1 კუნდურა 199ცშენ, ბუგუნიქ მაართანი ნდღას ნა მეჩუ დო ლაზიში ჶონდი ოკიდუ ნა უნტუ მითხანეფე მტერი სთერი ნა ოწირაფტუ ამბარიშკულეთი, რეაქციაფე გამოჩქვინუს ქოგჲოჭკუ მუში ბუტკაფეს. პრინწიპეფე ნა ვარ უღუტუ მითხანი ვარნა მითხანეფეშკელენ ლაზი ხალკიში ჯოხოთენ, აქთუელ, ჯუმჰურიჲეთ დო ბუგუნის უსიმადერი ნა ნიჩინუ სურათი დო ინტერვიუფე რეაქცია ძირუ. რეაქცია ოწირუ ნა უნტუ მითხანეფე ქორტუ. ბუგუნიქ რეაქცია ნა ოწირუ მითხანეფეშენ ინტერვიუფე ეზდიმუშა დო გამოჩქვინუშა ქოგჲოჭკუ.
1 კუნდურა 1993 თარიღონი ბუგუნის, ემ პერიოდის ანაფიშენ პარლამენტის დეპუტატი ნა რტეს ადნან ქაჰვეჯი, შადი ფეჰლივანოღლუ, სულეჲმან ჰათინოღლუ, შადან თუზჯუ დო მუსთაჶა ფარლაქ ჯოხონი მითხანეფეში ჶიკირიფე გამიჩქვინუ, ლაზიში ფონდი შენი.
1 კუნდურა 1993 თარიღონი ბუგუნიში მანშეთეფეთი აშო რტუ: “ლაზიში ფონდიშა დიდო რეაქცია ნიჩინუ” დო “ჩქინ უჩამზოღარეფე თიშენ კუჩხეშა თურქი ვორეთ”. გაზეთაქ მი ნა რტეს ჩქინერი ნა ვა რტუ მითხანეფეში პიჯითენთი, ლაზეფე ლაზი ნა ვარ ტეს დო ლაზური ჯოხონი არ ნენათი ნა ვარ ტუ ჭარუფტუ. ბუგუნიში მთინი ნოღირა აჰმეთ ქირიმი დო ჯემილ მემიშოღლუ დო ლაზიში ფონდი ვარ, მარა ლაზეფე დო ლაზური ნენა რტუ.
31 წანაღანი 1993 თარიღონი ბუგუნიშკელენ ჯემილ მემიშოღლუ თქუ ჲადო ნა იგნაფინუ თქვალაფე, 1 კუნდურა 1993 თარიღონი ბუგუნისთი ხოლო იგნაფინეტუ: “ვართი ქორთუ, ვართი სომეხი, ვართი თურქი ვორეთ; ლაზი ვორეთ.” გაზეთაქ კომენტარი სთერი მუთხანეფე ჭარუფტუ. ედო ხოლო ლაზეფე ლაზი ნა ვარ ტეს, დო ლაზური ჯოხონი არ ნენათი ნა ვა რტუ ოგნაფაფტუ. აჲა რტუ დიდი მცუდი. გაზეთაქ ნაყონოფტუ დო ლაზეფე დო ლაზური ნენა მაქსიმალუროთ ჶოლკლორული კომპონენტი ნა რტუ ჭარუფტუ.
1 კუნდურა 1993 თარიღონი ბუგუნის ნა გამიჩქვინუ ამბარიში ნოღირა ჯემილ მემიშოღლუ იძირეტუ მარა, ჟინ ნა გიწვით სთერი, მთინი ნოღირა ლაზი ხალკი დო ლაზური ნენა რტუ. ბუგუნის ამ კაპეტი სილახი იხმარას ჲადო ეშო ვარნა აშო ნა მეჩუ მითხანი, აქთუელის იფთინეროთ უსიმადერი მარა ბექითი კაი გაგნაფათენ ინტერვიუ ნა მეჩეეტუ მითხანი რტუ.
ბუგუნიში 2 კუნდურა 1993 თარიღონი კოროცხალას ნეჯათი ზინჯირქირანიქ ნა ჭარეეტუ სტატიაში გაგნაფა, ემ დღაშაქის ბუგუნის ნა გამიჩქვინუ დო ემ დღაშკულეთი ნა გამიჩქვინასუნტუ ამბარეფეში გაგნაფას ჩქარ ვარ ნუნგაფტუ. ნა ვარ უჩქიტუ ბერეს გზა ოწირუ ნა უნტუ მითხანიში გაგნაფათენ ჭარელი რტუ ნეჯათი ზინჯირქირანიში სტატია. დუდავტორი ნეჯათი ზინჯირქირანიქ 8-14 გიმუა 1992 თარიღონი აქთუელი დო 19 წანაღანი 1993 თარიღონი ჯუმჰურიჲეთიშენ ნა ეზდეეტუ ნამთინი ნენაფეთენ გჲოჭკეენ ოჭარუს.
