23 იგრიკა 1993 ში თარიღი, ჩქიმი შენი დიდო ბეჯითი რენ. ემ დღას ვიჩინი შეჰზათ აჲართეფე. შეჰზათ აჲართეფე რტუ მაართანი ლაზი ენტელექტუალი თურქეთის, ემუქ ნა ჭარეეტუ მაართანი თურქული სტატია ლაზეფე შენი. ამ თარიღის მუში კალა ოკოხთალა მიღუტუ. ემ პერიოდის ნა ვიხანდეფტი დოგურონის ნა პათმინტეს 23 იგრიკაში ცერემონიაშკულე, შეჰზათ აჲართეფეშა ვიდამინტუ, მოკითხუ შენი. ემუშენითი დიდო გურ-ფათკალერი ვორტი.
ლაზური ისტორია, კულტურა დო ნენაშა მხუჯი მეჩამუ შენი, ამ დულჲას ამახთიმუში კარარი მეფჩეეტი დო ნა ვიკითხი სვარაფეშენ ნა ოხომაწონუ კონარი, შეჰზათ აჲართეფეშა მედი ვიქიფტი. ეშო-აშო ეჩი წანაშენ გინძე ორა წოხლე, “ლაზეფეში ისტორია” შენი არ სტატია ნა ჭარეეტუ ვიგურეეტი, მარა სტატია მუში ვარ ბძირეეტი.
დოგურონის 23 იგრიკაში ცერემონია პითშკულე, ასთა-ხოლო ნა ვორტი სვა მევაშქვი დო კარაკოჲიშა ოხთიმუ შენი არ ავტობუსიშა გეფხედი. ავტობუსიში დოლოხე ელაფხედი დო ხოლო ოზმონუს გევოჭკი. ჟურ მერაღი მიღუტუ გურის. არ თერი რტუ, ნა ჭარეეტუ სტატია მუში დო მაჟურათი ნა უღუ’თუ გაგნაფა მუში. არ კელე ნა ფხერტი სვაშენ კვაზალი დო მაზღვანი კელეფეს ნა იძირენფეს ვოწკერტი დო მაჟურა კელესთი ამ დიდო დო ბეჯითი ოკოხთალა შენი თი-ჩქიმი ვიხაზიროფტი. 10-15 მინუტიშკულე კარაკოჲიშა მოფტიში, ავტობუსიშენ გეფთი. კადიკოჲიშა ნა იდასუნონ კარავიშა ვუნკაპი, ამაფთი დო ელაფხედი. გვერდი საატონი მზოღაშ მაგზალობაშკულე კადიკოჲიშა მოფთი. კადიკოჲიში მეოდანიშენთი, შეჰზათ აჲართეფეს ოხორი ნა უღუტუ სემტიშა ოხთიმუ შენი არ ავტობუსიშა გეფხედი. 5 მინუტიშკულე ნა ვიდამინტუ სვაშა ვიდი დო ავტობუსიშენ გეფთი. ხეუფშუ ვარ ვიდა ჲადო არ ჶიკირითენ, გზაშპიჯის ფუქირი ნა გამაჩაფს არ ოხორჯაშენ ფუქირი ეპჭოპი.
არ ოხორიშ ჟინ მენცახერი ნა რტუ არ ტაბელაშენ, ამ ქუჩაში ჯოხო ვიგური დო ემუშკულე ხეს ნა ვოქაჩაფტი დო ჟინ მუშის შეჰზათ აჲართეფეში ადრესი ნა ნოჭარტუ ჭიჭიტა კარტალის ვოწკედი. წორი ადრესის ვორტი. შეჰზათ აჲართეფეშ ოხორიში წოხლე ვორტი. ოხორის დიდო მსქვა არ ონტულე უღუტუ, ფუქირონი. დიდო გურ-ფათკალერი ვორტი. ზარის გევობაძგი. ასთა-ხოლო მითხანიქ ნეკნა გომინწკუ. აწი ნა მშუნს კონარი, ნა გოწამიდგითუ კოჩის, ჲულვა გერმანიაში ჩოდინარი პრეზიდენტის ნა უღუტუ სთერი არ ჶიზიკი უღუტუ. ხჩე თომონი, საპარა დო ატლეტიური არ კოჩი. დიდო პრენსიპონი არ კოჩიში კარაკტერი ნა უღუტუში ნიშანეფე მეჩაფტუ მაართანი ოძირამუს. მაართანი ოძირამუს ოხომაწონეეტუ, მუ კონარი თითიზი კოჩი ნა რტუ. სალონიშა ამაფთათ ჲა მიწუ. დოფხედით. ემ ორაშაქის დიდო ლაზეფე ვიჩინეეტი, მარა შეჰზათ აჲართეფე რტუ მაართანი ლაზი ენტელექტუალი, ნა ვიჩინი. აწითი გიწვათ დო, აწიშაქის მუში სთერი ლაზი ენტელექტუალი ვარ ვიჩინი.
