ამ სტატიაში თემა რენ სარფიშ სინორიში ნეკნა. ნა გიჩქინან სთერი, 1988 წანაში მარიაშინას გუინწკეეტუ ამ ნეკნა. ედო ჟურ თერე, თურქეთი დო ოქორთურა შენი დიდო ბეჯითი რენ. ეჲა რენ ჟურ თერეში მეგაბრობაში სემბოლეფეშენ ართერი. ართიქართიშა მანძაგერი ნა რენ თერეფეში მეგაბრობა, ამ თერეფეშ დოლოხე ნა სქიდუნან ხალკეფეში ხელადოკაობა მუთეფეში შენითი ირიშენ ბეჯითი რენ. ამ მეგაბრობა დო ნეკნაქ მხუჯი მეჩაფს ჟურ თერეში პართნერობაფეს. ამ დულჲაფეშენ ართერი კაი მანძაგერობაში სფეროს რენ. ჟურ თერეში კომერციალური სფერო მუთეფეშის ნა იძირენ, ომჩირამუქთი ჟურ თერეში ხალკეფეს ხამფობა მოღაფს. მკულე მეთქვალეთენ, ხალკეფეში ხამფობა, ამ თერეფეს ნა სქიდუნან ხალკეფე შენითი, ამ ჟურ თერეშა მანძაგერი ნა რენ მასუმანი თერეფე დო ენთეფეში მეგაბრობაშენითი კაი რენ. აშოფეთენ, ართიქართიშა მტერობა ნა უღუნან ამ თერეფეში ოჶიციალური იდეოლოგიაფექთი ამ პროსესი კალა იჭიტანასუნონ დო გონდუნასუნონ.
ნა გინონან კელეშენ ოწკედით, თურქეთი დო ოქორთურაში მეგაბრობაქ ჟურ თერეში ხალკეფეს მხუჯი მეჩაფს დო მეჩასუნონ. ჟურ თერეში მეგაბრობაქ თურქეთი დო ოქორთურას ნა სქიდუნან ლაზეფეში კომერციალური დო კულტურული ჯუმალობასთი მხუჯი მეჩაფს. სარფიშ სინორიში ნეკნა ამ სფეროსთი არ ხეირონი დულჲა დვაყუ.“ყინი ოკოკიდინუ”ში პერიოდის, თურქეთი დო ოქორთურაში შქას აწინერი სთერი კაი მეგაბრობა ვარ იძირეტუ. თურქეთიქ ნათო დო ოქორთურაქთი ვარშოვაში გზათენ ნა ულურტეს შენი ართიქართიშა მტერობა იქიფტეს ჩქვალეფეში გური შენი. აწი ემ სიტუაციაში მჭიპე სებებეფეშენ ნა ვარ პჭარუფ შენი, ამ დულჲას ვარ ამავულურ მარა, თურქეთი დო ოქორთურაში შქას, “ყინი ოკოკიდინუ”ში პერიოდის ნა იძირუ მტერობაში სებები ეშო ვარნა აშო ამ ჟურ პაქტი რტუ. აჲა ოთქუთენ ვოჩოდინა ამ პაქტიშ თემა.
“ყინი ოკოკიდინუ”ში პერიოდის, 1988 წანაში მარიაშინაში თუთას სარფიშ სინორიში ნეკნა ვარ გუინწკუშენ წოხლე, ოქორთურას ნა სქიდუნან ლაზეფეშენ ამბარი ვარ მიღუტეს. ხვალა ბათუმის ნა სქიდუნან ლაზეფე ქორენ ჲადო ვოგნაფტით დო მუთუ ვარ. კაიხეშა ნა გიჩქინან სთერი, ემ პერიოდის, სოვეთჲარი ლიქათეში თერეს რუსეთი ვუწუმერტით დო ხალკი მუშითი რუსი ჲადო მიჩქიტეს. აჲა რტუ ემ პერიოდიში პარადოკსიური გაგნაფა, ნა მაყვეს.
მთინი დო წორი მეთქვალეთენ, ჩქინ მუთუ ვარ მიჩქიტეს ოქორთურას ნა სქიდუნან ლაზეფეში ამბარი. ედო ემ პერიოდიში სებებითენ, ენთეფესთი ვარ უჩქიტეს თურქეთური ლაზეფეში ამბარი. აწითი ჟურ თერეში, თურქეთიში დო ოქორთურაში ლაზეფეს ეშო კაი ვარ უჩქინან-თი-ნა, ართიქართიში ამბარი, აწინერი პროსესი წოხლენერიშენ დიდო ხეირონი რენ. აჲა რენ დიდო მეჩამურა პროსესი.
