ხელადოკაობათენ ყოროფელი მაკითხალეფე!
ამ სტატიაში თემა ქაზიმი იყვასუნონ. მუში ბიოგრაჶიშენთი ნა გიწვამინონან სთერი, მუში ცოციალური გაგნაფაშენთი ნაკოთხანი მეთქვალე გინჭარამინონან.
ოჶიციუალური ჯოხო მუში ქაზიმი რტუ მარა, ჩქინ ემუს “დინა” ვუწუმერტით დო ეშოთი ვიჩინოფტით. მუქ დიდო ყოროფტუ ამ ჯოხო.
მაართანი ჶაროთ 1993-ში წანას ვიჩინეეტი ეჲა ამ ჯოხოთენ. ემ წანაში მონჭინობას მბულობა ვარნა ხცალას რტუ. მპოლიში აკსარაჲი ჯოხონი რაიონის არ ოჶისის ვორტით. ჩქინ ემ ორას ლაზური კულტურაში ოსქედინუ შენი, შველა ნა გორუფს ნაკოთხანი ადამიანი ვორტით.
ემ ოჶისიქ ნაკოთხანი თუთაშკულე, “ოგნი” ჯოხონი კულტურული ჟურნალიში ოკრებულე იყვასუნტუ. მკულე ნენათენ გიწვათ-ნა, მან ეჲა ლაზეფეშ დოლოხე ვიჩინი. მუქ ლაზი რტუ მარა, მუში კალა ნა ვიჩინეეტი ნაკოთხანი, მეგაბრეფე მუში სთერი ვარ ტუ.
დინაქ “ოგნი”ს მხუჯი ნა მეჩაფენფეში ართერი რტუ მარა, ემ პერიოდის ნა ვიჩინი აღნემორდალეფეშენ ჩქვანერი რტუ. დიდო დო მცუდიში ნა ღარღალეფენფეშენ ვარ ტუ. ნა ღარღალაფანფეს უსიმირტუ დო ეშო კართა თემაშენი ნოშქერი სთერი კომენტარი ვარ იქიფტუ. მუქ დიდო ვარ ღარღალაფტუ მარა, მაჟურანეფეში ხონარის ყუჯი მეჩაფტუ.
1993 წანას თურქეთიში ისტორიას დიდო ბეჯითი არ სვა უღუნ; თერეში ჲულვა დო წალენთუნა- ჲულვა ტერიტორიაფეს დიდო პატი, დიცხირონი ნდღალეფეს ისქიდინენტუ. ემ დიცხირიში, ნა იძირენ სებები მუში, არ ჩქვა ეტნიკური გურუბიში პოლითიკური დო სილახონი აქციაფე მუში რტუ. ჩქინთი ემ პერიოდის, არ ჩქვა ეტნიკური გურუბიში პოლიტიკური ვარ მარა, კულტურა დო ნენა მუშიში ოსქედინუ შენი ვიხანდეფტით.ჩქინი შენი ეშო კაი ნა ვარ რენ , ჶიკირეფე ნა უღუნან, ილლეგალური ორგანიზაციაფეში მესაჟეფეთი კაიხეშა ვოგნაფტით. დოლოხე მუში ნა ფსქიდურტით თერე შენითი, ამ თერეში დოლოხე ნა სქიდუნან მთელი ხალკი შენი დობაღინე დიდო პატი ორაფე რტუ. ემუშენი მთელ ორაფეს ნა ჭირს სთერი, ემ ორასთი ჭკუათენ ოგზალუ ჭირტუ. ხუსუსუროთ ემ პერიოდის ჭკუა დიდო ბეჯითი რტუ.