თამო-თამო ჩქინი თემას ამაფთით. ირიშენ ცოხლე, თი-ჩქიმიშენ დეტალუროთ ამბარი მეფჩი ემუს. ტილიჶონის ნა ვუწვიშენ მეტა დო ჩქვანერი ნოღირა ნა ვარ მიღუტუში სებებითენ, ჩქიმდა მედი უღუტას დო მემიშველას ჲადო ექსტრა მუთხანეფეთი ვუწვი. მი ვორტი, სოლენ მოფთი, მუშენი ამ დულჲას ამაფთი დო ემუსთერი თემაფეშენ ინჶორმაცია მეფჩი ემუს. ნაკო სამიმი ნა ვორტი ემუს ოწირუში დერდი მიღუტუ. შეჰზათ აჲართეფე მემისიმინუ დო ლაზობა შენი მუთხანეფე ოხვენუში დერდი ნა მიღუტუს ქოდვაჯერუ. 15 მინუტიშ დოლოხე, ართიქართი ემ ნდღას, მკულე ფერიოდიშ წოხლე ნა ოკოიჩინუ მითხანეფე სთერი ვარ დო დიდო ორაშენ დონი ნა ოკოვიჩინოფტით სთერი ვიყვით. სუმ საატი კონარი დოფხედით დო ოკოვიღარღალით. შეჰზათ აჲართეფექ, ჯინჯი მუში არტაშენი ნა რტუ, მპოლიში უნივერსიტეტიშ ჰუკუკიში ჶაკულტეტიშენ გამახთიმერი ნა რტუ; დიდო ორაშენ დონი ადვოკათი ოყოფინოთ ნა იხანდეფტუ, მიწუ. დიდო საკინი დო თითიზი კოჩი რტუ. დოხედუ დო ოღარღალუ მუში კალა არ მოხელე სთერი რტუ.
არ მერაღი მიღუტუ. ჰო, ემუქ ლაზეფე შენი ჭარელი არ სტატიაში ავტორი რტუ. პია, ემუშენ მეტა ლაზეფე შენი ჭარელი სტატიაფე უღუტუ-ი? ემუში ღარღალაფეშენ ოხომაწონეეტი, ემუს არ სტატია ჩქვა ვარ უღუტუ ლაზეფე შენი. ემ ორას, ემუქ მუშენი ჭარეეტუ ამ სტატია დო მუშენი ჩქვა სტატიაფე ვარ უღუტუ. დედეკთიჶი ვარ ვორტი დო დედეკთიჶობა ოხვენუშა ხავესობა ნა უღუნანფეშენთი ვარ ვორტი მარა, ლაზეფე შენი ხვალა არ სტატია ნა ჭარეეტუ ამ კოჩიში სიტუაცია მუშიში სებებითენ ინტერესი მაყუ ეჲა. კაი გურონი კოჩი რტუ. პოლიციელი სთერი, კითხვაფე ოკითხუ ვარ მინტუ. ვარ მაკითხუ, გურიშდოლოხე ნა მიღუტუ კითხვაფე ოხოწონეეტუ. ედო მუშენი ემ სტატია ნა ჭარუ, ოთქუს გჲოჭკუ.
