“ლაზეფეში ისტორია” ჯოხონი სვარაქ ნა მომჩუ პოზიტიური დო ნეგატიური მოთივაციაში სებებითენ ლაზეფეში მთინი დო წორი ისტორიაშ გოშოგორუში საქვარის ამაფტეეტი. იფთინერი თუთაფეშ მორგვალის, აჲა რტუ ინდივიდუალური ინტერესი. თი ჩქიმი შენი ამაფთეეტი ამ დულჲას. მარა ჭიტა ორა მეკილუში, ოხოვოწონეეტი მუ მუ ნა რტუ. ლაზობა დო ლაზური ნენა ინდივიდუალური დულჲაფეშენ ნა ვა რტეს შენი, გოშოგორაფეშენ ნა ვიგურამინონ ჩქინაფე, ჩქვალეფე კალა ოფარუში კარარი ქოდოლოვინგონი. ემუშენითი გაზეთე დო ჟურნალეფეს სტატიაფე პჭარამინტუ. ენტელექტუალური გაგნაფათენ ამ დულჲაფეშ დოლოხე ნა რტუ მითხანეფე კალათი კონტაქტი ოხვენუტი მემაჭირასუნტუ. ემ ორაშაქის ნა ვიჩინი დო ამ დულჲაში დოლოხე ნა რტუ არ კოჭი რტუ. ეთი, ქორთუ ნა რტუ, ჰაჲრი ჰაჲრიოღლუ რტუ.“ლაზეფეში ისტორია” ჯოხონი სვარაში თერჯუმანი რტუ მუქ. მუში კალა კონტაქტი მიღუტუ. ართიქართის ჭარელეფე პჭარუფტით. ემუსთი ვუწვეეტი, გოშოგორაფე ჩქიმიშენ ნა ვიგურამინონ ჩქინაფა, ნა ვოგნაფამინტუ მთელის ჲადო. ჰაჲრი ჰაჲრიოღლუ ინდივიდუალუროთ კაი კოჩი რტუ, მარა თურქეთის ნა სქიდუნ დო კულტურა დო ნენა მუში ნა ღურუნ არ კოჩი სთერი ვარ, ოქორთურას ნა სქიდუნ არ მითხანი სთერი რტუ. ეჲა მუშენი ეშო ნა რტუ , ვარ მიჩქიტუ. ჩქიმი შენი ლაზობა დო ლაზური ნენა ბეჯითი რტუ. ჩქიმი კალა მითი ვარ ტუ. ხვალა ვორტი. არ კოჩი ვიჩინოფტი ეთი, ნა მიღუტუ თოლითენ ვარ ოწკერტი დულჲას.
ამ დულჲა სოციალური არ თემა რტუ. მან ამ სოციალური დულჲას, ჩქიმი სთერი ნა იზმონ მინთხანეფე კალა ოჩინაფონი ვორტი. წორი ნა რტუ აჲა რტუ. მარა ირიშენ წოხლე, მან ოგურონი ვორტი დულჲა, მუჭოში რტუ, მი რტეს ლაზეფე. ემუშენითი ოკითხონი დო გოშოგორონი ვორტი. ოკითხუ დო გოშოგორუ შენი სვარა ოძირონი ვორტი. “ლაზეფეში ისტორია”ში თერჯუმე დიდო პატი თურქულითენ რტუ. ჭიტა ვორტიში, დიდილეფეშენ ნა ვოგნეეტი პარამითეფე სთერი რტუ “ლაზეფეში ისტორია”ში თერჯუმე მუში. ემ ორას, სვარაში ორიგინალური ხალი მუჭოში ნა რტუ ჲადო გურის მერაღი ვარ მაყვეეტუ. მთინი ნენათენ, ვარ ვისიმადეფტი ეჲა. ვისიმადეფტიქონნა, ოძირუ შენი ბგორამინტუ ეჲა ეშო ვარნა აშო.
