“ჩქინ ოქორთურას, თქვან თურქიეს ნენა ჩქინი ვოსქედინათ; აჲა მახვენენან!”
(გოწოთქვალა: ანდღანერი მუსაჶირი ჩქიმი რენ ნათია ფონიავა. ნათია ფონიავა რენ გურჯისთანიში ლინგვისტეფეშენ დო “მარგალური დოვიგურათ” ჯოხონი ქეთაბიში
ავტორი. ნათია ფონიავა კალა არ ლაზური ინტერვიუ დოპი მა. ედო ბიჲოგრაჶი მუში დო
ქეთაბი მუშიშენ ბღარღალით. 17 II 2021/ ალი იჰსან აქსამაზი)
+
ალი იჰსან აქსამაზი: ნათია ხანუმი, იფთი ბიჲოგრაჶი თქვანიშენ
მოლამიშინით დო ეშო გევოჭკათ, იყვენი?! სონური რეთ? სო ჲეჩქინდით? ნამუ ნწოფულაფეს იგურით? აწი სო
სქიდუთ? მუ დულჲა იქიფთ? სო იჩალიშეფთ? ქორთული, მეგრული დო ლაზური ნენაფეში გალე ჩქვა ნამუ ნენაფე
გიჩქინან?
ნათია ფონიავა: ხელაკაობათენ! მა ჯიჯი მარტვილიშენ მიღუნ, მარა
ჩხოროწყუში არ მსკვა ოფუტე ჭოღას დოვიბადი დო დოვირდი. ჭოღაში ნწოფულას
ვიგური, ეკულე ივანე ჯავახიშვილიში ქართიში (თიფლისიში) უნივერსიტეს ფილოლოჟი
ვიკითხი, კავკასური ნენაფეში ბოლუმი დო აწითი აქ დოქტორა ვიქიფ. ოხორი ჭოღას
მიღუნ, ჩქიმეფე აწითი ექ სქიდუნან, მარა მა ქართის (თიფლისის) ვორე. არნოლდ
ჩიქობავაში ნენაჩქინაში ენსტიტუტეს ვიჩალიშეფ დო ილიაშ (ილია ჭავჭავაძეში) უნივერსიტესთი დერსეფე მეფჩაფ. ქართველური ნენაფე (მაჟურანეფექ ნა გუნეჲ კავკასური ნენაფე უწუმელან) დო
აფხაზურ-აბაზური ნენაფეშ ჟინ ვიჩალიშეფ. ნენაფე ჩქინიშენ ჩქვა, ინგილიზური,
თურქული, აზერბაიჯანული, აფხაზური (აბაზური) დო ამციქა რუსულითი ქომიჩქინ.
ალი იჰსან აქსამაზი: მუ იყვენ, აწითი აღანი ქეთაბი თქვანიშენ მოლამიშინით: “მარგალური დოვიგურათ”. მუკო გვერდონი რენ აჲა ნოჩალიშე თქვანი? მუკო დერსი გეძინ ქეთაბი თქვანის? კართა დერსის მუკო ნოწილე გეძინ? ნამუ ნოცილეფექ წოფხუფან კართა დერსი?
ნათია
ფონიავა: ქეთაბი ჩქიმი 255 გვერდონი რენ. ქეთაბის ეჩიდოვით
დერსი ქორენ. კართა დერსის ჟურ დიდი ნოწილე მიღუნან: მაართანი ნოწილეს გრამერი დო
გრამერიშ პრაქტიღი (ალჷშთჷრმა) მაძირენან. ამუს მაჟურანი ნოწილე ნოყუფს თემატური
ზიტაფეთენ: მესელა, ოჯაღი დო ჰამ თემატური გურუბიშა ნა ამულუნ ზიტაფე − ნანა,
ბაბა დო აშო. ამუშკულე თემატური ზიტაფეთენ ოკოდგინერი ტექსტი ვანა დიალოგი
მულუნ, ბაზი დერსის ტექსტითი დო დიალოგითი მიღუნან. კართა დერსის, თემატური
ზიტაფე ნა იხმარინენ, ლერსეფე დო ნოთქვამეფეთი ქორენ, ნენაში მსკვანობა დაა კაი ნა
მოძირაფანშენი. ქეთაბის, დოლოხე მუში ნა ვიხმარით ზიტაფეტენ ოკოდგინერი,
მარგალურ- ქორთული დო ქორთულ- მარგალური ნენაფუნათი ნუმცხუნ. ქეთაბიში
აუდიოვერსიონითი ფხაზირით. აუდიო ოხაზირუშენი ოქორთურაში მაართანი
ტელევიზიონიქ, დევლეთ ტელევიზიონიქ ხუჯი მომჩეს. მანიშა ქეთაბიში აუდიოვერსიონი აჲა
ტელევიზიონიში ვებბუტკასთი (www.1tv.ge) ქოგიდვენ დო თქვათი მეგაყუჯინენან.
ალი იჰსან აქსამაზი: აღანი კულტურული ნოჩალიჩეფე გიღუნანი? ფუქირონი ამბარეფ
ე გიღუნანი ჩქინდა?
ნათია ფონიავა: ქართველური ნენაფეში დოგურონი ქეთაბეფეში გამაჩქუმუ
თარიხჩი დო გამამჩქუმალე „არტანუჯიში“ თიგემჩანე ბუბა კუდავაში იდეა ტუ.
წოხლე “მარგალური დოვიგურათ” ჯოხონი ქეთაბი ჩქიმი გამახთუ. აწი „ლაზური დოვიგურათ“ ქეთაბიშენი ვიჩალიშეფ დო
„მარგალური დოვიგურათ“ ქეთაბიში მკულე დო კოლაი ვერსიონიში ონჭარუთი მინონან
ბერეფეშენი.
ალი იჰსან აქსამაზი: ნათია ხანუმი, მა დიდო შუქური გოღოდაფთ აჲა
ინტერვიუ შენი. თქვან ოთქვალუში ჩქვა ნენა გიღუნანნა, მუ იყვენ, ენთეფეთი მიწვით! ღორმოთიქ პანდა გოხელან!
ნათია ფონიავა: ალი ბეგი, მათი დიდი მარდი გიწუმერთ მსკვა
ინტერვიუ შენი! ინტერვიუეფე თქვანი პანდა ვიკითხუფ. დიდო მსკვა დულჲა
იქიფთ, ოინტერესონი კოჩეფე მოჩინაფაფთ დო ამუშენი დიდი მარდი! მორო, ოთქვალუში
ქომიღუნ − შური დო გურითენ მინონ, ნენა ჩქინი ვა გონდინას, ჩქინთი ართიკართი ვა
გოვონდინათ. ვიმედამ, ჩქინ ოქორთურას დო თქვან თურქიეს აჲა დიდო ბეჯითი დულჲა
მახვენენან. თქვათი ღორმოთიქ გოხელან დო გეგხვამან! გონჭელერი ლაზონა დო ლაზეფე
ჩქიმის დიდო სელამი ვუნჯღონუფ. გური კაითენ ვიძირათ!