“ოგნი”ში ოკოხთალაფეს, მან არ კელე ნა ღარღალაფანფეს ვუსიმინტი მაჟურა კელეთი ენთეფეში თოლეფეს ვოწკერტი. აშოფეთენ გური მუში ჩქვა დო პიჯი მუში ჩქვა ნა რენანფე ოხოწონუთენ ვიბოდერტი. დიდო კოჩი ვიჩინი ემ პერიოდის, მარა დინა მუში კალა ნა რენანფეს ვარ ნუნგაფტუ. ემუს გური ხარხალერი უღუტუ. ჯუმალური გაგნაფეთენ თოლეფე მუშის ნა ოწკენ მითხანიქ ძირასუნტუ მუში გურიში ხალი. დიდო ვარ, ნაკოთხანი ჶარას ბძირი დინა ამ ოკოხთალაფეს. ნაკოთხანი ჶარასთი თაქსიმიში რაიონის, ისთიქლალის ბძირი ეჲა.ლიდერი ოყოფიმუთი ნა ვარ უნონ არ გური უღუტუ დინას. ემოციათენ ოფშერი არ გური ემუს ნა უღუტუ დო ლიდერეფე დო ლიდერობა ემუქ ნა ვარ ყოროფტუ, ოხოვოწონეეტი. ლაზი რტუ, მარა რაცისტი ვა რტუ, ლაზური ნენა სქიდას ჲადო იხანდეფტუ, მარა ლაზური ნენა სთერი, თერეში მაჟურა ნენაფესთი მხუჯი მეჩაფტუ. დოლოხე მუშის მუქ ნა სქიდურტუ თერეში ცოციალური პრობლემეფეს კაპულა მუში ვარ გჲოქთაფტუ.
ართნერი ნოღას ფსქიდურტით მარა, 1994 წანაშკულე ვარ ბძირი დინა. გაზეთეფე დო ჟურნალეფეს მუქ ნა მეჩუ ინტერვიუ დო ჟურნალესტეფეში ნოჭარეფე პკითხუფტი. ეშოთე ამბერეფე მუში ვოგნაფტი.ჩინობერი დო ხამფა ოყოფინუ შენი ჩქვალეფე სთერი, ლაზობათი, ლაზური ნენათი ვარ იხმარუ. თი- მუში მოშლეთინუში დერდი ვარ ზდიფტუ. ემუს ხოლოსონი ”მეგაბრეფე” უყოუნტუ მტერიშენ მტერი. ედო ემუში სქიდალა შენი ჩქვალაფეს ამბარი მეჩაფტეს. მუქ ეშო პატი საქვარეფე იქიფს ჲადო. ნა ოკოვიკათით ორაფეს, მითხანი შენი პიჯი მუშიშენ პატი ნენა ვარ ვოგნი. მითხანიშენთი, მითხანი შენი პატი ნენა ნა თქუ ჲადოთი ვარ ვოგნი.დიდო გინძე ორათენ მეგაბრობა ვარ მიღუტუ მუში კალა მარა, დიდო კაპეტი გური ემუს ნა უღუტუ, მიჩქინ. თი-მუში კალა ნა რტუ ორასთი, კონსერეფეს ხალკი კალა ნა რტუ ორასთი ხვალა რტუ.მუქ ხვალა რტუ. მუსიკოსი რტუ მუქ. ნამისონი კოჩი რტუ, ჩქინი დინა. მან აშო ვიჩინი დინამუსიკა დიდო ბეჯითი რენ დინა შენი. გეჭკაფურონი დოგურონიში მაანშანი კლასის მანდოლინი გელაჩაფტეენ.დინა 1972 წანას ხოფას დიბადეენ. გეჭკაფურონი დოგურონი დო ლისეთი ხოფას იკითხეენ. უნივერსიტეტის ოკითხუშენითი 1989 წანას მპოლიშა იდეენ. ედო მპოლიში უნივერსიტეტიში პოლიტიკური ჩქინაფეში ჶაკულტეთიში მამგურეფეშენ ართერი იყვეენ მარა, პოლითიკური სებებეფეთენ დოგურონი მუში ნაშქვეენ.
1990 წანას, “დრომშინობა ხეშნოხვენე ათელჲე”ს ოხანდუს ქოგჲოჩკეენ. 1991 წანას ალი ელვერი ჯოხონი მეგაბრე მუში კალა ართოთ “ვარ იჩოდენ” ჯოხონი მუსიკური კერკელი დოკოდეენ. ართნერი წანას ამდროში არტისთეფეში ნოსთერე “ჶაშიზმაში შქურინა დო მუში უმუთელებო” ჯოხონი პიესაში მუზიკაფე მუში დუხვენეენ დინაქ. ამ კერკელიშიქ ართითი ალბუმი დოყვეენ, “ემფულაფეში ბულვარი” ჯოხონი.1993 წანას, დინაქ ხოლოსონი მეგაბრე მუში სარიგინა დო მაჟურანეფე კალა ართო “ზუღაში ბერეფე” ჯოხონი მუსიკური კერკელი დოკოდეენ. ამ მუსიკური კერკელის , “ოგნი” ჯოხონი ჟურნალიშქულე დიდო ბეჯითი ჩკონეფეშენ ართერი რენ. “ზუღაში ბერეფე”ში 1995 წანას ნა გამიღუ მაართანი ალბუმიში ჯოხო “ ვა მიშქუნან” რტუ. ამ მუსიკური კერკეში ალბუმეფეში ჯოხოფე ეშო რენ: “იგზას” დო “ბრუხელლ ლივე”. მურენქი “ზუღაში ბერეფე”ქ 1999 წანას ქოგოშიბღუ. ემუშკულე დინას ჩქვა პროგეტეფეს როლეფე დვაყუ. დინაქ სოლო ალბუმეფე ოხვენუში შენი ოხანდუს ქოგჲოჭკუ.
