ჩქიმი. დიდო წანაფე წოხლე აჲა ქითაბი ჩქიმი პჭარუფტი, ემინდროს აწინერი სთერი აკო მენგაფერი ნოჩალიშე ვა რტ უ პიჲასას. ჩქვა მთინი გიწვათ; მაჟურა ნენაფეშენ თურქულიშა გოქთირელი აკო ქეთაბი ვა რტ უ ემინდროს. ხოლოთი უნოქსანე დო აკადემისჲენეფე შენითი ფელაფერი არ ქეთაბი ჲოჩქინდუში გზას გებდგითი მა.
ალი იჰსან აქსამაზი: მაჟურა ქეთაბი თქვანი რენ “ჶოლკლორი დო მითოლოჟიში ნენაფუნა”. აჲა ქეთაბი თქვანი მუნდეს დო ნამუ გამაჩქვალეშენ გამახთუ; მუ ამბარეფეშენ მოლამიშინაფთ?
ოზჰან ოზთურქი: 2009 წანას “ჶოლკლორი დო მითოლოჟიში ნენაფუნა” ჯოხონი ნოჩალიშე ჩქიმი გამავოჩქვერეტ ი “ქიანაშ მითოლოჟი” ჯოხონი ნოჩალიშე ჩქიმიშენ შქვით წანა წოხლე ნანანოღა ანკარას. ედო ეჲა ნოჩალიშე ჩქიმიქ ჶოლკლორი დო დინიშენ ამბარეფე მეჩაფტუ. ეჲა ქეთაბიშენ ართერითი ხეს ვა დოსქიდუ დო “ნადირი ქეთაბი” ჲადო ინტერნეტიში საიტეფეშენ დიდო ფახალი ფასითენ ხოლოთი გამიჩინენ. მაჟურა ქეთაბეფე ჩქიმი, ჩქვა დიდო რეჶერანსო იხმარინუ მაგოშოგორეფეშკელენ.
ალი იჰსან აქსამაზი: მასუმანი ქეთაბი თქვანის ჯოხონს “უჩამზოღაში ანსიკლოპედიური ნენაფუნა”. ქეთაბი თქვანი მუნდეს გამიჩქვინუ? ქეთაბი თქვანი ნამუ გამაჩქვალეშენ გამიჩქვინუ? ნამუ ამბარეფე მომჩაფთ თქვან?
ოზჰან ოზთურქი: ჟურ ტომონი “უჩამზოღაში ანსიკლოპედიური ნენაფუნა” რტუ მაართანი ქეთაბი ჩქიმი. არ ჩქვა გამაჩქვალეს აჲა ქეთაბი ჩქიმი შურდოგრითენ გამუღუ უნტუ, მარა მა ქეთაბი ჩქიმი აღანი გედგინერი არ გამაჩქვალეში მანჯეს, მანებრა ჩქიმის მეფჩერეტი, ემუს გამიჩქვინერი მაართანი ქეთაბი იყვას ჲადო. უჩამზოღაში თურქულის ხმარელი მუხურული ტერიმი დო ნოთქვალეფეშენ მუხურიში ტოპონომეფეშა ჰემი კორობერი დო ჰემითი ეტიმოლოჟიური დოლორენა უღუნ ეჲა ქეთაბი ჩქიმის..
ალი იჰსან აქსამაზი: მაჟურა ქეთაბი თქვანი რენ პონტუსი (უჩამზოღაში ეთნიკური დო პოლიტიკური თარიხი ანტიკური ორაშენ ანდღაშა). აჲა ქეთაბი თქვანი ნამუ გამაჩქვალეშენ მუნდეს გამახთუ? ნამუ ამბარეფეშენ მოლაშინაფთ?
ოზჰან ოზთურქი: აჲა ქეთაბი ვა რენ ნენაფუნაში ჶორმათი’ს, თარიხიში ქეთაბო პწოფხი. “პონტუსი” ჯოხონი ქეთაბი ჩქიმითენ ხვალა თურქიჲეში უჩამზოღაში მუხურიში თარიხიშენ ვარდო, დუდარი ღარაფეთენ ანტიკური ორაფეშენ ანდღანერი ნდღაშა კირიმიშენ ბულგარისთანიშა, კაჶკასჲაშენ პაჶლაგონჲაშა მთელი უჩამზოღაში გომორგვაში თარიხი მეჩამუში გზას გებდგითი მა. 2009 წანას, 2011 წანას დო 2016 წანას; სუმ ჶარა გამიჩქვინუ აჲა ქეთაბი ჩქიმი. აჲა ქეთაბიში 3-ა კოროცხას ქუღუნ მეხოლე 30 ბუტკალონი აღანი ამბარეფე. აღანი არქეოლოჟიური ამბარეფეშენთი, დიდოფეთენთი კირიმის დო მუში გომორგვას ჲეჩქინდინერი აღანი პოლიტიკური ხალიშენთი დო უჩამზოღაში ენერჟიში ხათეფეში პროჟეფეს ბეჯითი ოქთირობაფეშენთი მოლაფშინაფ აჲა აღანი 30 ბუტკაში დოლოხე ქეთაბიში 3-ა კოროცხას.
ალი იჰსან აქსამაზი: აღანი ნოჩალიშეშ პროჟეფე გიღუნანი? ფუქირონი ამბარეფე გიღუნანი ჩქინდა?!
ოზჰან ოზთურქი: ეჩი წანაშენ დიდო ორაში მორგვალის, ხვალა არ-ჟურ თუთა ვარნა არ-ჟურ წანა ოჩალიშუთენ გვერდი დოსქიდერი, დიდოფეთენთი თარიხიშენ ამბარონი დიდო ნოჩალიშე ქომიღუნ მა. იბადაში, კოჩიქ კაიხეშა ისიმადეფს დო ეშო ღარღალაფს, ეშო ჭარუფს, მათი ეშო ვიქიფ. არ ჩქინაფა აღანი რენ ნა, ეჲა მჭიფაშაში ოსიმადუ-ოწინუთენ, წოხლეშენ აჲა ჩქინაფაშენ მოლაშინერი ამბარეფე ოკოდგუთენ პჭარუფ მა. კართანდღალერი ჩქვადოჩქვა გეცადა დო მაკალეფე ჩქიმი გებდუმერ https://ozhanozturk.com/ ჯოხონი ვებ საიტი ჩქიმის. დიდოფეთენ ნოღა ისტანბოლი, რომა, ბიზანსი დო უჩამზოღაში თარიხიშა ნჭელა გიღუნან ნა, ვებსაიტი ჩქიმი იკითხით; თავსიჲე გოღოდაფთ.
ალი იჰსან აქსამაზი: აჲა ოკოღარღალუ შენი დიდო შუქური გიწუმერთ. ოთქვალუში ჩქვა ნენა გიღუნან ნა, ეთი მიწვით, მუ იყვენ! ხჩე ფიმფილი დიხაშა გეგიხთან!
ოზჰან ოზთურქი: მა შუქური გიწუმერთ! ლაზური ნენა დო კულტური ოსქედინუ შენი დიდოფეთენ თქვანი დო ჶედაქჲარი არ-ჟურ მანებრაში ნოჩალიშეფე გინძე წანაფეშენ დონი მინეთი დო ქეჲიჶითენ ვიკითხუფ; აჲათი ოთქვალუ მინონ. ფიმფილი დიხაშა გეგიხთან!
https://shangulishialiihsanaksamaz.blogspot.com/2020/04/ozhan-ozturk-konusuyor-turkce-lazca.html
http://xvalamgeri.blogspot.com/2020/04/ozhan-ozturk-konusuyor-turkce-lazca.html