“ლაზეფეში ისტორია” ლაზეფეში ისტორია ნა ვარ ტუ ნა ვიჯერეეტი შენი ამაფტეეტი ამ დულჲას. “ყინი ოკოკიდინუ”ში პერიოდი დიჩოდეეტუ. ედო აღანი პერიოდიქ ნა მიბარაფტეს იხიში შველათენ ნაკოთხანი სვარაფე გამიღინეეტუ თურქეთის. ენთეფეში ჯოხოფე აშო რტუ: “ეტნიკური გურუბეფე თურქეთის”, “კავიმეფეში ნეკნა-1” დო “ჭერკესეფეში ისტორია”. იფთინერი სვარათი თერჯუმე რტუ მარა, აწინერი გაგნაფათენ, ამ სვარაფექთი ნა მეჩაფტუ ჩქინაფა ეკო ღირსონი ვარ ტუ, მარა თემაფე მუთეფეში აღანი რტუ. ედო ემ ორაშაქის, თურქეთის ჩქვანერი ეტნიკური გურუფეფექ ნა სქიდურტუ ჲადო ოთქუ ეშო ფერფუ ვარ ტუ. ოჶიციალური იდეოლოგიაქ კაბული ვარ იქიფტუ , თურქეთის ნა სქიდუნან ჩქვანერი ეტნიკური გურუბეფეში ოსქიდუ. ემუშენი “ლაზეფეში ისთორია” ჯოხონი სვარა სთერი “ეტნიკური გურუბეფე თურქეთის”, “კავიმეფეში ნეკნა-1” დო “ჭერკესეფეში ისტორია” ჯოხონი სვარაფეში გამაჩქვინუ ბეჯითი რტუ. პრენსიპის ამ სვარაფე კაი რტეს. მარა დეტალუროთ ოწკომილუთენ ენთეფეთი დობაღინე ჩქინაფა ვარ მეჩაფტეს. ჩქვანერი სფეროფეშენ ოწკომილუთენ პრობლემონი რტუ. მურენქი, ემ ორაშაქის ენთეფეშენ კაი სვარა ვარ გამაჩქვინერი რტუ.
იფთინერი სვარა, “ეტნიკური გურუბეფე თურქეთის”, თერჯუმე რტუ. თერჯუმე მუში ეკო პატი რტუ ქი, აწი ოთქუთენ ვარ იყვენ. სვარაში ორიგინალური მუში ინგილისური ნენათენ ჭარელი ტეენ. ამ სვარაში ორიგანულური მუში მუჭო ნა რტუ, ემ ორასთი, აწითი ვარ მიჩქინ. ამ სვარას უღუტუ ჟურ სტატია ლაზეფე შენი. წორი რენ, ამ სვარაშენთი მუთხანეფე ვიგურამინტუ, მაჟურა სვარაფეშენ ნა ვიგურეეტი სთერი. “კავიმეფეში ნეკნა-1” ჯოხონი სვარათი “ეტნიკური გურუბეფე თურქეთის” ჯოხონი სვარაში ტკუბი მუში სთერი ნა რტუ-თი-ნა, ეკსტრა ჩქინაფეთი მეჩაფტუ. ემუშენ წორი ოთქუთენ, “2000’ე დოღრუ” ჯოხონი სვარულის, წოხლეშენ გამაჩქვინერი ნა ტეს სტატიაფეში სვარა ოყოფინოთ გამიღინერი ხალი რტუ. ამ სვარათი ლაზაფეში ისტორიაშენ, ლაზური ნენა დო მუში აღანი ალბონიშენ ამბარეფე მეჩაფტუ მაკითხალეფეს. “ჭერკესეფეში ისტორია” ჯოხონი სვარეფე ჟილენთუნა კავკასური მთელ ხალკეფე “ჭერკესი” იშინაფტუ. ემუშენთი მუთხანეფე ვიგურეეტი.