უნივერსიტეტის დიდო კაი მამგურე ნა რტუ; ჰუკუკიში ჶაკულტეტის ნა იკითხეეტუ; მამგურაფალე მუთეფეშიშენ არ თერითი მეჰმედ ალი აჲბარი ნა რტუ, დომიწუ. 1960-ონი წანაფე დიდო ბეჯითი რენან თურქეთიში ისტორიას. ამ წანაფეში გეჭკაფულას ნა იკიდუ (თიფ) “თურქეთიში მადულჲეში პარტია”ში ლიდერი ნა იყვასუნტუ მეჰმედ ალი აჲბარიქ შეჰზათ აჲართეფეში ჶაკულტეტიშენ მამგურაფალე მუში ტეენ. მეჰმედ ალი აჲბარიქ ამ პარტიაში ლიდერი იყვაში, წოხლეშენ ნა იჩინოფტუ დო დულჲამახვენუ დო ღნოსონი ნა რტუ, მეგაბრე დო მამგურეფესთი ამ პარტიაშა ამახთიმუშა უჭანდეენ. შეჰზათ აჲართეფექთი მეჰმედ ალი აჲბარის ნა ყოროფტუ დო ჯუმაკოჩეფეშენ არ თერი ნა შინაფტუ შენი დო იდეეფე მუში ნა იფააფტუ შენი, ოჩანდინუს პოზიტიური ჯოღაპი მეჩეენ. ამ პარტიას ამახთეენ დო დობადონაში ხელაკაობა მუში შენი ამ პარტიში პოლიტიკაფეს მხუჯი მეჩეენ. ამ პარტიაში დოლოხე პოლიტიკა ოხვენუს ქოგჲოჭქეენ.
თურქეთი სთერი, “ყინი ო’ქოკიდინუ”ში ოშკენდას ნა რტუ არ თერეს, მუხალიჶიური პოლიტიკა ოხვენუ ეშო ფერფუ ვარ ტუ მარა დიდო თეხლიკონი რტუ. (თიფ) თურქეთიში მადულჲეში პარტია”ქ ამ თერეს ნა სქიდუნ ხალკიში ხელაკაობა მუში შენი ოხანდუ ნა უნტუ შენი, ამ თერეს ნა სქიდუნან ხალკი ოჩინუ დო ენთეფე შენი სოციალური პოლიტიკაფე ოხვენუ უნტუ. ედო ემუშენი კომისიაფე ოთეშქილუ. პარტიაქ, შეჰზათ აჲართეფე ლაზი ნა რტუ შენი, ემუსთი ლაზეფე შენი არ ვაზიჶე მეჩეენ. შეჰზათ აჲართეფექ ლაზეფე შენი არ რაპორი სთერი მუთხა უხაზირასუნტეენ. ემუშენითი გოშოგორუს ქოგჲოჭკეენ. ამ სებებითენ მაართანი დო უნიკალური სტატია მუში ნა ჭარეეტუ, მიწუ ემუქ. არ პარტიაში დოლოხე, ხალკიში ხელაკაობა შენი პოლიტიკა იქიფტუ. პარტიაქ ამ გოშოგორუში დულჲა ემუს ნა მეჩუ შენი, ემუქ ამ სტატია ჭარეეტუ. ემუს პარტიშკელენ ვაზიჶე მეჩამერი რტუ. ლაზობას ინტერესი ნა აყვეტუ დო ლაზი ნა რტუ შენი ვარ. ლაზეფე შენი არხვალა არ სტატია ოჭარუში სებები აჲა რტუ. თურქეთის ნა სქიდუნან ქართა ხალკი შენი ართნერი გაგნაფა ნა უღუტუთი მიწუ ემ ოკოხთალაში მორგვალის.
ეშოფეთენ, ლაზეფე შენი ნა ჭარეეტუ სტატიაში სებები ოხოვოწონეეტი. ლაზი ვარნა აბაზა, ქართა ხალკი კალა ართნერი მესაჶე უღუტუ ემუს. ეშო მევაგნი. აწი აკტიური პოლიტიკაში დოლოხე ვარ ტუ. ემუშენითი ლაზობა შენი ოხანდუშ ჶიკირითი, მენჯელითი ვარ უღუტუ ემუს. აჲა ოხოვოწონეეტი. არ ორაფეს ლაზეფე შენი არ სტატია ნა ჭარუ, არ კოჩი ოყოფინოთ ოშინაფუ უნონტუ. ეჲა ემუს დუბაღუნასუნტუ. სტატია მუშიშ ოჭარუში სებები ვიგურეეტი მარა, სტატია მუშიში დოლოხე მუეფე ჭარელი ნა რტუ, ვარ მიჩქიტუ. ვარ ბძირეეტითი, ვარ ვიკითხეეტითი. ემუს ვუწვი ეჲა. ასთა-ხოლო ჲისელუ დო ოდაში არ კელეს ნა ელადგინ არ დოლაბიში ნეკნა გონწკუ დო ექოლენ არ დოსია გამიღუ.