ნეჯათი ზინჯირქირანიქ, აჰმეთ ქირიმიქ 8-14 გიმუა 1992 თარიღონი აქთუელის ნა მეჩეეტუ ინტერვიუშენ ნამთინი ნენაფე ეზდეენ, ამ ნენაფე ემ ჟურნალის ნა თქუ მითხანიში რენ. ნეჯათი ზინჯირქირანიქ ჯემილ მემიშოღლუ დო მეჯით ჩაქირუსთაქ 19 წანაღანი 1993 თარიღონი ჯუმჰურიჲეთის ნა მეჩეეტეს ინტერვიუშენთი ნამთინი ნენაფეთი ეზდეენ, მარა ამ ნენაფე მიში ნა რტუ ჩქინერი ვარ რენ. 31 წანაღანი 1993 დო 1 კუნდურა 1993 თარიღონი ბუგუნიშკელენ ჯემილ მემიშოღლუქ თქუ ჲადო ნა იგნაფინუ ამ ნენაფეთი ეზდეენ ნეჯათი ზინჯირქირანიქ ბუგუნის ნა ჭარუ სტატია მუშის. მთინი ნენათენ, ჯემილ მემიშოღლუ დო მეჯით ჩაქირუსთაქ 19 წანაღანი 1993 თარიღონი ჯუმჰურიჲეთის ინტერვიუ მეჩეეტეს, მარა ჯემილ მემიშოღლუ თქუ ჲადო ბუგუნიშკელენ იგნაფინუ ნენაფეში მანჯე, ჯუმჰურიჲეთის ნა გამიჩქვინუ ორასთი ჩქინერი ვარ ტუ. ჯუმჰურიჲეთის მიშკელენ ნა ითქუ ჩქინერი ნა ვა რტუ ნენაფე, ჯემილ მემიშოღლუ თქუ ჲადო იგნაფეეტუ ბუგუნიშკელენ. “ვართი ქორთუ, ვართი სომეხი, ვართი თურქი ვორეთ; ლაზი ვორეთ.” ჲადო ჯუმჰურიჲეთის ნა თქუ მითხანი ჯემილ მემიშოღლუ ვა რტუ. მარა ბუგუნიშკელენ ჯემილ მემიშოღლუქ “ვართი ქორთუ, ვართი სომეხი, ვართი თურქი ვორეთ; ლაზი ვორეთ.” თქუ ჲადო იჭარეტუ. აჲა რტუ სერიოზული ჰუკუკური პრობლემა.
ნეჯათი ზინჯირქირანი “ყინი ოკოკიდინუ”ში პერიოდიში ჟურნალისტეფეშენ არ თერი რტუ. მარა არ კელე თურქეთი ნა ყოროფტუ მითხანი, მაჟურა კელეთი დულჲა მუთეფეში ნა ვარ უჩქიტეს მითხანეფეს გზა ნა ოგურაფტუ უმჩანე ჯუმაში გაგნაფათენ ჭარუფტუ სტატია მუში. ნეჯათი ზინჯირქირანიქთი ბუგუნის ჭარუფტუ სტატია მუში, მარა ემუქ ლაზიში ფონდი შენი ნა ჭარუფტუ გაგნაფა, ემ ორაშ წოხლე, ლაზიში ფონდი შენი ბუგუნის გამაჩქვინერი ამბარეფეში გაგნაფას ვარ ნუნგაფტუ. გაზეთაში დუდავტორიში გაგნაფა დო ართნერი გაზეთაშ ამბარიში გაგნაფა ართიქართიშენ ჩქვანერი რტუ. აჲა რტუ ინტერესონი თემა!
ჯემილ მემიშოღლუქ თქუ ჲადო ნა იგნაფეეტუ ნენაფე დო არ პოლიტიკური მინობა მფულერი არ კოჩიშკელენ არ ხალკიში ჯოხოთენ ნა ითქუ ნენაფეს რეაქცია ნიჩინუ. მაჟურა კელე ჩქვანერი ნენა დო კულტურა ნა უღუტუ ხალკიში ჯოხოთენ არ ფონდი ოკიდუ ნა უნტუ, მარა ეჲა მუჭო ყვასუნტუ ნა ვარ უჩქიტუ კოჩის გზა ოწირაფტუ ნეჯათი ზინჯირქირანიქ. მკულე ნენათენ; ლაზიში ფონდი ოკიდუ ნა უნტუ მითხანეფექ ნა თქვასუნტუ ნენაფე ნეჯათი ზინჯირქირანიქ ჭარუფტუ მუში სტატიაში დოლოხე. ენთეფექ ეშო-აშო ყვან ჲადო ჭარუფტუ. “ნენა გიღუნ ნა, ოსქედინით; კულტურა გიღუნ ნა, ომორდინით” ჲა უწუმერტუ ნეჯათი ზინჯირქირანიქ. ედო ლაზეფექ ნა სქიდუნან ტერიტორიას, ტურიზმიში ხეთენ, ეკონომიაში ხეთენ მხუჯი მეჩან ჲადოთი ჭარუფტუ ნეჯათი ზინჯირქირანიქ.