ნამისონი დო ოჶიციალური სტატიკური ჶიგურეფე ვარ მიღუნან. ემუშენითი მითის კაიხეშა ვარ აჩქინენ მარა, თურქეთის არ მილიონი კონარი ლაზი სქიდუნან ჲადო იჯერენ. ოქორთურაშა მანძაგერი ნა რენ, ისტორიული ტერიტორიას ნა სქიდუნან ლაზეფეში ნაკონობა დიდო ჭიტა რენ. მარა თურქეთიში გჲულვა ტერიტორიაფესთი ლაზეფე სქიდუნან. ენთეფე ოსმანურ-რუსული ოკოკიდინუფეში მოხაჯირეფე რენან დო ოფუტეფე მუთეფეშის სქიდუნან გჲულვა თურქეთის. მპოლი, იზმირი დო ანგარა სთერი დიდი ნოღაფესთი სქიდუნან ენთეფექ. ეშო ვარნა აშო არ მილიონი კონარი რენან თურქეთური ლაზეფე.
ნა მიჩქინან კონარი ოქორთურასთი ხუთი შილია კონარი ლაზი სქიდუნან. ენთეფეს ნაკოთხანი ოფუტეფეს უღუნან ოქორთურას. ამ ოფუტეფეშენ ართერი რენ სარფი. ედო ჩქვანერი სებებეფეთენ ბეჯითი ნა რენ ოფუტე მუთეფეში სარფი რენ, მოლენი სარფი. ლაზეფე სთერი კოლხური ჯინჯიშენ ხთიმერი მეგრელეფეში ნაკონობაშენითი მითის მუთუ ვარ აჩქინენ. ენთეფე არ მილიონიშენ მეტი დიდო რენან ჲადო იჯერენ.
თურქეთი დო ოქორთურას ნა სქიდუნან ლაზეფეს მუ მენგაფობა დო ჩქვანერობაფე უღუნან? სარფიშ სინორიში ნეკნაშა ჯოხო მუში ნა მეჩაფს ოფუტე ლაზური ნენა ნა იღარღალენ რაიონი რენ. გოწოში მონჭინობას, მარიაშინას ოქორთურაშა ვიდი. ჩქვა დო ჩქვა ტერიტორიაფეს გოფთი. არ სერისთი სარფის ვინჯირი. ექონაშის ბერეფეშენ ხჩინი დო ბადეფეშა კონარი მთელი ხოლოს ლაზური უჩქინან დო ღარღალაფან. მთელი ხალკიქ ლაზური ღარღალაფან. სქიდალა ჩქიმიში მორგვალის, ნა ვარ ბძირი დო ნა ვარ ვოგნი ონდეფე, ბძირი თოლეფე ჩქიმითენ დო ვოგნი ყუჯეფე ჩქიმითენ. ლაზური ნა ღარღალაფს პოლიციელითი ბძირი, ასქერითი. ედო გოვიშაში. გოწოს, მკულე პერიოდიშ მორგვალი, ექ ნა ბძირი ირიშენ ბეჯითი ჩქვანობა, ლაზური ნენაში ოღარღალუ რენ. ემ ოფუტეს ლაზური ნენა სქიდუნ, ლაზურიში ოგურუ ნა უნონანფეს სარფიშა ოხთიმუ ჭირნან. ემ ოფუტეს ნა სქიდუნან ლაზეფეში ენტელეკტური მაღალობათი აქონაში სთერი ვარ რენ. კითხერი რენან დო ენთეფეს ლაზური, ქორთული, რუსული დო თურქულითი უჩქინან. დიდო კულტურონი რენან მარა უმუთელი რენან. კითხერი, კულტურონი დო ღნოსონი ნა რენ, მორო იხამფასუნონ.
ეშო ვარ ნა აშო, ეჩი წანა იყვენ სარფიში სინორიში ნეკნა ნა გუინწქინუ. ამ პერიოდიშ მორგვალი დიდო ონდეფე ვიგურით ართიქართიშენ. ედო ეშო ჭიტათი ვარ რენ ართიქართიშენ ნა ვიგურამინონანფე, მარა იმენდი მიღუნან ნა თანუფს კართა ნდღაშენ.
თურქეთი დო ოქორთურაში ხოლოსონი მანძაგერობა, მეგაბრობა დო კართა ხეირონი სფეროს პართნერობაქ ლაზური ნენა დო კულტურას მხუჯი ნა მეჩაფს სთერი, აქ დო ოქორთურას ნა სქიდუნან ლაზეფეში ჯუმალობა დო ხოლოსონი კონტაქტეფექთი ჟურ თერეში ხელადოკაობას მხუჯი მეჩასუნონ. სარფიშ სინორიში ნეკნა 1988 წანაში მარიაშინას გუინწკეეტუ ოზალიში ჰუქუმეთიში პერიოდის, მარა აჲა ვარ ტუ ემ ორაში დუდნაზირიში, ოზალიში დულჲა. ნა იხვენუ დულჲა ქიანური ბალანსეფეში ჩოდინა მუში რტუ. მარა კაი დულჲა რტუ თურქეთი დო ოქორთურას შქას დო თურქეთი დო ოქორთურას ნა სქიდუნან ლაზეფეშენი.
სარფიში სინორიში ნეკნა ნა გუინწქინუ ლაზური რონესანსიში მაართანი ჭკონეფეშენ არ თერი რენ.
Hiç yorum yok:
Yorum Gönder