დინაქ ხოფას სქიდურთაში ლაზობა კალა მუთუ დერდი ვარ ზდიფტუ მარა, მუქ მპოლიშა მოხთაში ლაზური ნენაში ბეჯითობა ოხოწონუს ქოგჲოჭკუ. ედო ემუშენი მუთხანეფე ოხვენუში დერდი უღუტუ ემუს. გენჭარელი მოგაფუ ნოღირა მუში ვა რტუ, ლაზური ნენათენ მუსიკა ოხვენუში სებები მუში ვართი გეჭარელი ვართი ჩინობერობა რტუ.
დინაქ გური მუთეფეშის ლაზური ნენაში ოსქედინუ შენი ჭვინი ნა უღუნანფე კალა რტუში, ენთეფეს მხუჯი მეჩუ. ედო ენთეფექთი ამ კოლექტიური საქვარის, ემუს მხუჯი მეჩეს.
ამ პუნქტის დინა მუსიკოსი, უჩამზოღაში ბერე დო რევოლუციონერი რტუ. მუხალიჶეფეშის მხუჯი მეჩაფტუ მუქ ედო ენთეფეში ხონარეფეშენ ართერი იყუ.
დინას დიდო მსქვა ხონარი უღუტუ. მუხალიჶი რტუ. დინა “პოპულური კულთურა”ში ობჟე ვარ რტუ. ბირაბაფე მუში კალა ნა იდელეფტეს შილჲაფეთენ მასიმინალეფე, ხაჲრანეფე უყონუტუ დინას. დინა შენი მუსიკური პიასაში ლორდეფეთი იდელეფტეს. დინაში უფიშენ გეჭარელი მოგაფუ შენი იდელეფტეს.
დინაქ “გულბეჲაზ” დო “სულთან მაქამი” ჯოხონი ტელევიზური სერიალეფეში მუსიკეფე ყუ. ემუთენთი მთელ თურქეთიქ დინაში ჯოხო ოგნუ. პოპულური არტისთეფეშენ ართერი იყუ. აჲა რტუ მუში მილადი. ჩინობერი რტუ. ეშო ფთქვათ-ნა, აშო ფთქვათ-ნა, დინაქ აწი არ ჩქვა გზათენ იდასუნტუ. აჩქვა პოპულური რტუ. დინაში უფიშენ გეჭარელი მოგაფუ ნა უნონანფე დიდო დიდი მენჯელი უღუტეს პრესაში სფეროსთი. აშოფეთენ მაგაზინური პრესაქ დინაში ამბარეფე მეჩაფტუ ქართა ნდღას.
დინა დიზაბუნუ. ზაბუნობა მუში კანსერი ნა რტუ ოხოიწონუ. ამ პატი ზაბუნობაშენ მოშლეთინუ დო ოკარუ შენი, კემოტერაპი ეჩოფუშენი ოხზაბუნეფეშა ულურტუ. ჩოდინური ნდღაშა იმენდი უღუტუ. ედო კაბღა უღუტუ დინას კართა უბედობა კალა.
“დინა, ჯუმა; სი ლაზური ნენა შენი სქიდი! აჩქვა ცაშა ეხტი. სი ლაზური ნენათენ სქიდაგინონ. ლაზური ნენა სქიდაშაქის სითი სქიდაგინონ. მუ კაპეტი შური ნა გიღუტი, მან კაი მიჩქინ. სქიდალა სქანის ხვალა რტი მარა, ნა სქიდასუნონ ლაზური ნენათენ; სი, ნა ღურესფე ჩქინი დო ჩქინ აწი ნა სქიდუნანფე ართო ვიყვათმინონან.
( მპოლი, 06.
07. 2005)”