ნეჯათი ზინჯირქირანიქ ლაზური ნენა დო კულტურა კალა პრობლემა ნა უღუტუ მითხანიში პიჯითენ ვარ ჭარუფტუ მუში ჶიკირეფე. ნა ოხოიწონი კონარი, ლაზური ნენა დო კულტურა ოსქედინუში ნოღირათენ ფონდი ოკიდუ ნა უნონტუ მითხანეფეში, პოლიტიკური სთერი ნა იძირეტუ ჶიკირეფეს რეაქცია ოწირაფტუ.
4 კუნდურა 1993 თარიღონი ბუგუნიქ მპოლის ნა სქიდუტუ უჩამზოღარეფეშკელენ ხოლო მპოლის, დიდო გინძე წანაფე წოხლე კიდერი ნა რენ კულტურა დო სოლიდარობაშ კერკელეფეში დუდმახვენჯეფეში რეაქციაფე გამოჩქვუ. ენთეფეში რეაქცია ლაზიში ფონდიშა ვა რტუ. ფონდი ოკიდუ ნა უნტუ დო აქთუელი დო ჯუმჰურიჲეთის კახვახანას მეგაბრე მუში კალა ნა ღარღალაფტუ სთერი, სერიოზული ნა ვა რტუ ნენაფე ნა თქუ დო ვიზია ნა ვა უღუტუ მითხანეფეშა რტუ. მარა ამ კოჩეფეში გაგნაფა დო ბუგუნიში ამბარეფეში ხეთენ, ნოღირა დო მტერი ლაზური ნენა, კულტურა ოწირინუ. გეჯგინერი იყვეს.
მპოლის ტამტრა, რიზინი დო ართვინიში კულტურა დო სოლიდარობაში კერკელეფეში დუდმახვენჯეფეშკელენ ოშქენდური ოყოფინოთ ნა ნიჩინუ პრესური ოგნაფათენ, 8-14 გიმუა 1992 თარიღონი აქთუელის, 19 წანაღანი 1993 თარიღონი ჯუმჰურიჲეთის აჰმეთ ქირიმი დო ჯემილ მემიშოღლუშკელენ ნა ითქუ დო 1 კუნდურა 1993 თარიღონი ბუგუნიშკელენ ჯემილ მემიშოღლუქ თქუ ჲადო იგნაფინუ ნამთინი ნენაფეს რეაქცია ნიჩინუ. ბუგუნიქთი კერკელეფეში დუდმახვენჯეფეში რეაქცია გამოჩქვუ.
მპოლის ტამტრა, რიზინი დო ართვინიში კულტურა დო სოლიდარობაშ კერკელეფეში დუდმახვენჯეფეში რეაქციაფეში სებები ლაზური ნენა ოსქედინუ შენი არ ფონდი ოკიდუ ვა რტუ. ენთეფეში რეაქციაფეში სებები, 8-14 გიმუა 1992 თარიღონი აქთუელის, 19 წანაღანი 1993 თარიღონი ჯუმჰურიჲეთის აჰმეთ ქირიმი დო ჯემილ მემიშოღქუშკელენ ნა ითქუ დო 1 კუნდურა 1993 თარიღონი ბუგუნიშკელენ ჯემილ მემიშოღლუქ თქუ ჲადო ნა იგნაფინუ ნამთინი ნენაფე რტეს.
მპოლის ტამტრა, რიზინი დო ართვინიში კულტურა დო სოლიდარობაშ კერკელეფეში დუდმახვენჯეფექ ოშქენდური ოგნაფა მუთეფეშის ჭარუფტუ ჲადო აშო ოგნაფაფტუ 4 კუნდურა 1993 თარიღონი ბუგუნიქ: ”თიმოშლეთინუში ოკოკიდინუში მორგვალის, დობადონა მოშლეთინუ შენი, შური დო დიცხირი ნა მეჩუ უჩამზოღარეფე სეპარატისტეფეს მხუჯი ნა მეჩაფანფე სთერი მუჭო იგნაფინენ? მუჭო იყვენ დო ჩქინი შენი რუმიშენ გოქთერი ითქვენ?” ამ ოგნაფას მხუჯი ნა მეჩუ, მპოლის კიდერი კერკელეფეში დუდმახვენჯეფეში ჯოხოფეთი აშო ოგნაფაფტუ ბუგუნიქ: “საბაჰათთინ საღიროღლუ, ტამტრაში კულტურა დო სოლიდარობაში კერკელიში დუდმახვენჯე; თემელ ერჲილმაზ, რიზინიში კულტურა დო სოლიდარობაში კერკელიში დუდმახვენჯე; აჰმეთ ვეჰბი მელექ, ართვინიში კულტურა დო სოლიდარობაში კერკელიში დუდმახვენჯე.”