დოსიაში დოლოხეშენ არ მუთხა ეჭოფუ დო მა ქომომჩუ. ნა პკითხი არ სვარაშენ ჯოხო მუში ნა ვოგნი, დიდო ორაშენ დონი ნა ბგორუფტი დო სტატია მუში ჭარელი გაზეთა რტუ. მთინი ნენათენ, სტატია ნა გამიჩქვინუ გაზეთა რტუ. ამ გაზეთა, 1 ხრისტანა 1976 თარიღონი დო 41 ნომერონი “უჩაზოღაში ამბარი” ჯოხონი ვითოხუთ ნდღაშ არ ჶარა ნა გამიჩქვინეტუ გაზეთა რტუ. ასთა-ხოლო გალე გამაფთი დო არ მეკირტასიჲეშა ვიდი. ამ სტატია დო არ ჩქვა მუთხაფეში ჶოტოკოპეფე ჲეშავუღაფი ექონაშის. ხოლო ოხორი მუშიშა გოვიქთი. მუში დოკუმანტეფე მეფჩი. ამციქათი დოფხედით დო თემა ჩქინიშენ ოკოვიღარღალით. ემ ორას, სტატია მუშიში ოკითხუშ შანსი მაყუ. ედო არშვაჯის სტატია მუში დოვიკითხი.
თი-მუში ნა ვიჩინი შენი, დიდო ბედინერი ნა ვიყვი, ვუწვი ემუს. ეთი ეშო მუთხანეფე მიწუ. ართიქართის ხელაკაობა ვუწვით დო ოკოვიწქით. აჲა რტუ მაართანი დო ჩოდინარი ჶარა, ნა ბძირი ეჲა. მუში კალა ოკოხთალა ჩქინიშკულე, 6 თუთა კონარი არ ფერიოდი მეკილუ. ემ ორას გამავიღით “ოგნი” ჯოხონი ჟურნალიში მაართანი ნომერი, ემუსთი მევუნჯღონეეტი ფოსტაში ხეთენ. ემუშკულეთი არ ჶარასთი, ტილიჶონითენ მუში კალა ბღ’არღალეეტი. “ოგნი” შენი, ემუს ნა აყუ ჶიკირეფე მიწვეეტუ. არ კომერციული კამპანიას ჰუკუკური კონსულ’ანტი ოყოფინოთ ნა იხანდეფტუ მიწეეტუ. არ ჩქვა დულჲათი ნა უღუტუ მიწუ. არ ანსიკლოპეთიში კამპანიასთი ხიზმეთი ნა მეჩაფტუთი თქუ.
ემუ კალა ოხორი მუშის დო ოკულეთი ტილიჶონითენ ნა ბღარღალითშენ დიდო ორა მეკილუ. შეჰზათ აჲართეფე ნა ღურუში ამბარი არ ჯუმაკოჩიშენ დიდო ორაშკულე ვოგნი. ნა ვიჩინი ლაზეფეშენ დიდო ჩქვანერი კოჩი რტუ. ხვალოთ ლაზეფე შენი არ სტატია ჭარეეტუ მარა, ქიანა გედგინშა, მუში ჯოხო იშინასენ. შეჰზათ აჲართეფეში “ლაზეფეში ისტორია” ჯოხონი სტატია, თურქეთის ლაზეფე შენი არ ლაზი კელენ ჭარელი მაართანი სტატია ნა რტუ შენი, აწინერი ლაზეფე შენი დიდო ბეჯითი რენ. ემ ვარნა ამ გაგნაფათენ, 1970-ონი წანას, თურქეთის ეშო არ სტატია ოჭარუ დო არ ჟურნალის გამაჩქვაფუ დიდო გურამობა ნა დვაჭირს არ თემა რტუ. მორო, ამ სტატია ემ ორას ნა ჭარუ შეჰზათ აჲართეფეთი გურამი ლაზეფეშენ არ თერი ოყოფინოთ იშინასენ. აწი შეჰზათ აჲართეფექ ემ ოკოხთალას ნა მიწუ არ ამბარითი გიწვათმინონან: ლაზეფე შენი არ სტატია ნა ჭარეეტუ შენი, ავტორიტეტიქ თი-მუშიშენ ოჶიციალური დო დეტალუროთ არ იჶადე ეჭოფეენან. მეზარე მუშიში ჟინ ჭითა ვარდეფე ჲეხთან.
Hiç yorum yok:
Yorum Gönder