“ლაზეფეში ისტორია” დო “ჭერკესეფეში ისტორია” ჯოხონი სვარეფექ ართნერი თემა დო ართნერი ხალკეფეშენ პარადოკსული ამბარაფე მეჩაფტეს. “ჭერქეზეფეში ისტორია” ჯოხონი სვარაქ ჟილენთუნა კავკასიას ნა სქიდუნან ხალკი მთელი ოყოფინოთ “ჭერკესი” შინაფტუ. “ლაზეფეში ისტორია” სვარაქთი წალენთუნა კავკასია ნა სქიდუნან ხალკი “გჲურჯი” შინაფტუ. აჲა რტუ პარადოკსული სიტუაცია. არ ჩქვა პარადოკსული დულჲათი უღუტუ “ჭერქეზეფეში ისტორია” ჯოხონი სვარას. ლაზი ლაზი შინაფტუ “ჭერქეზეფეში ისტორია” ჯოხონი სვარაქ. მარა “ლაზეფეში ისტორია” ჯოხონი სვარაქ ლაზეფე ლაზი ვარ, გჲურჯი შინაფტუ. აჲა რტუ დერდი ჩქიმი.ოთხო სვარა მიღუტუ ხეს: “ლაზეფეში ისტორია”, “ეტნიკური გურუბეფე თურქეთის”, “კავიმეფეში ნეკნა-1” დო “ჭერკესეფეში ისტორია”. ლაზეფეში ჯინჯი ოგურუ შენი ამ ოთხო სვარა ნაკოთხანი ჶარა ვიკითხეეტი მარა მუთუ ვარ ოხომაწონეეტუ. ამ სებებითენ აწი ნა მიღუტუ სვარაფეშენ მეტი ჩქვანერი ანსიკლოპედიაფეშენ სტატიაფეტი ოკითხონი ვორტი დო ეშოთი პამინტუ. ედო “ჶ’ათიხიშ მილლეთიში სვარაფუნა” დო “ბეჲაზიდიშ დევლეთიში სვარაფუნა”შა ოხთიმუ- მოხთიმუს გევოჭკი.
არ ქელე ვიხანდეფტი გენჭარელი მოგაფუ შენი, ოჯახური დულჲაფე შენი, მაჟურა კელეთი ლაზეფეში ისტორია გოშობგორუფტი. დულჲა ინდივიდუალური მერაღი ოთათმინუ შენი რტუ იფთინერი ორაფეს მარა, აწი ნა ვიკითხი კართა სვარა დო სტატიაფე კალა სოციალური გაგნაფას მხუჯი მეჩამონი ნა ვორტი ოხოვოწონაფტი. ამ პუნკტის, ამ დულჲას ნა მემიშველასუნონ მითხანეფე ოგორუსთი გევოჭკეეტი. მჯვეში მეგაბრე მიყოუნტუ ჯაღალოღლუს. გამაჩქვალობა უღუტუ ემუს. ემუსთი ვუწვეეტი, ნა გოშობგორუფტი ლაზეფეში ისტორია, ჯინჯი მუთეფეში. “მთუთი მუზო” ჯოხოთენთი ნა იშინერტუ მეგაბრე ჩქიმიქ, “მან აჰმეთ ქირიმი ვიჩინოფ,”კომუნი” ჯოხონი სვარულიში მანჯე დო ჯოღაბინამეჩაფს კოჩი რენ.. მუქ ამ დულჲაფეთენ იბოდენ. გინონ-ნა თელეჶონიშ ნომერი მუში მექჩა.”-ჲა მიწუ. მანთი, “აცი ვარ, მან აწი გოშობგოროფ მუთხანეფე. მინიმუროთ მუთხანეფე ვიგურა, ჩქინა მაყვას ემ ორას, მემიშველი-ჲა, გიწვამინონ”-ჲა ვუწვი ემუს.
ჩქიმი სთერი ამ დულჲათენ ნა იბოდენ მითხანეფე ნა რტუ, ვოგნიში ვირახათი. ენთეფე კაი ჩქინაფერი კოჩეფე ნა რტუ, მაჩქინენტუ ემ ორაფეს. მარა ამციქა ოგურონი ვორტი თემა. არ ქელე ჩქვანერი სვარეფე, ანსიკლოპედიაფეში მადდეფე, სვარეფე ვიკითხუფტი, არ კელეთი ჰაჲრი ჰაჲრიოღლუ კალა კონტაქტი მიღუტუ. ართიქართიშა პჭარუფტით. ნამთინი ორაფეს მუქ მემინჯღონოფტუ მჭიფე ბროშორეფე სთერი მუთხანეფე ჰაჲრიოღლუქ.