ართნერი თარიღონი ბუგუნიქ “ბუგუნიში ნოტი” მანშეთითენ არ მკულე ოგნაფა მუშითი გამოჩქვუ. ნოღირა მუში ლაზური ნენა დო ლაზეფე რტუ. ლაზეფე ნაცია ნა ვარ ტუ დო ლაზური ნენა ჯოხონი არ ნენათი ნა ვარ ტუ ჭარუფტუ ამ მკულე ნოტის ბუგუნიქ.
7 კუნდურა 1993 თარიღონი ბუგუნიში ამბარი, ამ თემა შენი, ემუქ ნა გამოჩქვუ მთელ ამბარაფეშენ ჩქვანერი რტუ. ლაზური ნენა ნა სქიდუტუ ტერიტორიაშენ მოხთიმერი დო მპოლის დობარგერი მითხანეფეშკელენ კიდერი კერკელეფეში დუდმახვენჯეფექ ოთელ დედემანის ნა ყვეს ოშქენური პრესური ოკოხთალაშენ ამბარი მეჩაფტუ. ბუგუნიში ამბარიში მანშეთი აშო რტუ: “ლაზიში ფონდიში სებებითენ გოვირეზილით.” ამბარიში ჟინ არ სურათითი ნიჩინეენ. თურქეთიში ნაციონალური ბანდარაში წოხლე ნამთინი კოჩეფე დგინან. ბუგუნიქ ენთეფე კერკელეფეშენ მითხანეფე ნა რტუ ჭარუფტუ. სურათითი რამაზან ჲაზგანიშკელენ ჲეშიღერი რენ.
მპოლის არტაშენი, არქაბი, ჩაჲელი, ოთინა, ვიწე დო ხემშინიში კულტურა დო სოლიდარობაში კერკელიშენ მითხანეფექ ოთელ დედემანის ნა ოკოიკათეს დო ლაზიში ფონდი პროტესტი ნა ყვესში ამბარი ოგნაფუ ბუგუნიქ. ბუგუნიქ არტაშენიში კულტურა დო სოლიდარობაში კერკელიში დუდმახვენჯე ჯემილ ჯაჰით აქდენიზიქ, აჰმეთ ქირიმი დო ჯემალ მემიშოღლუში ნენაფეს რეაქცია ნა ოწირაფტუ ნენაფეთი გამოჩქვუ.
წოხლე აჰმეთ ქირიმიქ 8-14 გიმუა 1992 თარიღონი აქთუელის, ოკულე ჯემილ მემიშოღლუ ვე მეჯით ჩაქირუსთაქ 19 წანაღანი 1993 თარიღონი ჯუმჰურიჲეთის, ემუშკულეთი აჰმეთ ქირიმი დო ჯემილ მემიშოღლუქ 31 წანაღანი 1993 თარიღონი ბუგუნის ინტერვიუ მეჩეს. ედო ლაზიში ინსტიტუტი ვარნა ფონდი ოკიდუში ჶიკირი ოგნაფუ უნტეს. ოკიდუ ნა უნტეს ინსტიტუტი ვარნა ფონდი რტუ. მარა პოლიტიკური პარტი ოკიდუში დულჲა სთერი ნენაფეთი ითქუ დო გაზეთაფესთი გამიჩქვინუ. ლაზური ნენა დო კულტურა ოსქედინუში ნოღირათენ არ ლაზიში ფონდი ოკიდუ ნა უნტუ მითხანეფეში პიჯითენ, ლაზური ნენა დო კულტურაში ფონდი ოკიდუშა გზა მეჩამუ ნა ვარ უნტუ მითხანეფეში ხეეფეს სილახი მეჩეს. მარა მპოლის სქიდუტესთინა მეჯით ჩაქირუსთა დო ჯემილ მემიშოღლუქ 1996 ში წანას იზმითის ნა იკიდუ სიმა ჯოხონი კულტურული ფონდიში ხანდაფეს მხუჯი ნა მეჩეს მიჩქინან. აჲა რენ ენთეფეში სამიმილობა.
აწი ლაზურიში ოსქედინუ დო ომორდინუშა მხუჯი ნა მეჩაფს ჩქარ ფონდი ვა რენ მპოლის. ემუში სებები მუ დო მი რენ პია?
Hiç yorum yok:
Yorum Gönder