(Goʒ̆otkvala: (AA-şen) Anadolu Ajansişen jurnalist̆i
Yildiz Aktaşik ok̆oiğarğalu Ali İhsan Aksamazi k̆ala. Ok̆otkvalaşi tema rt̆u
Lazuri Nenaşi Geç̆k̆apuli Dersepe coxoni
ketabi. Aya noç̆are ren eya Ok̆otkvalaşi.10
XI 2013)
+
“ Aya ketabi ren moxva gurapaşi p̆rogramişa!”
Anadolu Ajansi: Lazuri Dersişi ketabi oç̆aru solen nosişa
mogixtes?
Ali İhsan Aksamazi: K̆onya Selçukişi Universit̆etişen mamgurapale
kogamapti. Eçi do xut (30) ʒ̆anaşen doni İnglisuri Nenaşi mamgurapale vore. Ma
Lazuri dersepe mepçeret̆i ar k̆idalas, noğa Kadikoyis. Aya rt̆u (2012- 2013)
jur vit̆oş do vit̆o jur- jur vit̆oş do vit̆o sum ʒ̆anaşi gamantana do gurapaşi p̆eriodis. Feide ožiramu
şeni gamiçkvineri çkar ketabi va rt̆u p̆iyasas, emindros. Eşo iquşi, dersepeşi not̆i do vizualuri
materyalepe pxaziri xe çkimiten do eşo komepçi eya dersepe. Aya materyali mteli
gamiçkvinasunon ar ketabişi doloxe; eşo
visimadept̆i ma.
Anadolu Ajansi: Ar dvaç̆irobaşen yeçkindu aya ketabi,
hoi?
Ali İhsan Aksamazi: Recep Tayyip Erdoğanişi Palanç̆inalaşi demok̆rat̆izasyonişi
p̆rojeten, namtini ağani onʒ̆oranupe
ixvenu majura svalyaruli nananenapeşi speros; aşoten Lazuri nenati iqu menoʒxune
dersi oxenʒaleşi nʒ̆opulapes. Aya k̆araritenti, Lazuri Enst̆it̆uk doxaziru mufredatişi
p̆rogrami do komeçu MEB- Talimi do
Terbiyeşi K̆omisias. Eya mufredatişi p̆rogrami ik̆abulinu mara, aya menoʒxune
dersepeşi ketabi aʒ̆i, emindros va rt̆u. Dulya aşo iquşiti, ma pk̆orobi do p̆ʒ̆opxi ʒ̆oxleni noç̆alişepe çkimi ketabişi format̆iten. Edo uk̆uleti gamoçkuşi
teklifiten, çkimda moxtimeri Gamamçkvala Lazik̆aşi K̆olletifis komepçi. Kitabi
gamiçkvinu do nunç̆işu Tuyap- noğa İst̆anbolişi Ketabişi Fuarişa; ek gamiçinen
andğaneri dğas.
Anadolu Ajansi: Ketabişi dolorena mu seviyes ren?
Ali İhsan Aksamazi: İptineri gamantaşi (4.) maotxani, (5.) maxutani do arç̆it̆ati (6.) maanşani
sinifepeşi/ k̆lasepeşi seviyes ren.
Anadolu Ajansi: Ketabi şeni oxveʒ̆u meçiti TTK̆-s?
Ali İhsan Aksamazi: Ma, Ketabi şeni, aʒ̆i oxveʒ̆u va mepçi (TTK̆-s)Talimi
do Terbiyeşi K̆omisias. Mara tkvani aya k̆itxala şk̆ule, Gamamçkvala Lazik̆aşi K̆olletifişi
ti-mçxupes vak̆vandat do entepek p̆roseduriten oxveʒ̆u meçan Talimi do Terbiyeşi
K̆omisias.
Anadolu Ajansi: Aya ketabi iptineri reni?
Ali İhsan Aksamazi: Sovyeturi Oxenʒaleşi oras, (1930-oni) vit̆on
çxoro oşi do eçi do vit̆oni ʒ̆anapes gamiçkvineri ar-jur dersişi ketabi koren.
Aya ketabepeşi uşinuten giʒ̆vatşi, ho; aya ren gamiçkvineri iptineri Lazuri
dersişi ketabi Turkiyes, ekoni magamantaneşi
noxvene; eşo matkvenan. Edo gurapaşi p̆rogramişati moxva ren aya ketabi.
Anadolu Ajansi: Lazuri nena iqu menoʒxuna dersi oxenʒaleşi
nʒ̆opulapes. Aya menoʒxune dersişi ketabi va ren. Berepek muç̆oşi igurapan?
Ali İhsan Aksamazi: Çkin komiqounan opşa dulyamxvenu mamguralepe nʒ̆opulapes.
Nananena mutepeşiti ren Lazuri. Amk̆ata mamgurapalepek ogurapan mamgurepes. Edo
mufredatişi onzğoniten, am dulyamxvenu mamgurapalepek xazirupan dersişi not̆epe
çkvadoçkva ç̆areli odudepeşen do ogurapan; eşo miçkin. Aşopetenti feidoni
dulyape ikipan. Moro mu, Lazuri
Nenaşi Geç̆k̆apuli Dersepe coxoni ketabi
çkimikti entepes nuşvelasunon. Aʒ̆i ar çkva p̆rojeşi jin viçalişep. Eyati, aya
noxvene çkimişi naqona iqvasen. (10 XI 2013)