“ეტნიკური გურუბეფე თურქეთის” ჯოხონი სვარაში “ლაზეფე” ჯოხონი ბურმეს, შეჰზათ აჲართეფე ჯოხონი ადვოკათიში კელეშენ ჭარელი არ სტატია ნა რტუ ვიკითხეეტი. ამ კოჩიში კელეშენ ჭარელი სტათი’აში ჯოხო მუში “ლაზეფეში ისტორია” ნა რტუ, 1976 ში წანას, “ქარადენიზ ჰაბერ”, (“უჩა მზოღა ამბარი”), გაზეთის ნა გამიღინუ, ვიგურეეტი. ეჲა ვიკითხიშკულე, “მზოღა ამბარი” ჯოხონი გაზეთი ოძირუ შენი, ასთა-ხოლო “ბეჲაზიდიშ დევლეთიში სვარაფუნა”შა ვიდეეტი დო გოშობგორეეტი ემ გაზეთე. მუ ჭვინი რენ ქი, ვარ მაძირეეტი გაზეთი “ბეჲაზიდიშ დევლეთიში სვარაფუნა”ს. შეჰზათ აჲართეფე ჩქიმი შენი ბეჯითი რტუ. მუქ ტუ მაართანი ლაზი, ლაზეფე შენი სტატია ნა ჭარეეტუ. ვარ მიჩქიტუ მარა, მუქ სტატია ნა ჭარ’უ გაზეთის, ლაზეფე შენი არ ჩქვა სტატია ოძირუში იმენდი ვიქიფტი. აჲართეფე ადვოკათი ნა რტუ ვიგურეეტი. აშოფეთენ მუში კალა კონტაქტი ოხვენუ დიდო ფერფუ იყვასუნტუ. ბაროშენ ვარნა ადვოკათეფე კალა ნა იხანდეფტუ მითხანიშენ შეჰზათ აჲართეფეში თელეჶონიშ ნომერი ოძირუ დიდო ფერფუ იყვასუნტუ.
1993 ში წანაში აპრილიშ თუთაში მაჟურანი გვერდის რტუ. ემ ორას ნა ვიხანდეფტი ქოლეჯის, ნა იხანდეფტუ არ ადვოკათი ორტუ. არ ნდღას ემუს ვუწვი, არ ადვოკათიში თელეჶონიშ ნომერი ბგორუფტი ჲადო. მუქ, “დერდი მო ზდიფ ჭე ბერე! მან მეგიშველამინონ”-ჲა მიწუ. ეშოთი ყუ. ედო გვერდი საატიშკულე არ ჭიტა კარტალი მომჩუ მუქ. ემუშ ჟინ ჭარუფტუ შეჰზათ აჲართეფეში ტილიჶონიშ ნომერი. მან ასთახოლო ვიჯოხი ეჲა ტილიჶონითენ. არ სვარას ჯოხო დო სტატია მუშიში ჯოხო ნა ბძირი, “ლაზეფეში ისტორია” ჯოხონი სტატია მუშის დიდო მერაღი ნა ვიქიპთი, ამ თემაფეშენ ოკოღარღალუ შენი ემუშენ რანდევუ ნა ბგორუფტი , ემუს ვუწვი. ხონარი მუშიშენ დიდო ჯენთილმენი ნა რტუ ოხოიწონერტუ. 1993 ში წანაში, მა-23-ანი აპრილი შენი ართიქართიშა რანდევუ მეფჩით. ემ დღა “ნაციონალური ხემოშლეთინობა დო ბერეფეში ბაჲრამი” ნა რტუ შენი, დოგურონის ნა იხვენასუნტუ ცერემონიაშკულე მოშვანინონი მიღუტუ.
Hiç yorum yok:
Yorum Gönder